Author: News Desk

നന്ദമുറി ബാലകൃഷ്ണ തെന്നിന്ത്യയിലെ ഏറെ ആരാധകരുള്ള നടനാണ്. ബാലകൃഷ്ണയുടെ ഓരോ സിനിമയും വളരെ ആവേശത്തോടെയാണ് പ്രേക്ഷകർ ഏറ്റെടുക്കുന്നത്. ‘വീര സിംഹ റെഡ്ഡി’ ആണ് ബാലയ്യയുടെ ഒടുവിൽ പുറത്തിറങ്ങിയ ചിത്രം. പൊങ്കൽ ദിനത്തിൽ എത്തിയ ചിത്രത്തെ വലിയ ആവേശത്തോടെയാണ് ആരാധകർ സ്വീകരിച്ചത്. ആഘോഷം പ്രദർശനം സ്തംഭിപ്പിക്കുന്ന അവസ്ഥ വരെ എത്തിയെന്ന വാർത്തയാണ് പുറത്തുവരുന്നത്.  വിശാഖപട്ടണത്തിനടുത്തുള്ള സബ്ബാവാരം എന്ന സ്ഥലത്തെ തിയേറ്ററിലാണ് സംഭവം. ‘വീര സിംഹ റെഡ്ഡി’യുടെ പ്രദർശനത്തിനിടെ തിയറ്റർ സ്ക്രീനിൽ തീ പടരുകയായിരുന്നു. ആരാധകരുടെ അമിത ആവേശത്തോടെയുള്ള പ്രകടനത്തിനിടെയാണ് അപകടമുണ്ടായതെന്നാണ് റിപ്പോർട്ടുകൾ. ഈ സമയത്ത് തിയേറ്ററിലുണ്ടായിരുന്നവരെ വേഗത്തിൽ ഒഴിപ്പിച്ചു. സംഭവത്തിന്‍റെ വീഡിയോകൾ ഇപ്പോൾ സോഷ്യൽ മീഡിയയിൽ വ്യാപകമായി പ്രചരിക്കുകയാണ്.  ഗോപീചന്ദ് മലിനേനിയാണ് വീര സിംഹ റെഡ്ഡി സംവിധാനം ചെയ്തത്. ശ്രുതി ഹാസൻ പ്രധാന വേഷത്തിൽ എത്തിയ ചിത്രത്തിൽ ഹണി റോസും ലാലും പ്രധാന വേഷങ്ങളിൽ എത്തിയിരുന്നു. വരലക്ഷ്മി ശരത്കുമാർ, ദുനിയ വിജയ്, പി രവിശങ്കർ, ചന്ദ്രിക രവി, അജയ് ഘോഷ്, മുരളി ശർമ്മ…

പത്തനംതിട്ട: ശബരിമലയിൽ ഇത്തവണ റെക്കോർഡ് വരുമാനം. ഈ വ്യാഴാഴ്ച വരെ ആകെ 310.40 കോടി രൂപയാണ് കാണിക്കയായി പിരിച്ചെടുത്തത്. അപ്പം, അരവണ എന്നിവയുടെ വിൽപ്പനയിലൂടെ 141 കോടി രൂപയും നേടി. കൊവിഡ് സാഹചര്യം കണക്കിലെടുത്ത് നിയന്ത്രണങ്ങൾ ഏർപ്പെടുത്തിയിരുന്ന കഴിഞ്ഞ രണ്ട് സീസണുകളിലും വരുമാനം കുറവായിരുന്നു. നേരത്തെ 212 കോടി രൂപയായിരുന്നു റെക്കോർഡ് വരുമാനം. ശബരിമലയിലെ മകരവിളക്കിനുള്ള ഒരുക്കങ്ങൾ പൂർത്തിയായി. സന്നിധാനത്തിന് ചുറ്റും പർണശാലകൾ ഉയർന്നു. നാളെ രാവിലെ 11 മണിക്ക് ശേഷം പമ്പയിൽ നിന്നുള്ള ഭക്തരുടെ പ്രവേശനം തടയും. ഇന്നലെ മുതൽ എത്തിത്തുടങ്ങിയ ഭക്തരിൽ പകുതിയും മലയിറങ്ങിയിട്ടില്ല. ഇന്ന് 90,000 പേരാണ് വെർച്വൽ ക്യൂവിൽ ബുക്ക് ചെയ്തിരിക്കുന്നത്. ഇന്നും നാളെയും സ്പോട്ട് ബുക്കിംഗ് ഇല്ല. നാളെ ഉച്ചക്ക് 12 മണി വരെ മാത്രമേ സന്നിധാനത്ത് പ്രവേശനം അനുവദിക്കൂ. സന്നിധാനത്ത് 10,000 ഭക്തരെയും പാണ്ടിത്താവളത്തിൽ 25,000 പേരെയും മകരവിളക്ക് ദർശനത്തിനായി അനുവദിക്കും.  മാറ്റിവെച്ച ഏലക്ക കലർന്ന ആറര ലക്ഷം ടിൻ അരവണ ഗുണനിലവാര…

അടിമാലി: വഴിയിൽ കിടന്നു കിട്ടിയതെന്ന് പറ‍ഞ്ഞ് സുഹൃത്ത് കൊടുത്ത മദ്യം കഴിച്ച് യുവാവ് മരിച്ച സംഭവത്തിൽ വഴിത്തിരിവ്. മദ്യം വഴിയിൽ കിടന്നു കിട്ടിയതല്ലെന്നും സുഹൃത്ത് വാങ്ങി വിഷം കലർത്തിയതാണെന്നും പൊലീസ് കണ്ടെത്തി. മദ്യത്തിൽ വിഷം കലർത്തിയ സുഹൃത്ത് അടിമാലി കീരിത്തോട് സ്വദേശി സുധീഷിനെ പൊലീസ് അറസ്റ്റ് ചെയ്തു. അടിമാലി സ്വദേശി കുഞ്ഞുമോൻ (40) ഇന്നലെയാണ് കോട്ടയം മെഡിക്കൽ കോളേജിൽ ചികിത്സയിലിരിക്കെ മരിച്ചത്. മദ്യം കഴിച്ച മനോജും അനുവും ഇപ്പോഴും ചികിത്സയിലാണ്. മനോജിനോട് വ്യക്തിവിരോധമുണ്ടായിരുന്ന സുധീഷ് റം പൈന്റ് വാങ്ങി അടപ്പിൽ ഓട്ടയിട്ട് കീടനാശിനി സിറിഞ്ച് വഴി കലർത്തി. ഈ ദ്വാരം പിന്നീട് മെഴുക് ഉപയോഗിച്ച് അടച്ചു. വഴിയിൽ കണ്ടെത്തിയ കുപ്പിയാണെന്ന വ്യാജേന മനോജിനെ വിളിച്ചുവരുത്തി കുടിപ്പിക്കുകയായിരുന്നു.

തിരുവനന്തപുരം: കണിയാപുരത്ത് ഗുണ്ടാസംഘം തട്ടിക്കൊണ്ടുപോയ യുവാവിനെ രക്ഷിക്കുന്നതിനിടെ പൊലീസിന് നേരെ ആക്രമണം. പെട്രോൾ ബോംബുകളും കോടാലിയും എറിഞ്ഞെങ്കിലും പൊലീസ് പരിക്കേൽക്കാതെ രക്ഷപ്പെട്ടു. പുത്തന്തോപ്പ് സ്വദേശി നിഖിൽ നോർബെറ്റിനെയാണ് ഗുണ്ടകൾ തട്ടിക്കൊണ്ടുപോയി മർദ്ദിച്ചത്. പൊലീസ് പിടിയിലായ ഷമീർ ആത്മഹത്യയ്ക്ക് ശ്രമിച്ചു. വ്യാഴാഴ്ചയാണ് സംഭവം നടന്നത്. നിഖിലിനെ തട്ടിക്കൊണ്ടുപോയി പണം ആവശ്യപ്പെടുകയായിരുന്നു. വിവരമറിഞ്ഞ് പൊലീസ് സ്ഥലത്തെത്തി നിഖിലിനെ മോചിപ്പിച്ചു. അപ്പോഴേക്കും പ്രതികളെല്ലാം രക്ഷപ്പെട്ടിരുന്നു. 2 വർഷം മുമ്പ് കണിയാപുരത്ത് നടന്ന സ്വർണ കവർച്ച കേസിലെ പ്രതികളായ ഷഫീഖും ഷമീറും ചേർന്നാണ് നിഖിലിനെ തട്ടിക്കൊണ്ടുപോയതെന്ന് പൊലീസ് കണ്ടെത്തി. വെള്ളിയാഴ്ച ഉച്ചയോടെയാണ് പ്രതികളുടെ അണ്ടൂർക്കോണത്തെ വീട്ടിൽ പൊലീസ് എത്തിയത്. ആ സമയത്താണ് പൊലീസിനുനേരെ ആക്രമണമുണ്ടായത്. ആക്രമണത്തിനിടെ ഷമീറിനെ പൊലീസ് അറസ്റ്റ് ചെയ്തു. പൊലീസിനെ ആക്രമിക്കാൻ ശ്രമിച്ചതിന് ഷമീറിന്‍റെ അമ്മയെയും കസ്റ്റഡിയിലെടുത്തിട്ടുണ്ട്. ഷമീർ സ്റ്റേഷനിലെത്തിയപ്പോൾ ബ്ലേഡ് ഉപയോഗിച്ച് കഴുത്ത് മുറിക്കാൻ ശ്രമിച്ചു. പ്രതിയെ തിരുവനന്തപുരം മെഡിക്കൽ കോളേജിലേക്ക് മാറ്റി.

രക്തത്തിലെ കൊളസ്ട്രോളിന്‍റെ അളവ് വർദ്ധിക്കുന്നത് അൽഷിമേഴ്സ്, ഹൃദ്രോഗം എന്നിവയുടെ സാധ്യത വർദ്ധിപ്പിക്കുമെന്ന് പഠനം. യൂണിവേഴ്‌സിറ്റി ഓഫ് കൊളറാഡോ സ്‌കൂള്‍ ഓഫ് മെഡിസിനിലെയും ലിന്‍ഡ ക്രിനിക് ഇന്‍സ്റ്റിറ്റ്യൂട്ട് ഫോര്‍ ഡൗണ്‍ സിന്‍ഡ്രോമിലെയും ഗവേഷകരാണ് പഠനം നടത്തിയത്.  ഗവേഷകരുടെ അഭിപ്രായത്തിൽ, കൊളസ്ട്രോൾ കോശങ്ങളെ വിഭജിക്കുന്ന പ്രക്രിയയിൽ തകരാറുകള്‍ സൃഷ്ടിക്കുമെന്നും ഇത് മൂലം വികലമായ പുതിയ കോശങ്ങളുടെ രൂപീകരണത്തിന് കാരണമാകുമെന്നും പറയുന്നു. മോശം കൊളസ്ട്രോൾ എന്നറിയപ്പെടുന്ന എൽഡിഎല്ലിന് മനുഷ്യരിലും എലികളിലും കോശവിഭജന പ്രക്രിയയെ തടസ്സപ്പെടുത്താൻ കഴിയുമെന്ന് പ്ലസ് വൺ ജേണലിൽ പ്രസിദ്ധീകരിച്ച പഠനം ചൂണ്ടിക്കാണിക്കുന്നു.  തെറ്റായ എണ്ണം ക്രോമസോമുകളും ജീനുകളും ഉള്ള വികലമായ കോശങ്ങളാണ് ഇതിന് കാരണമാകുന്നത്. കോശത്തിലെ ഓരോ ക്രോമസോമിന്‍റെയും ജീനിന്‍റെയും രണ്ട് പതിപ്പുകൾക്ക് പകരം, ചിലതിൽ മൂന്ന് പതിപ്പുകളും ചിലതിൽ ഒരു പതിപ്പും മൂലം രൂപപ്പെടും. ഈ തകരാറാണ് മറവി രോഗം, ഹൃദ്രോഗം തുടങ്ങിയ പ്രശ്നങ്ങളിലേക്ക് നയിക്കുന്നതെന്നും ഗവേഷകർ കൂട്ടിച്ചേർത്തു. 

ന്യൂഡൽഹി: അഞ്ജലി സിംഗ് എന്ന യുവതിയെ ഇരുചക്രവാഹനത്തിൽ കാറിടിച്ച് വീഴ്ത്തി വലിച്ചിഴച്ച് കൊലപ്പെടുത്തിയ കേസിൽ 11 പൊലീസുകാരെ സസ്പെൻഡ് ചെയ്തു. കൺട്രോൾ റൂമിലും പിക്കറ്റ് ഡ്യൂട്ടിയിലുമുള്ളവരെയാണ് സസ്പെൻഡ് ചെയ്തത്. അപകടവിവരം അറിയിച്ചിട്ടും പൊലീസ് എത്താൻ വൈകിയെന്ന് പരാതി ഉയർന്നിരുന്നു. സംഭവ ദിവസം രാത്രി ഡ്യൂട്ടിക്ക് നിയോഗിച്ച പൊലീസ് ഉദ്യോഗസ്ഥർക്കെതിരെ നടപടിയെടുക്കാൻ ആഭ്യന്തര മന്ത്രാലയം നേരത്തെ പൊലീസിന് നിർദ്ദേശം നൽകിയിരുന്നു. പുതുവത്സര ദിനത്തിൽ വിന്യസിച്ച മൂന്ന് പിസിആർ വാനുകളിലും രാത്രിയിൽ രണ്ട് പിക്കറ്റുകളിലും വിന്യസിച്ചിരുന്ന ഉദ്യോഗസ്ഥരെയും സസ്പെൻഡ് ചെയ്യാൻ മന്ത്രാലയം ഡൽഹി പൊലീസിനോട് ആവശ്യപ്പെട്ടിരുന്നു. രണ്ട് സബ് ഇൻസ്പെക്ടർമാർ, 4 ഹെഡ് കോൺസ്റ്റബിൾമാർ, ഒരു കോൺസ്റ്റബിൾ എന്നിവരെയാണ് സസ്പെൻഡ് ചെയ്തത്. രാത്രി ഡ്യൂട്ടിക്ക് നിയോഗിച്ച പൊലീസുകാരിൽ നിന്ന് കൃത്യവിലോപം നടന്നതായി കണ്ടെത്തിയതായി സംഭവത്തെക്കുറിച്ച് അന്വേഷിച്ച കമ്മീഷണർ ശാലിനി സിംഗ് പറഞ്ഞു. കുറ്റക്കാരെന്ന് കണ്ടെത്തിയ പൊലീസുകാർക്കെതിരെ കൊലക്കുറ്റവും ചുമത്തണമെന്ന് മന്ത്രാലയം അറിയിച്ചതായി പൊലീസ് പറഞ്ഞു.

തിരുവനന്തപുരം: കേന്ദ്ര സർക്കാരിന്റെ നയങ്ങൾക്കെതിരെ കാസർകോട് മുതൽ തിരുവനന്തപുരം വരെ ജാഥ സംഘടിപ്പിക്കാന്‍ സി.പി.എം. ഫെബ്രുവരി 20 മുതൽ മാർച്ച് 18 വരെ സംസ്ഥാന സെക്രട്ടറി എം.വി. ഗോവിന്ദന്‍റെ നേതൃത്വത്തിലാണ് ജാഥ. പി.കെ. ബിജുവാണ് ജാഥാ മാനേജർ. സി.എസ്. സുജാത, എം. സ്വരാജ്, ജെയ്ക് സി.തോമസ്, കെ. ടി.ജലീൽ എന്നിവര്‍ ജാഥാംഗങ്ങളാണ്. ആർ.എസ്.എസിന്‍റെ നൂറാം വാർഷികമാകുമ്പോഴേക്ക് ഹിന്ദുരാഷ്ട്രം പ്രഖ്യാപിക്കണമെന്നാണ് ആർ.എസ്.എസിന്‍റെ അജണ്ട വ്യക്തമാക്കുന്നതെന്ന് സി.പി.എം സംസ്ഥാന സെക്രട്ടറി എം.വി ഗോവിന്ദൻ വാർത്താസമ്മേളനത്തിൽ പറഞ്ഞു. ഇത് ഒരു മതേതര സമൂഹം കെട്ടിപ്പടുക്കേണ്ടതിന്‍റെ ആവശ്യകതയെ ഉയർത്തിക്കാട്ടുന്നു. കോർപ്പറേറ്റുകൾക്ക് വേണ്ടി കേന്ദ്ര സർക്കാർ ജനവിരുദ്ധ നയങ്ങളാണ് സ്വീകരിക്കുന്നത്. തൽഫലമായി, എല്ലാത്തിൻ്റെയും വില വർദ്ധിക്കുന്നു. നിത്യോപയോഗ സാധനങ്ങളുടെ വിലക്കയറ്റം സാധാരണക്കാരന്‍റെ ജീവിതം ദുസ്സഹമാക്കുകയാണ്. തൊഴിലില്ലായ്മാ നിരക്ക് അഭൂതപൂർവമായ നിരക്കിൽ ഉയരുകയാണ്. പട്ടിണികിടക്കുന്നവരുടെ എണ്ണം ദിനംപ്രതി വർദ്ധിച്ചു വരികയാണ്. ഇതിനെതിരെ ഫലപ്രദമായ ഒരു നിലപാടും കേന്ദ്രത്തിൽ നിന്ന് ഉണ്ടായിട്ടില്ല. ഇത്തരം കാര്യങ്ങൾ ജനങ്ങൾക്ക് മുന്നിൽ തുറന്നുകാട്ടപ്പെടണം. സംസ്ഥാന സർക്കാരിന്റെ…

ന്യൂ ഡൽഹി: 2023 ലെ ബജറ്റ് സമ്മേളനം ജനുവരി 31ന് ആരംഭിക്കും. പ്രധാനമന്ത്രി നരേന്ദ്ര മോദി സാമ്പത്തിക വിദഗ്ധരുമായി കൂടിക്കാഴ്ച നടത്തി. 66 ദിവസങ്ങളിലായി 27 സിറ്റിംഗുകളാണ് പ്രതീക്ഷിക്കുന്നത്. ആദ്യ ഘട്ടം 2023 ഏപ്രിൽ 6ന് അവസാനിക്കും. നീതി ആയോഗിലെ സാമ്പത്തിക വിദഗ്ധരുമായുള്ള കൂടിക്കാഴ്ചയിൽ, ഇന്ത്യൻ സമ്പദ്‌വ്യവസ്ഥയുടെ അവസ്ഥയും അതിന്‍റെ വെല്ലുവിളികളും വിലയിരുത്തുന്നതിനൊപ്പം പ്രധാനമന്ത്രി അഭിപ്രായങ്ങളും നിർദ്ദേശങ്ങളും തേടി. ലോക്സഭയുടെയും രാജ്യസഭയുടെയും സംയുക്ത സമ്മേളനത്തിൽ പ്രസിഡന്‍റ് ദ്രൗപദി മുർമു നടത്തുന്ന പ്രസംഗത്തോടെ സമ്മേളനം ആരംഭിക്കും. കഴിഞ്ഞ വർഷം ജൂലൈയിൽ നിയമിതയായ ശേഷം ഇരുസഭകളിലും രാഷ്ട്രപതി നടത്തുന്ന ആദ്യ പ്രസംഗമാണിത്.

കൊച്ചി: അനധികൃത ബാനറുകളും കൊടികളും വയ്ക്കുന്നവർക്കെതിരെ ക്രിമിനൽ കേസെടുക്കാൻ ഹൈക്കോടതി ഉത്തരവിട്ടു. രജിസ്റ്റർ ചെയ്ത കേസുകളുടെ വിശദാംശങ്ങൾ അറിയിക്കണമെന്ന് നിർദ്ദേശിച്ച കോടതി, ഉത്തരവ് നടപ്പാക്കാത്ത തദ്ദേശ സെക്രട്ടറിമാർക്കും എസ്എച്ച്ഒമാർക്കുമെതിരെ കോടതിയലക്ഷ്യ നടപടി സ്വീകരിക്കുമെന്നും കൂട്ടിച്ചേർത്തു. തദ്ദേശ സെക്രട്ടറിമാരുടെ നിർദ്ദേശങ്ങൾ നടപ്പാക്കാത്ത ജീവനക്കാർക്കെതിരെയും കോടതിയലക്ഷ്യ നടപടികൾ സ്വീകരിക്കുമെന്ന് ജസ്റ്റിസ് ദേവൻ രാമചന്ദ്രൻ പറഞ്ഞു. തിരുവനന്തപുരത്തും തൃശൂരിലും സ്ഥാപിച്ചിരുന്ന അനധികൃത ബോർഡുകൾ നീക്കം ചെയ്തതായി തദ്ദേശ സെക്രട്ടറിമാർ കോടതിയെ അറിയിച്ചു. 

വയനാട്: കാട്ടിൽ ഉൾക്കൊള്ളാനാവുന്ന ശേഷിയെക്കാൾ കൂടുതൽ വന്യമൃഗങ്ങളുടെ വർദ്ധനവാണ് വന്യജീവി ആക്രമണങ്ങൾ ഉൾപ്പെടെയുള്ള സംഭവങ്ങൾക്ക് കാരണമെന്ന് വനം മന്ത്രി എ കെ ശശീന്ദ്രൻ. വന്യമൃഗങ്ങളുടെ ജനനനിയന്ത്രണം ആവശ്യപ്പെട്ട് കേരളം ഉടൻ സുപ്രീംകോടതിയിൽ അടിയന്തര ഹർജി നൽകുമെന്നും അദ്ദേഹം പറഞ്ഞു. വന്യജീവി ആക്രമണം തടയുന്നതിനുള്ള പ്രവർത്തനങ്ങൾ ഫലപ്രാപ്തിയിൽ എത്താത്ത സാഹചര്യമാണുള്ളത്. വനംവകുപ്പ് ഉദ്യോഗസ്ഥർ ആത്മാർത്ഥമായി പരിശ്രമിക്കുന്നുണ്ടെങ്കിലും വന്യജീവികളുടെ എണ്ണം വർദ്ധിക്കുന്നത് പ്രശ്നമാണെന്നും മന്ത്രി കൂട്ടിച്ചേർത്തു. “കാട്ടിൽ വന്യമൃഗങ്ങളെ ഉൾക്കൊള്ളാനുള്ള ശേഷിക്ക് അധികമായി വന്യമൃഗങ്ങളുടെ എണ്ണം വർദ്ധിച്ചതാണ് ഇപ്പോഴത്തെ സംഭവങ്ങൾക്ക് കാരണം. വനാതൃത്തി 29.55 ആണെങ്കിലും വനത്തിനുള്ളിലെ വനേതര പ്രദേശങ്ങളുടെ എണ്ണവും വ്യാപ്തിയും വർദ്ധിച്ചിട്ടുണ്ട്. ഇക്കാരണത്താൽ, വന്യമൃഗങ്ങൾ ഭക്ഷണ ആവശ്യങ്ങൾക്കായി നാട്ടിലേക്ക് വരുന്നതായാണ് വിവരം. സർക്കാർ ഇത് തള്ളിക്കളയുന്നില്ലെന്നും” മന്ത്രി പറഞ്ഞു. കുരങ്ങുകളുടെ എണ്ണം ക്രമാതീതമായി വർദ്ധിച്ചിട്ടുണ്ടെന്നും ഇതിന് പരിഹാരമെന്ന നിലയിൽ വന്ധ്യംകരണ പ്രവർത്തനങ്ങൾ ഊർജിതമാക്കുമെന്നും മന്ത്രി വാർത്താസമ്മേളനത്തിൽ പറഞ്ഞു.