Author: news editor

ന്യൂഡല്‍ഹി: നാലുമാസം പ്രായമുള്ള കുഞ്ഞ് മരിച്ച കേസില്‍ തടവില്‍ കഴിയുകയായിരുന്ന ഉത്തര്‍പ്രദേശ് സ്വദേശിനി ഷഹ്‌സാദി ഖാന്റെ (33) വധശിക്ഷ യു.എ.ഇ. നടപ്പാക്കി. ഇതുസംബന്ധിച്ച സ്ഥിരീകരണം ലഭിച്ചതായി വിദേശകാര്യ മന്ത്രാലയം തിങ്കളാഴ്ച ഡല്‍ഹി ഹൈക്കോടതിയെ അറിയിച്ചു.ഫെബ്രുവരി 15നാണ് യു.എ.ഇ. വധശിക്ഷ നടപ്പാക്കിയതെന്ന് മന്ത്രാലയം കോടതിയില്‍ പറഞ്ഞു. ഫെബ്രുവരി 28നാണ് വധശിക്ഷ നടപ്പാക്കിയ വിവരം അറിയിച്ചുള്ള ഔദ്യോഗിക സന്ദേശം യു.എ.ഇയിലെ ഇന്ത്യന്‍ എംബസിയില്‍ ലഭിച്ചതെന്ന് അഡീഷണല്‍ സോളിസിറ്റര്‍ ജനറല്‍ (എ.എസ്.ജി) ചേതന്‍ ശര്‍മ അറിയിച്ചു.മാര്‍ച്ച് 5ന് മൃതദേഹം സംസ്‌കരിക്കാനുള്ള നടപടികള്‍ സ്വീകരിച്ചിട്ടുണ്ടെന്നും അദ്ദേഹം പറഞ്ഞു. മകളുടെ അവസ്ഥയറിയാന്‍ ഷഹ്‌സാദിയുടെ പിതാവ് കോടതിയെ സമീപിച്ചതിനെ തുടര്‍ന്നാണ് വധശിക്ഷ നടപ്പാക്കിയ വിവരം ലഭിച്ചത്. ഇന്ത്യന്‍ ദമ്പതികളുടെ കുട്ടി മരിച്ചതിനെ തുടര്‍ന്ന് മാതാപിതാക്കള്‍ നല്‍കിയ കേസിലാണ് വീട്ടുജോലിക്കാരിയായിരുന്ന ഷഹ്‌സാദിക്ക് അബുദാബി കോടതി വധശിക്ഷ വിധിച്ചത്. ഉത്തര്‍പ്രദേശ് മതാവുന്ദ് ഗൊയ്‌റ മുഗളായി ബാന്ദ സ്വദേശിയായ ഷെഹ്‌സാദി 2021ലാണ് സമൂഹമാധ്യമത്തിലൂടെ പരിചയത്തിലായ ഉസൈര്‍ വഴി അബുദാബിയിലെത്തിയത്.

കോഴിക്കോട്: ഷഹബാസ് വധക്കേസ് പ്രതികള്‍ക്കെതിരെ പ്രതിഷേധം ശക്തമായതിനു പിന്നാലെ വെള്ളിമാടുകുന്ന് ജുവനൈല്‍ ഹോം പരിസരത്ത് സംഘര്‍ഷാവസ്ഥ. പ്രതികളായ വിദ്യാര്‍ത്ഥികളെ എസ്.എസ്.എസ്.എല്‍.സി. പരീക്ഷയെഴുതാന്‍ പുറത്തേക്ക് കൊണ്ടുപോകാനാവാത്ത അവസ്ഥയുണ്ടായതിനെ തുടര്‍ന്ന് ജുവനൈല്‍ ഹോമിനുള്ളില്‍ തന്നെ പരീക്ഷയെഴുതാന്‍ പോലീസ് സൗകര്യമൊരുക്കി.താമരശ്ശേരി സ്‌കൂളിലെത്തിച്ച് പ്രതികളെ പരീക്ഷയെഴുതിക്കാനായിരുന്നു ആദ്യത്തെ തീരുമാനം. താമരശ്ശേരിയിലേക്കു കൊണ്ടുചെന്നാല്‍ ഒരുകാരണവശാലും പരീക്ഷയെഴുതിക്കാനനുവദിക്കില്ലെന്ന് കെ.എസ്.യുവും യൂത്ത് കോണ്‍ഗ്രസും നിലപാടെടുത്തു.ഈ സാഹചര്യത്തില്‍ ജുവനൈല്‍ ഹോമിനടുത്തുള്ള ഏതെങ്കിലും സ്‌കൂളുകളില്‍ പരീക്ഷയെഴുതിക്കാന്‍ നീക്കമുണ്ടായി. എന്നാല്‍ മറ്റു വിദ്യാര്‍ത്ഥികളുടെ കൂടെ പരീക്ഷയെഴുതാന്‍ അനുവദിക്കില്ലെന്നറിയിച്ച് കെ.എസ്.യു. രംഗത്തെത്തി. രാവിലെ തന്നെ കെ.എസ്.യു. പ്രവര്‍ത്തകര്‍ ജുവനൈല്‍ ഹോമിനടുത്തേക്കു പ്രതിഷേധവുമായി എത്തിയിരുന്നു. ഇവരെ പോലീസ് തടഞ്ഞതോടെ സംഘര്‍ഷമുണ്ടായി. കെ.എസ്.യു. ജില്ലാ പ്രസിഡന്റ് വി.ടി. സൂരജ് ഉള്‍പ്പെടെയുള്ളവരെ അറസ്റ്റ് ചെയ്തു നീക്കി. പിന്നാലെ യൂത്ത് കോണ്‍ഗ്രസും എം.എസ്.എഫും പ്രതിഷേധവുമായെത്തി.പ്രവര്‍ത്തകര്‍ ജുവനൈല്‍ ഹോം പരിസരത്തേക്കു കടന്നു. പോലീസും പ്രവര്‍ത്തകരും തമ്മില്‍ സംഘര്‍ഷമുണ്ടായി. നിരവധി പേരെ അറസ്റ്റ് ചെയ്തു നീക്കി. ഇതിനിടെ ചോദ്യക്കടലാസും മറ്റു പരീക്ഷാസാമഗ്രികളും ജുവനൈല്‍ ഹോമിലേക്കെത്തിച്ചു.കുറ്റവാളികളെ സംരക്ഷിക്കാനാണ്…

മനാമ: ബഹ്‌റൈന്‍ നീതിന്യായ, ഇസ്ലാമിക കാര്യ, എന്‍ഡോവ്മെന്റ് മന്ത്രാലയത്തിലെ തുല്യ അവസര സമിതിയുടെ 2025ലെ ആദ്യ പതിവ് യോഗം ചേര്‍ന്നു.മന്ത്രാലയത്തിലെ കോടതികള്‍, കുടുംബ അനുരഞ്ജനം, ജീവനാംശം എന്നിവയുടെ അസിസ്റ്റന്റ് അണ്ടര്‍സെക്രട്ടറി ദന ഖമീസ് അല്‍ സയാനി അദ്ധ്യക്ഷത വഹിച്ചു. പരിശീലനം, സ്‌കോളര്‍ഷിപ്പുകള്‍, കരിയര്‍ പുരോഗതി, കമ്മിറ്റി അംഗത്വം എന്നിവയുള്‍പ്പെടെ വിവിധ പരിപാടികളിലൂടെ തുല്യ അവസരങ്ങള്‍ പ്രോത്സാഹിപ്പിക്കുന്ന നയമാണ് മന്ത്രാലയത്തിനുള്ളതെന്ന് അല്‍ സയാനി പറഞ്ഞു.ഭാവി പദ്ധതികള്‍ നടപ്പിലാക്കുന്നതിനായി സുപ്രീം കൗണ്‍സില്‍ ഫോര്‍ വിമനു(എസ്.സി.ഡബ്ല്യു)മായും സര്‍ക്കാര്‍ സ്ഥാപനങ്ങളുമായും ഏകോപിപ്പിച്ചുള്ള പരിപാടികളുടെ പുരോഗതി കമ്മിറ്റി ചര്‍ച്ച ചെയ്തു.മന്ത്രാലയത്തിലുടനീളം ലിംഗ സന്തുലിതാവസ്ഥയെ പിന്തുണയ്ക്കുന്ന പരിശീലന പരിപാടികള്‍ വര്‍ദ്ധിപ്പിക്കാനുള്ള നിര്‍ദ്ദേശവും യോഗം അവലോകനം ചെയ്തു.

മനാമ: ബഹ്‌റൈനില്‍ ഔഷധ സസ്യങ്ങളടക്കമുള്ള, നിക്കോട്ടില്‍ ഇല്ലാത്ത പുകവലി ബദലുകള്‍ നിരോധിക്കാനുള്ള ബില്ലിന് ശൂറ കൗണ്‍സില്‍ അംഗീകാരം നല്‍കി.ഈ ഉല്‍പ്പന്നങ്ങള്‍ വില്‍ക്കുന്നവര്‍ക്ക് ഒരു ലക്ഷം രൂപ വരെ പിഴയും ഒരു വര്‍ഷം തടവും വിധിക്കാന്‍ ബില്ലില്‍ വ്യവസ്ഥയുണ്ട്. ഇത്തരം വസ്തുക്കളുടെ ഇറക്കുമതിയോ വിതരണമോ നടത്തുന്ന സ്ഥാപനങ്ങള്‍ പിടിച്ചെടുക്കുകയോ മൂന്നു മാസം വരെ അടച്ചിടുകയോ ചെയ്യും.കഴിഞ്ഞ ഡിസംബറില്‍ പ്രതിനിധിസഭ ബില്ലിന് അംഗീകാരം നല്‍കിയിരുന്നു. ആരോഗ്യ പ്രത്യാഘാതങ്ങള്‍ കണക്കിലെടുത്താണ് നിയമനിര്‍മ്മാണം. ഇത്തരം ബദലുകള്‍ക്ക് പുകയിലയുടെ അത്രതന്നെ അപകടസാധ്യതകളുണ്ടെന്ന് ആരോഗ്യ മന്ത്രാലയം മുന്നറിയിപ്പ് നല്‍കിയിരുന്നു.

മനാമ: ബഹ്റൈനില്‍ ഈഴ്ചയുടെ മദ്ധ്യം മുതല്‍ അസ്ഥിരമായ കാലാവസ്ഥ അനുഭവപ്പെടുമെന്ന് ഗതാഗത, ടെലികമ്മ്യൂണിക്കേഷന്‍ മന്ത്രാലയത്തിന്റെ കാലാവസ്ഥാ ഡയറക്ടറേറ്റ് അറിയിച്ചു. മാര്‍ച്ച് 4 മുതല്‍ കാലാവസ്ഥാ മാറ്റം ആരംഭിക്കും. മാര്‍ച്ച് 9 വരെ ഇടയ്ക്കിടെ മഴ പെയ്യുമെന്നും പ്രവചിക്കപ്പെടുന്നു.മാര്‍ച്ച് 6 മുതല്‍, പ്രത്യേകിച്ച് ന്യൂനമര്‍ദ്ദം അടുക്കുമ്പോള്‍ ചിലയിടങ്ങളില്‍ ഇടിമിന്നലുണ്ടാകുമെന്ന് ഡയറക്ടറേറ്റിലെ ഒരു ഉദ്യോഗസ്ഥന്‍ പറഞ്ഞു. ഈ സാഹചര്യങ്ങള്‍ക്കൊപ്പം ശക്തമായ കാറ്റും ഉയര്‍ന്ന തിരമാലകളുമുണ്ടാകാം.കാലാവസ്ഥാ ബുള്ളറ്റിനുകള്‍ സംബന്ധിച്ച് അപ്ഡേറ്റ് ആയിരിക്കാനും ജാഗ്രത പാലിക്കാനും സമുദ്ര പ്രവര്‍ത്തനങ്ങള്‍ ഒഴിവാക്കാനും കാലാവസ്ഥാ ഡയറക്ടറേറ്റ് പൊതുജനങ്ങളോട് നിര്‍ദ്ദേശിച്ചു. അപ്ഡേറ്റുകളും ഔദ്യോഗിക മുന്നറിയിപ്പുകളും ഇനിപ്പറയുന്ന ചാനലുകളിലൂടെ ആക്സസ് ചെയ്യാം:ഗതാഗത, ടെലികമ്മ്യൂണിക്കേഷന്‍ മന്ത്രാലയത്തിന്റെ ബഹ്റൈന്‍ വെതര്‍ മൊബൈല്‍ ആപ്പ്വെബ്സൈറ്റ്: www.bahrainweather.gov.bhഇന്‍സ്റ്റാഗ്രാം: @mtt_bahrainX: @WeatherBahrainഓട്ടോമേറ്റഡ് റെസ്പോണ്‍സ് സിസ്റ്റം: 17235235, 17236236

കാഞ്ഞങ്ങാട്: വാട്സാപ്പ് ശബ്ദസന്ദേശത്തിലൂടെ മൊഴിചൊല്ലിയെന്ന യുവതിയുടെ പരാതിയില്‍ ഭര്‍ത്താവിനെതിരെ പോലീസ് കേസെടുത്തു.കല്ലൂരാവിയിലെ സി.എച്ച്. നുസൈബ (21) ഭര്‍ത്താവായ കാസര്‍കോട് നെല്ലിക്കട്ട സ്വദേശിക്കെതിരെ നല്‍കിയ പരാതിയിലാണ് ഹോസ്ദുര്‍ഗ് പോലീസ് കേസെടുത്തത്. മുത്തലാഖ് നിരോധന നിയമം (മുസ്ലിം സ്ത്രീ വിവാഹസംരക്ഷണം-2019) പ്രാബല്യത്തില്‍ വന്ന ശേഷം പോലീസിന് ലഭിക്കുന്ന ജില്ലയിലെ ആദ്യ പരാതിയാണിത്. സ്ത്രീധന പീഡന നിരോധന നിയമപ്രകാരം ഭര്‍തൃമാതാവ്, ഭര്‍തൃസഹോദരി എന്നിവര്‍ക്കെതിരെയും കേസെടുത്തിട്ടുണ്ട്.വിദേശത്തുള്ള ഭര്‍ത്താവ് തന്നെ മൂന്നുതവണ തലാഖ് ചൊല്ലിയെന്നു പറഞ്ഞ് കഴിഞ്ഞ മാസം 21ന് തന്റെ പിതാവിന്റെ ഫോണില്‍ ശബ്ദസന്ദേശം അയയ്ക്കുകയായിരുന്നെന്നാണ് പരാതി. 2022 ഓഗസ്റ്റ് എട്ടിനാണ് ഇവരുടെ വിവാഹം നടന്നത്. തുടര്‍ന്ന് കാഞ്ഞങ്ങാട് നഗരസഭയില്‍ മുസ്ലിം മതാചാരപ്രകാരം വിവാഹം റജിസ്റ്റര്‍ ചെയ്തു.വിവാഹം കഴിഞ്ഞ് ആറുമാസത്തിനു ശേഷം സ്ത്രീധനം പോരെന്നു പറഞ്ഞ് ഭര്‍ത്താവും ഭര്‍തൃവീട്ടുകാരും പീഡിപ്പിക്കുകയായിരുന്നെന്നും വിവാഹസമയത്ത് അണിഞ്ഞിരുന്ന 20 പവന്‍ ആഭരണങ്ങള്‍ ഭര്‍ത്താവ് വിറ്റെന്നും പരാതിയില്‍ പറയുന്നു. വിവാഹനിശ്ചയ സമയത്ത് 50 പവന്‍ ആവശ്യപ്പെട്ടിരുന്നെന്നും ബാക്കി സ്വര്‍ണം നല്‍കണമെന്നാവശ്യപ്പെട്ടാണ് നിരന്തര പീഡനമുണ്ടായതെന്നും…

മേപ്പാടി: വയനാട്ടിലെ മേപ്പാടിയില്‍ തേയിലത്തോട്ടത്തിലെ കേബിള്‍ കെണിയില്‍ കുടുങ്ങിയ പുള്ളിപ്പുലിയെ മയക്കുവെടിവെച്ച് പിടികൂടി കൂട്ടിലാക്കി.ഇന്ന് രാവിലെ 9 മണിയോടെയാണ് മേപ്പാടി നെടുമ്പാല മൂന്നാം നമ്പര്‍ മയ്യത്തുംകരയില്‍ കെണിയില്‍ കുടുങ്ങിയ നിലയില്‍ പുലിയെ നാട്ടുകാര്‍ കണ്ടെത്തിയത്. ഉടന്‍ വനംവകുപ്പ് അധികൃതരെ വിവരമറിയിച്ചു. വനംവകുപ്പ് ജീവനക്കാര്‍ സ്ഥലത്തെത്തി പുള്ളിപ്പുലിയെ കൂട്ടിലാക്കി.

താമരശ്ശേരി: താമരശ്ശേരിയില്‍ പത്താം ക്ലാസ് വിദ്യാര്‍ത്ഥി ഷഹബാസിനെ കൊലപ്പെടുത്തിയ സംഭവത്തില്‍ പോലീസ് കൂടുതല്‍ തെളിവുകള്‍ കണ്ടെത്തി.ഷഹബാസിനെ കൊലപ്പെടുത്താനുപയോഗിച്ച നഞ്ചക്ക് പ്രതികളിലൊരാളുടെ വീട്ടില്‍നിന്ന് കണ്ടെത്തി. നഞ്ചക്കുകൊണ്ടുള്ള അടിയില്‍ തലയോട്ടി പൊട്ടിയതാണ് മരണകാരണമായി പോസ്റ്റ്‌മോര്‍ട്ടം റിപ്പോര്‍ട്ടില്‍ പറയുന്നത്. കൂടാതെ നാലു മൊബൈല്‍ ഫോണുകളും ഒരു ലാപ്‌ടോപ്പും പ്രതികളുടെ വീടുകളില്‍നിന്ന് പോലീസ് കസ്റ്റഡിയിലെടുത്തു. കൊലയുമായി ബന്ധപ്പെട്ട കാര്യങ്ങള്‍ക്ക് ഇവ ഉപയോഗിച്ചെന്നു കരുതുന്നതായി പോലീസ് അറിയിച്ചു. പിടിച്ചെടുത്ത ഫോണുകളില്‍ കൊലപാതകം ആസൂത്രണം ചെയ്തതിന്റെ ശബ്ദസന്ദേശങ്ങളടങ്ങുന്ന കൂടുതല്‍ തെളിവുകളുണ്ടെന്നും പോലീസ് പറയുന്നു.കേസില്‍ പ്രതികളായ അഞ്ചു വിദ്യാര്‍ത്ഥികളുടെ വീടുകളില്‍ പോലീസ് ഇന്നു നടത്തിയ പരിശോധനയിലാണ് ഇവ കണ്ടെടുത്തത്.വിവിധ സംഘങ്ങളായി തിരിഞ്ഞ് ഒരേ സമയം നടത്തിയ പരിശോധനയിലാണ് ആക്രമണത്തിനുപയോഗിച്ച ആയുധവും ഫോണുകളും കണ്ടെത്തിയത്. കൂടുതല്‍ പ്രതികള്‍ കേസില്‍ ഉള്‍പ്പെട്ടിട്ടുണ്ടോ എന്നറിയാനായി വിശദമായ സി.സി.ടി.വി. പരിശോധനയും നടക്കുന്നുണ്ട്. ആക്രമണം നടത്താന്‍ വാട്സാപ്, ഇന്‍സ്റ്റഗ്രാം ഗ്രൂപ്പുകള്‍ വിദ്യാര്‍ത്ഥികള്‍ ഉണ്ടാക്കിയിരുന്നു. ഇതിനായി ഉപയോഗിച്ച ഫോണുകളാണ് കണ്ടെത്തിയതെന്നറിയുന്നു. കൂടുതല്‍ പരിശോധന നടക്കുകയാണ്.പ്രതികളെ എസ്.എസ്.എല്‍.സി. പരീക്ഷ എഴുതിക്കാന്‍ താമരശ്ശേരിയില്‍…

മനാമ: ബഹ്റൈനിലെ ഹമദ് ടൗണിലെ സൈനല്‍ പള്ളി സുന്നി എന്‍ഡോവ്മെന്റ് കൗണ്‍സില്‍ ചെയര്‍മാന്‍ ഷെയ്ഖ് ഡോ. റാഷിദ് ബിന്‍ മുഹമ്മദ് ബിന്‍ ഫുത്തൈസ് അല്‍ ഹജേരി ഉദ്ഘാടനം ചെയ്തു.രാജ്യത്തുടനീളം സുന്നി, ജാഫാരി എന്‍ഡോവ്മെന്റ് ഡയറക്ടറേറ്റുകള്‍ക്ക് കീഴിലുള്ള 40 പള്ളികള്‍ തുറക്കാനും നവീകരിക്കാനും പുനഃസ്ഥാപിക്കാനുമുള്ള, കിരീടാവകാശിയും പ്രധാനമന്ത്രിയുമായ സല്‍മാന്‍ ബിന്‍ ഹമദ് അല്‍ ഖലീഫ രാജകുമാരന്റെ നിര്‍ദ്ദേശപ്രകാരമാണിത്.രാജാവ് ഹമദ് ബിന്‍ ഈസ അല്‍ ഖലീഫയുടെ നേതൃത്വത്തില്‍ പള്ളികള്‍ നിര്‍മ്മിക്കുന്നതിലും പരിപാലിക്കുന്നതിലും രാജ്യം തുടര്‍ച്ചയായ ശ്രമങ്ങള്‍ നടത്തുന്നുണ്ടെന്ന് ഷെയ്ഖ് ഡോ. അല്‍ ഹജേരി പറഞ്ഞു. എല്ലാ ഗവര്‍ണറേറ്റുകളിലുമുള്ള പള്ളികളുടെ വികസനം ഉറപ്പാക്കുന്നതില്‍ കിരീടാവകാശി പിന്തുണ നല്‍കുന്നുണ്ടെന്നും അദ്ദേഹം പറഞ്ഞു.1,076 ചതുരശ്ര മീറ്റര്‍ വിസ്തീര്‍ണ്ണമുള്ള ഈ പള്ളിയില്‍ 400 പേര്‍ക്ക് പ്രാര്‍ത്ഥന നടത്താന്‍ സൗകര്യമുണ്ട്. പുരുഷന്മാര്‍ക്കും സ്ത്രീകള്‍ക്കും വേണ്ടിയുള്ള പ്രാര്‍ത്ഥനാ സ്ഥലങ്ങള്‍, പാര്‍ക്കിംഗ് സൗകര്യങ്ങള്‍, അവശ്യ സൗകര്യങ്ങള്‍ എന്നിവയുമുണ്ട്.

മനാമ: ബഹ്‌റൈനില്‍ കെട്ടിടനിര്‍മ്മാണച്ചെലവ് കുതിച്ചുയരുന്നതിനും ക്വാറികള്‍ അടച്ചുപൂട്ടിക്കൊണ്ടിരിക്കുന്നതിനും പരിഹാരം കണ്ടെത്തുന്നതിനെക്കുറിച്ച് പാര്‍ലമെന്റ് ചര്‍ച്ച ചെയ്യും. പരിഹാരത്തിനുള്ള പദ്ധതി ആവിഷ്‌കരിക്കാന്‍ എം.പിമാര്‍ സര്‍ക്കാരില്‍ സമ്മര്‍ദം ചെലുത്തും.ചൊവ്വാഴ്ച പാര്‍ലമെന്റില്‍ നടക്കുന്ന ചര്‍ച്ചയ്ക്ക് ഹസ്സന്‍ ഇബ്രാഹിം എം.പി. തുടക്കം കുറിക്കും. മറ്റു ഗള്‍ഫ് രാജ്യങ്ങളില്‍നിന്ന് ബഹ്‌റൈന്‍ തുറമുഖങ്ങള്‍ വഴി നിര്‍മ്മാണസാമഗ്രികള്‍ കൊണ്ടുവരുന്നതിനെക്കുറിച്ചും ചര്‍ച്ച ചെയ്യും.നിര്‍മ്മാണച്ചെലവ് സ്ഥിരമായി നിലനിര്‍ത്താന്‍ മറ്റു ഗള്‍ഫ് രാജ്യങ്ങളുമായുള്ള ദീര്‍ഘകാല വിതരണ കരാറുകള്‍, മസായ പദ്ധതി ഉള്‍പ്പെടെയുള്ള ഭവനപദ്ധതികളുടെ ഭാവി തുടങ്ങിയ വിഷയങ്ങളും ചര്‍ച്ച ചെയ്യുമെന്ന് എം.പിമാര്‍ വ്യക്തമാക്കി.