മനാമ: സെന്റര് ഫോർ ഇൻഫർമേഷൻ ആൻഡ് ഗൈഡൻസ് ഇന്ത്യ ( സിജി) ബഹ്റൈൻ ചാപ്റ്റർ ആ ഭിമുഖ്യത്തിൽ നടന്നു വരുന്ന പ്രസംഗ പരിശീലന പരിപാടി ശ്രദ്ധേയമായ പുതിയ ചുവടുകളിലേക്ക്. 24 ആഴ്ചകൾ പിന്നിട്ട ഈ സൗജന്യ പരിശീലന പരിപാടി ഇതിനകം നൂറോളം പേര് പ്രയോജനപ്പെടുത്തി. സദസ്സിനെ അഭിമുഖീകരിക്കുന്നതിനുള്ള ഭയത്തെ വൺ ടു വൺ ശൈലിയിലൂടെ മാറ്റിയെടുത്ത് ആത്മ വിശ്വാസം നേടുവാനുള്ള ലക്ഷ്യം എല്ലാവരും നേടി എന്നതാണ് ഈ സൗജന്യ പരിപാടിയെ വേറിട്ട് നിർത്തുന്നത്.
വിവിധ ടോസ്റ് മാസ്റ്റർ സംഘടനകൾ പ്രതിമാസ വരിസംഖ്യ ഉൾപ്പെടെ ഈടാക്കുന്ന ഇത്തരം പരിശീലനങ്ങൾ എല്ലാവരിലേക്കും സൗജന്യമായി എത്തിക്കുന്ന നടപടികൾ ആണ് സിജി ബഹ്റൈൻ ഏറ്റെടുത്ത് നടത്തുന്നത്. ബഹ്റൈനിലെ നിറവധി സാംസ്കാരിക -സാമൂഹിക പ്രവർത്തകർ ക്ലാസ്സിൽ പങ്കെടുത്ത് ഉപദേശ നിർദേശങ്ങൾ നൽകാറുണ്ട്.
പ്രസംഗ പരിശീലനം ഒന്നാം ഘട്ടം സർട്ടിഫിക്കറ്റ് വിതരണം ഉടൻ നടക്കും. പുതുതായി ഡിബേറ്റ് പരിശീലന പരിപാടി ആരംഭിക്കും. ആനുകാലിക പുസ്തക പരിചയമാണ് ഇതോടൊപ്പമുള്ള മറ്റൊരു പരിപാടി. ടി.ടി. ഉണ്ണികൃഷ്ണൻ, രവി മാരാത്ത് എന്നിവർ രക്ഷാധികാരികൾ ആണ്. നിസാർ കൊല്ലം (മുഖ്യ ഉപദേശകൻ) യൂസഫ് അലി ,ഹുസൈൻ ,സജീർ (കോ-ഓർഡിനേറ്റർമാർ ) .ഫാസിൽ താമരശ്ശേരി (മെന്റർ), യാസിർ, അഷ്റഫ്, റഷീദ് ( വേദി) എന്നിവർ നേതൃത്വം നൽകുന്നു.
പുതിയ ബാച്ചിന്റെ പരിശീലന പരിപാടിയിൽ പങ്കെടുക്കാൻ താല്പര്യം ഉള്ളവർ സിജി ബഹ്റൈൻ ചെയർമാൻ ഷിബു (39810210 ), വൈസ് ചെയർമാൻ യൂസഫ് അലി(33313710 ) എന്നിവരുമായി ബന്ധപ്പെടണം.