മദ്യപാനത്തിനിടെ ലൈംഗികാതിക്രമം; രാമനാട്ടുകരയില്‍ യുവാവ് കൊല്ലപ്പെട്ടു

കോഴിക്കോട്: രാമനാട്ടുകര ഫ്‌ളൈ ഓവറിനു സമീപം യുവാവിനെ കൊല്ലപ്പെട്ട നിലയില്‍ കണ്ടെത്തി. കൊണ്ടോട്ടി സ്വദേശി ഷിബിന്‍ ആണ് മരിച്ചത്. ഇന്നലെ രാത്രിയാണ് കൊലപാതകമുണ്ടായത്.
സംഭവത്തില്‍ വൈദ്യരങ്ങാടി സ്വദേശി ഹിജാസിനെ പോലീസ് കസ്റ്റഡിയിലെടുത്തു. ഷിബിനും ഹിജാസും ഇന്നലെ രാത്രി ഒരുമിച്ച് മദ്യപിച്ചിരുന്നു. മദ്യപാനത്തിനിടെ ഹിജാസിനു നേരെ ലൈംഗികാതിക്രമത്തിനു ഷിബിന്‍ ശ്രമിച്ചു. ഇതു കയ്യാങ്കളിയിലേക്കു നീങ്ങിയതായി ഹിജാസ് പോലീസിനോടു പറഞ്ഞു.
ഷിബിനെ ഹിജാസ് സ്‌ക്രൂ ഡ്രൈവര്‍ കൊണ്ടു കുത്തിയെന്നാണ് പോലീസിന്റെ നിഗമനം. കുത്തേറ്റു വീണ ഷിബിന്റെ മേല്‍ ഹിജാസ് വെട്ടുകല്ല് എടുത്തിട്ടു. മദ്യപാനത്തിനിടെ ഇന്നലെ താന്‍ ഒരാളെ അടിച്ചിട്ടെന്ന് ഹിജാസ് ഇന്ന് സുഹൃത്തിനോട് പറഞ്ഞിരുന്നു. തുടര്‍ന്ന് നടത്തിയ അന്വേഷണത്തിലാണ് മൃതദേഹം കണ്ടെത്തിയത്.