സുൽത്താൻപൂർ: 2018-ൽ അന്നത്തെ ബി.ജെ.പി ദേശീയ അധ്യക്ഷൻ അമിത് ഷായെക്കുറിച്ച് നടത്തിയ പരാമർശവുമായി ബന്ധപ്പെട്ട ക്രിമിനൽ മാനനഷ്ടക്കേസിൽ കോൺഗ്രസ് നേതാവും ലോക്‌സഭാ പ്രതിപക്ഷ നേതാവുമായ രാഹുൽ ഗാന്ധിയെ സുൽത്താൻപൂരിലെ പ്രത്യേക എം.പി–എം.എൽ.എ കോടതി കുറ്റവിമുക്തനാക്കി. തിങ്കളാഴ്ച കോടതിയിൽ നേരിട്ട് ഹാജരായ രാഹുലിനെ കുറ്റക്കാരനല്ലെന്ന് കോടതി വിധിച്ചതായും അദ്ദേഹത്തിന്റെ പരാമർശങ്ങൾ മാനനഷ്ടമല്ലെന്ന് വിലയിരുത്തിയതായും റിപ്പോർട്ടുകൾ പറയുന്നു.
2018-ലെ കർണാടക നിയമസഭാ തിരഞ്ഞെടുപ്പിന് മുന്നോടിയായി ബെംഗളൂരുവിൽ നടത്തിയ പരാമർശങ്ങളാണ് കേസിന് ആധാരം. ബി.ജെ.പിയെ നയിക്കുന്നത് കൊലക്കേസിൽ പ്രതിയായ ഒരാളാണെന്ന് രാഹുൽ പറഞ്ഞുവെന്നായിരുന്നു പരാതി. 2005-ലെ സൊഹ്റാബുദ്ദീൻ ഷെയ്ഖ് വ്യാജ ഏറ്റുമുട്ടൽ കേസുമായി ബന്ധപ്പെട്ട പരാമർശമാണിതെന്ന് പരാതിക്കാരനായ ബി.ജെ.പി നേതാവ് വിജയ് മിശ്ര ആരോപിച്ചിരുന്നു. 2014-ൽ മുംബൈയിലെ പ്രത്യേക സി.ബി.ഐ കോടതി അമിത് ഷായെ കേസിൽനിന്ന് ഒഴിവാക്കിയിരുന്നു.
2018 ഓഗസ്റ്റിലാണ് വിജയ് മിശ്ര ക്രിമിനൽ മാനനഷ്ടക്കേസ് ഫയൽ ചെയ്തത്. കേസിൽ രാഹുൽ ഗാന്ധി ആരോപണങ്ങൾ നിഷേധിക്കുകയും തന്റെ പരാമർശങ്ങൾ സന്ദർഭത്തിൽനിന്ന് അടർത്തിയെടുത്തതാണെന്ന് വാദിക്കുകയും ചെയ്തു. വാദം പൂർത്തിയായതിനെ തുടർന്ന് ആദ്യം ഒക്ടോബർ 13ന് വിധി പറയാനിരുന്ന കോടതി, പിന്നീട് ഒക്ടോബർ 26ലേക്ക് മാറ്റുകയായിരുന്നു.