മനാമ: ഇന്ത്യൻ ക്ലബ് ബഹ്റൈനിന്റെ ആഭിമുഖ്യത്തിൽ എല്ലാ വർഷവും നടത്തിവരാറുള്ള ഏറെ ശ്രദ്ധേയമായ സൗന്ദര്യ മത്സരം മെയ് ക്വീൻ 2023 മെയ് 26 ന് വെള്ളിയാഴ്ച ഇന്ത്യൻ ക്ലബ്ബ് ഗ്രൗണ്ടിൽ വെച്ച് നടക്കുമെന്ന് ഭാരവാഹികൾ അറിയിച്ചു. ഏപ്രിൽ 10 ന് ഔദ്യോഗികമായി മെയ് ക്വീൻ 2023 ലോഞ്ച് ചെയ്തു. ബഹ്റൈനിൽ താമസിക്കുന്ന 17 നും 28 നും ഇടയിൽ പ്രായമുള്ള എല്ലാ അവിവാഹിതരായ സ്ത്രീകൾക്കും മത്സരത്തിലേക്കുള്ള പ്രവേശനം ലഭ്യമാണ്.
ബഹ്റൈൻ, ഇന്ത്യ, യുണൈറ്റഡ് കിംഗ്ഡം, യുഎസ്എ, നെതർലാൻഡ്സ്, റഷ്യ, ശ്രീലങ്ക, ഫ്രാൻസ്, ഫിലിപ്പീൻസ് തുടങ്ങി വിവിധ രാജ്യങ്ങളിൽ നിന്നുള്ള മത്സരാർത്ഥികൾ വർഷങ്ങളായി മത്സരത്തിൽ പങ്കാളികളാണ്. ഷോർട്ട്ലിസ്റ്റ് ചെയ്ത മത്സരാർത്ഥികളെ ആത്മവിശ്വാസവും ശൈലിയും വളർത്തുന്നതിനായി ഇന്ത്യൻ ക്ലബ് പരിസരത്ത് ഗ്രൂമിംഗ് സെഷനുകൾക്ക് വിധേയമാക്കും.
മെയ് ക്വീൻ 2023 നെ കൂടാതെ ഫസ്റ്റ് റണ്ണറപ്പ്, സെക്കന്റ് റണ്ണറപ്പ്, മികച്ച വസ്ത്രവിധാനം, മികച്ച ഹെയർ സ്റ്റൈൽ, മികച്ച പുഞ്ചിരി എന്നിവയ്ക്കും വെവ്വേറെ സമ്മാനവും ക്യാഷ് അവാർഡുകളും നൽകും. വിജയികൾക്ക് പണം, ആഭരണങ്ങൾ, വിമാന ടിക്കറ്റുകൾ, ഫാഷൻ ആക്സസറികൾ, ഗിഫ്റ്റ് ഹാംപറുകൾ എന്നിവയുൾപ്പെടെ ആകർഷകമായ സമ്മാനങ്ങൾ ലഭിക്കും. മെയ് ക്വീൻ 2023 ന്റെ ആകെ സമ്മാനത്തുക 5000 യുഎസ് ഡോളറായിരിക്കും.
കാഷ്വൽ വെയർ, എത്നിക് വെയർ, പാർട്ടി വെയർ, ചോദ്യോത്തര സെഷൻ എന്നിങ്ങനെ നാല് റൗണ്ടുകളിലായാണ് മത്സരം നടക്കുക. നാല് റൗണ്ടുകളിൽ നടക്കുന്ന മത്സരത്തിൽ ആദ്യ റൗണ്ടിൽ അതതു രാജ്യത്തിന്റെ തനതായ വേഷവിധാനങ്ങളും ചമയങ്ങളുമാണ് ധരിക്കേണ്ടത്. രണ്ടാം റൗണ്ടിൽ കാഷ്വൽ വെയറും, മൂന്നാം റൗണ്ടിൽ പാർട്ടി വെയറും ധരിക്കണം. നാലാം റൗണ്ട് ചോദ്യോത്തര സെഷനാണ്. വിധികർത്താക്കളുടെ ചോദ്യങ്ങൾക്ക് മത്സരാർത്ഥികൾ ഉത്തരം നൽകണം. ആദ്യത്തെ മൂന്നു റൗണ്ടുകളുടെ പ്രകടനവും നാലാം റൗണ്ടിലെ ചോദ്യോത്തര സെഷനുകളും ചേർത്തുള്ള പ്രകടനത്തിൽ നിന്നാണ് വിജയിയെ തെരഞ്ഞെടുക്കുന്നത്.
ഇന്ത്യൻ ക്ലബ് മെയ് ക്യൂൻ 2023 ന്റെ രജിസ്ട്രേഷൻ 2023 മെയ് 15 ന് അവസാനിക്കും. ഇന്ത്യൻ ക്ലബ് മെയ് ക്വീൻ 2023 നെക്കുറിച്ചുള്ള കൂടുതൽ വിവരങ്ങൾക്ക്, ക്ലബ്ബിന്റെ വിനോദ സെക്രട്ടറി ആർ. സെന്തിൽ കുമാറിനെ 33340494 എന്ന നമ്പറിലോ ജനറൽ സെക്രട്ടറി സതീഷ് ഗോപിനാഥനെ 34330835 എന്ന നമ്പരിലോ പ്രസിഡന്റ് കെ.എം. ചെറിയാൻ 39427425 എന്ന നമ്പരിലോ അല്ലെങ്കിൽ ജനറൽ കൺവീനർ സന്തോഷ് തോമസിനെ 33005413 എന്ന നമ്പരിലോ ബന്ധപ്പെടാം.