Author: News Desk

ചെന്നൈ: രാജ്യവ്യാപകമായി ഹിന്ദി ഔദ്യോഗിക ഭാഷയാക്കാനുള്ള പാർലമെന്‍ററി സമിതിയുടെ ശുപാർശയ്ക്കെതിരെ തമിഴ്നാട് പ്രമേയം പാസാക്കി. ആഭ്യന്തരമന്ത്രി അമിത് ഷായുടെ നേതൃത്വത്തിലുള്ള പാർലമെന്‍ററി സമിതിയുടെ ശുപാർശകൾ നടപ്പാക്കരുതെന്ന് പ്രമേയം ആവശ്യപ്പെട്ടു. പ്രതിപക്ഷത്തിന്‍റെ അഭാവത്തിലാണ് പ്രമേയം പാസാക്കിയത്. ചോദ്യോത്തരവേളയിൽ പ്രതിപക്ഷ നേതാവ് എടപ്പാടി പളനിസ്വാമി സംസാരിക്കാൻ എഴുന്നേറ്റപ്പോൾ സ്പീക്കർ സംസാരിക്കാൻ അനുവദിച്ചില്ല. തുടർന്ന് സഭയിൽ ബഹളമായതോടെ പ്രതിപക്ഷത്തെ സഭയിൽ നിന്ന് പുറത്താക്കാൻ സ്പീക്കർ എം.അപ്പാവു ഹൗസ് മാർഷലുകളോട് ആവശ്യപ്പെട്ടു. ഇത് സഭയിൽ വലിയ കോലാഹലത്തിന് കാരണമായി. അതേസമയം അണ്ണാ ഡിഎംകെ വിമത നേതാവും മുൻ മുഖ്യമന്ത്രിയുമായ ഒ പനീർശെൽവം പ്രമേയത്തെ സ്വാഗതം ചെയ്തു.

തിരുവനന്തപുരം: എൻഡോസൾഫാൻ ദുരിതബാധിതരുടെ ക്ഷേമത്തിനായി സാമൂഹ്യ പ്രവർത്തക ദയാബായി നടത്തുന്ന നിരാഹാര സമരത്തോട് അനുഭാവപൂർണമായ സമീപനമാണ് സർക്കാരിനുള്ളതെന്ന് മുഖ്യമന്ത്രി പിണറായി വിജയൻ. എയിംസ് ഒഴികെയുള്ള എല്ലാ ആവശ്യങ്ങളും അംഗീകരിക്കാമെന്നാണ് സർക്കാരിന്റെ നിലപാട്. ഇക്കാര്യത്തിൽ സർക്കാരിന് അവ്യക്തതയില്ലെന്നും മുഖ്യമന്ത്രി പറഞ്ഞു. സമരം അവസാനിപ്പിക്കണമെന്ന് ആവശ്യപ്പെട്ട് മന്ത്രിമാരായ വീണാ ജോർജും ആർ ബിന്ദുവും ആശുപത്രിയിലെത്തി സംസാരിച്ചെങ്കിലും ദയാബായി വിസമ്മതിച്ചു. എൻഡോസൾഫാൻ ദുരിതബാധിതരുടെ ദീർഘകാലമായുള്ള ന്യായമായ ആവശ്യങ്ങൾ നിറവേറ്റാതെ നിരാഹാര സമരം അവസാനിപ്പിക്കില്ലെന്ന ഉറച്ച നിലപാടിലാണ് ദയാബായി. കാസർകോട് എയിംസ് സ്ഥാപിക്കുക, മെഡിക്കൽ ക്യാമ്പ് സംഘടിപ്പിക്കുക, ദുരിതബാധിതർക്ക് മെച്ചപ്പെട്ട ചികിത്സ നൽകുക, കുട്ടികൾക്കായി പകൽ സംരക്ഷണ കേന്ദ്രങ്ങൾ ആരംഭിക്കുക തുടങ്ങിയ ആവശ്യങ്ങൾ ഉന്നയിച്ചാണ് സമരം.

നോയിഡ: ഉത്തർപ്രദേശിൽ ഏഴ് മാസം പ്രായമുള്ള കുട്ടിയുടെ കുടൽ തെരുവ് നായ കടിച്ചെടുത്തു. നോയിഡയിൽ തിങ്കളാഴ്ചയായിരുന്നു സംഭവം. തെരുവുനായയുടെ ആക്രമണത്തെ തുടർന്ന് കുട്ടിയെ സ്വകാര്യ ആശുപത്രിയിലെ തീവ്രപരിചരണ വിഭാഗത്തിൽ എത്തിച്ചെങ്കിലും ജീവൻ രക്ഷിക്കാനായില്ല. കുട്ടിയുടെ മാതാപിതാക്കൾ നോയിഡയിലെ ഒരു ഹൗസിംഗ് സൊസൈറ്റിയിൽ നിർമ്മാണ പ്രവർത്തനങ്ങളിൽ ഏർപ്പെട്ടിരിക്കുകയായിരുന്നു. അടുത്ത് കുട്ടിയേയും ഇരുത്തിയിരുന്നു. എന്നാൽ ഇതിനിടെ തെരുവുനായ സൊസൈറ്റിയിലേക്ക് പ്രവേശിച്ച് കുട്ടിയെ ആക്രമിക്കുകയായിരുന്നു. തെരുവുനായയുടെ ആക്രമണത്തിൽ കുട്ടിയുടെ കുടൽ പുറത്ത് ചാടി. ഉടൻ തന്നെ ശസ്ത്രക്രിയയ്ക്കായി ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. സെക്ടർ 100 ലെ ലോട്ടസ് ബൊളിവാർഡ് സൊസൈറ്റിയിലെ ആളുകൾ സംഭവത്തിൽ ശക്തമായ പ്രതിഷേധവുമായി രംഗത്തെത്തി. പ്രദേശത്ത് തെരുവുനായ്ക്കളുടെ ശല്യം വർദ്ധിച്ചിട്ടുണ്ടെന്നും ഇതിനെതിരെ അധികൃതർ എത്രയും വേഗം നടപടിയെടുക്കണമെന്നും പ്രതിഷേധക്കാർ ആവശ്യപ്പെട്ടു. കുട്ടികളുടെ സുരക്ഷയെക്കുറിച്ചുള്ള ആശങ്കയും അവർ അറിയിച്ചു.

തിരുവനന്തപുരം: യുഎസ്, കാനഡ എന്നീ രാജ്യങ്ങളിലെ ജയിലുകളിലെ സൗകര്യങ്ങളെക്കുറിച്ച് പഠിക്കാൻ ജയിൽ ഡിജിപി സുദേഷ് കുമാർ നടത്താനിരുന്ന യാത്ര റദ്ദാക്കി. വെല്ലൂരിലെ അക്കാദമി ഓഫ് പ്രിസൺസ് ആൻഡ് കറക്ഷണൽ അഡ്മിനിസ്ട്രേഷന്‍റെ നേതൃത്വത്തിലായിരുന്നു യാത്ര ആസൂത്രണം ചെയ്തിരുന്നത്. അടുത്ത വർഷത്തേക്ക് യാത്ര മാറ്റിവയ്ക്കാനാണ് വിദേശകാര്യ മന്ത്രാലയം അക്കാദമിക്ക് നിർദേശം നൽകിയത്. ഇതിന്‍റെ കാരണം വ്യക്തമല്ല. യാത്ര മാറ്റിവച്ചതിനെ തുടർന്ന് നേരത്തെ ഇറക്കിയ ഉത്തരവ് റദ്ദാക്കി പൊതുഭരണ വകുപ്പ് പുതിയ ഉത്തരവിറക്കി. 1987 ബാച്ച് ഐപിഎസ് ഉദ്യോഗസ്ഥനായ സുദേഷ് കുമാർ ഈ മാസം അവസാനത്തോടെ വിരമിക്കും. വിരമിക്കുന്ന മാസത്തിൽ ജയിലിലെ സൗകര്യങ്ങൾ പഠിക്കാൻ വിദേശത്തേക്ക് അയയ്ക്കുന്നതിനെതിരെ വിമർശനം ഉയർന്നിരുന്നു. തലസ്ഥാനത്തെ ഒരു ജ്വല്ലറിയിൽ നിന്ന് 95 ശതമാനം ഡിസ്കൗണ്ടിൽ സ്വർണം വാങ്ങിയതായി സുദേഷ് കുമാറിനെതിരെ പരാതി ലഭിച്ചിരുന്നു. വിദേശയാത്രകളെക്കുറിച്ചും പരാതികൾ ലഭിച്ചിരുന്നു. ആഭ്യന്തര സെക്രട്ടറി ഇക്കാര്യം അന്വേഷിച്ച് റിപ്പോർട്ട് സമർപ്പിച്ചെങ്കിലും ഇതുവരെ ഒരു നടപടിയും ഉണ്ടായിട്ടില്ല.

മസ്‍കത്ത്: ഒമാൻ സർക്കാരിന്റെ ഔദ്യോഗിക രാജകീയ മുദ്ര വാണിജ്യ ആവശ്യങ്ങൾക്ക് ഉപയോഗിക്കുന്നത് നിരോധിച്ചു. രാജ്യത്തെ വാണിജ്യ, വ്യവസായ, നിക്ഷേപ പ്രോത്സാഹന മന്ത്രാലയമാണ് ഇത് സംബന്ധിച്ച് ഉത്തരവിറക്കിയത്. ഒമാനിലെ സ്വകാര്യ സ്ഥാപനങ്ങൾ, വാണിജ്യാടിസ്ഥാനത്തിൽ പ്രവർത്തിക്കുന്ന കമ്പനികൾ, സോഷ്യൽ മീഡിയ അക്കൗണ്ടുകൾ എന്നിവയ്ക്ക് നിരോധനം ബാധകമാണ്. വാണിജ്യ, വ്യവസായ, നിക്ഷേപ പ്രോത്സാഹന മന്ത്രാലയത്തിന്‍റെ പ്രത്യേക അനുമതി വാങ്ങാതെ രാജകീയ ചിഹ്നം ഉപയോഗിക്കാൻ പാടില്ലെന്ന് ഔദ്യോഗിക വിജ്ഞാപനത്തിൽ പറയുന്നു.

നിസാൻ മോട്ടോർ തങ്ങളുടെ മുൻനിര മിഡ്-സൈസ് എസ് യു വിയായ എക്സ്-ട്രയൽ ഇന്ത്യയിൽ തിരിച്ചെത്തുമെന്ന് സ്ഥിരീകരിച്ചു. ഇന്ന് (ഒക്ടോബർ 18) നടന്ന ഒരു പരിപാടിയിൽ, ന്യൂ-ജെൻ എക്സ്-ട്രയൽ എസ് യു വിയുടെ നേതൃത്വത്തിൽ മൂന്ന് മോഡലുകൾ നിസ്സാൻ രാജ്യത്ത് അവതരിപ്പിക്കുമെന്ന് പ്രഖ്യാപിച്ചു. ആഗോള വിപണികൾക്കായി ഇതിനകം അവതരിപ്പിച്ചിട്ടുള്ള നാലാം തലമുറ എക്സ്-ട്രയൽ, ഇന്ത്യയിലെത്തുന്ന മൂന്നിൽ ആദ്യത്തേതായിരിക്കും. ജാപ്പനീസ് കാർ നിർമ്മാതാവ് ഇപ്പോൾ ചെന്നൈയിലെ ഫെസിലിറ്റിയോട് ചേർന്ന് എസ് യു വിയിൽ പരിശോധനകൾ നടത്തുകയാണ്. പരിശോധനകൾ പൂർത്തിയായാൽ എക്സ്-ട്രയൽ ലോഞ്ച് പ്രഖ്യാപിക്കും.

ഗൂഗിൾ രണ്ട് പുതിയ സ്മാർട്ട്ഫോണുകൾ ഇന്ത്യൻ വിപണിയിൽ അവതരിപ്പിച്ചു. ഗൂഗിൾ പിക്സൽ 7ന് പുറമെ ഗൂഗിൾ പിക്സൽ 7 പ്രോയും ഇന്ത്യൻ വിപണിയിൽ അവതരിപ്പിച്ചു. ടെൻസർ ജി 2 പ്രോസസ്സറുകളാൽ പ്രവർത്തിക്കുന്ന ഈ സ്മാർട്ട്ഫോണുകൾ ഇന്ന് മുതൽ ഓൺലൈൻ ഷോപ്പിംഗ് വെബ്സൈറ്റായ ഫ്ലിപ്കാർട്ടിൽ വാങ്ങാൻ കഴിയും. ഡിസ്പ്ലേയുടെ സവിശേഷതകൾ പരിശോധിച്ചാൽ, ഈ സ്മാർട്ട്ഫോണുകൾക്ക് 6.3 ഇഞ്ച് ഫുൾ എച്ച്ഡി + ഒഎൽഇഡി ഡിസ്പ്ലേയും 2400 × 1080 പിക്സൽ റെസല്യൂഷനും ലഭിക്കും. പ്രോസസ്സറുകളുടെ കാര്യം വരുമ്പോൾ, ഇത് ഗൂഗിൾ ടെൻസർ ജി 2 പ്രോസ്സസറുകളിലാണ് പ്രവർത്തിക്കുന്നത്. ഈ സ്മാർട്ട്ഫോണുകളുടെ ഓപ്പറേറ്റിംഗ് സിസ്റ്റം ആൻഡ്രോയിഡ് 13 ആണ്. 8 ജിബിയുടെ റാം കൂടാതെ 128 ജിബിയുടെ സ്റ്റോറേജും ലഭിക്കും.

തിരുവനന്തപുരം: ഇന്ത്യയിൽ ആദ്യമായി ചൈനീസ് മൈന എന്നറിയപ്പെടുന്ന വൈറ്റ്-ഷോൾഡേർഡ് സ്റ്റാർലിംഗിനെ തിരുവനന്തപുരത്ത് കണ്ടെത്തി. ഫോട്ടോഗ്രാഫറും പക്ഷിനിരീക്ഷകനുമായ തിരുവനന്തപുരം പൂന്തുറ പുതുക്കാട് സ്വദേശി അജീഷ് സാഗയാണ് വെള്ളായണി പുഞ്ചക്കരി പാടത്ത് നിന്ന് ചൈനീസ് മൈനയെ കണ്ടെത്തി ചിത്രം പകർത്തിയത്. ദക്ഷിണേഷ്യൻ രാജ്യങ്ങളിൽ തന്നെ ഇതാദ്യമായാണ് വൈറ്റ് ഷോൾഡേർഡ് സ്റ്റാർലിംഗിനെ കണ്ടെത്തുന്നതെന്ന് ബേർഡ് കൗണ്ട് ഇന്ത്യയിലെ ശാസ്ത്രജ്ഞനായ ജെ പ്രവീൺ പറഞ്ഞു. ഇന്ത്യയ്ക്ക് സമീപം ഈ പക്ഷിയെ കണ്ടെത്തിയിട്ടുള്ളത് മ്യാൻമറിലാണ്. കരിന്തലച്ചിക്കാളി എന്നറിയപ്പെടുന്ന ബ്രാഹ്മണി സ്റ്റാർലിംഗ് കൂട്ടത്തിലാണ് ചൈനീസ് മൈനയും ഉണ്ടായിരുന്നത്. പുഞ്ചക്കരിയിൽ ഒരെണ്ണം മാത്രമേ ഉണ്ടായിരുന്നുള്ളൂ. ഈ പക്ഷി സാധാരണയായി കാണപ്പെടുന്നത് കിഴക്കൻ ചൈനയിലും വിയറ്റ്നാമിലുമാണ്. ജപ്പാൻ, ദക്ഷിണ കൊറിയ, ഫിലിപ്പീൻസ്, മലേഷ്യ, സിംഗപ്പൂർ എന്നിവിടങ്ങളിലേക്കാണ് ഇവ ദേശാടനം നടത്തുന്നത്. ഈ മാസം ആദ്യം മുതൽ നിരവധി ദേശാടനപ്പക്ഷികളാണ് കേരളത്തിന്‍റെ വിവിധ ഭാഗങ്ങളിൽ എത്തുന്നത്. പക്ഷികളെക്കുറിച്ചുള്ള വിവരങ്ങൾ ശേഖരിക്കുന്ന ഇ-ബേർഡ് വെബ്സൈറ്റിലെ വിവരങ്ങൾ അനുസരിച്ച് സംസ്ഥാനത്ത് നിലവിൽ 546 ഇനം പക്ഷികളുണ്ട്. രാജ്യത്തുടനീളം…

തിരുവനന്തപുരം: വിദേശയാത്ര കൊണ്ട് ലക്ഷ്യമിട്ടതിലും കൂടുതൽ നേട്ടങ്ങൾ ഉണ്ടായെന്ന് മുഖ്യമന്ത്രി പിണറായി വിജയൻ. ഫിൻലാൻഡ്, നോർവേ, യുകെ എന്നിവിടങ്ങളിലാണ് സന്ദർശനം നടത്തിയത്. ലോക കേരളസഭയുടെ മേഖലാ സമ്മേളനത്തിലും പങ്കെടുത്തു. കേരളത്തെ ഉന്നത വിദ്യാഭ്യാസ മേഖലയുടെ ഹബ്ബായി മാറ്റുക, കൂടുതൽ വ്യാവസായിക നിക്ഷേപം കൊണ്ടുവരിക തുടങ്ങിയ കാര്യങ്ങളിൽ പ്രവാസികളുടെ സഹായം തേടിയതായി മുഖ്യമന്ത്രി വിശദീകരിച്ചു. തിരുവനന്തപുരത്ത് നടത്തിയ വാർത്താസമ്മേളനത്തിലാണ് മുഖ്യമന്ത്രി ഇത് ചൂണ്ടിക്കാട്ടിയത്. മുഖ്യമന്ത്രിയുടെയും സംഘത്തിന്‍റെയും വിദേശയാത്ര വിവാദമായതിന് ശേഷം ഇതാദ്യമായാണ് അദ്ദേഹം പരസ്യമായി പ്രതികരിക്കുന്നത്. വിദേശയാത്രയെക്കുറിച്ചു സംസാരിക്കാനാണ് വാർത്താസമ്മേളനമെന്ന് സൂചിപ്പിച്ചാണ് മുഖ്യമന്ത്രി തുടങ്ങിയത്. അതുകൊണ്ടാണ് ചീഫ് സെക്രട്ടറിയും വാർത്താസമ്മേളനത്തിന് എത്തിയതെന്നും അദ്ദേഹം വിശദീകരിച്ചു. പഠന, ഗവേഷണ മേഖലകളിലെ സഹകരണം, കേരളീയർക്ക് പുതിയ തൊഴിലവസരങ്ങൾ കണ്ടെത്തുക, പ്രവാസി ക്ഷേമത്തിനായുള്ള ഇടപെടലുകൾ, കൂടുതൽ നിക്ഷേപകരെ സംസ്ഥാനത്തേക്ക് ആകർഷിക്കുക എന്നിവയാണ് സന്ദർശനത്തിന്‍റെ പ്രധാന ലക്ഷ്യങ്ങൾ ആയി കണ്ടിരുന്നത്. ഇവയിലെല്ലാം പ്രതീക്ഷിച്ചതിലും കൂടുതൽ നേട്ടമുണ്ടാക്കാൻ കഴിഞ്ഞുവെന്ന് അദ്ദേഹം പറഞ്ഞു.

മലപ്പുറം: മലപ്പുറത്ത് സൈലൻസറിൽ നിന്ന് തീ തുപ്പുന്ന തരത്തിൽ രൂപമാറ്റം വരുത്തിയ കാർ മോട്ടോർ വാഹന വകുപ്പിന്‍റെ എൻഫോഴ്സ്മെന്‍റ് വിഭാഗം പിടിച്ചെടുത്തു. സോഷ്യൽ മീഡിയയിൽ ഈ കാർ വൈറൽ ആയിരുന്നു. കോളേജുകളിലടക്കം ആഘോഷങ്ങൾക്കായി നൽകിയിരുന്ന കാറായിരുന്നു ഇത്. കഴിഞ്ഞ കുറച്ച് ദിവസങ്ങളായി കാർ ഇൻസ്റ്റാഗ്രാമിൽ വൻ ഹിറ്റായിരുന്നു. കോളേജ് ആഘോഷങ്ങളിൽ ഹീറോയായിരുന്നു ഈ കാർ. സൈലൻസറിൽ നിന്ന് തീ തുപ്പുന്ന തരത്തിലാണ് രൂപമാറ്റം ചെയ്തിരിക്കുന്നത്. എഞ്ചിനിൽ നിന്ന് ഒരു പ്രത്യേക പൈപ്പ് സൈലൻസറിലേക്ക് എത്തിച്ച് തീ വരാനുള്ള സംവിധാനമാണ് കാറിൽ സജ്ജീകരിച്ചിരിക്കുന്നത്. പിന്നിൽ പോകുന്ന വാഹനങ്ങൾക്ക് അപകടമുണ്ടാക്കുന്ന തരത്തിലാണ് രൂപമാറ്റമെന്ന് എംവിഡി പറയുന്നു. ഇതിനുപുറമെ, കാറിന് എട്ട് രൂപമാറ്റങ്ങളും ഉണ്ടായിരുന്നു. ലക്ഷക്കണക്കിന് രൂപ ചെലവഴിച്ചാണ് ഹോണ്ട സിറ്റി കാർ രൂപമാറ്റം വരുത്തിയത്. മലപ്പുറം വെന്നിയൂരിലെ ഉടമയുടെ വീട്ടിലാണ് മോട്ടോർ വാഹന വകുപ്പ് കാർ പരിശോധിച്ചത്. ഒരു സാധാരണ കാർ വാടകയ്ക്ക് നൽകുന്നതിൻ്റെ ഇരട്ടിയിലധികം തുകയ്ക്കാണ് കാർ വാടകയ്ക്ക് നൽകിയിരുന്നത് എന്നാണ് വിവരം.