മനാമ: ബഹറൈനിലെ പുതിയ ലുലു ഹൈപ്പർമാർക്കറ്റ് മനാമ സെൻ്ററിൽ പ്രവർത്തനം ആരംഭിച്ചു. ബഹറൈൻ സുന്നി വഖഫ് കൗൺസിൽ ചെയർമാൻ ശൈഖ് റാഷിദ് മുഹമ്മദ് ഫത്തീസ് സാലിം അൽ ഹാജിരിയാണ് ലുലു ഗ്രൂപ്പിൻ്റെ ബഹ്റൈനിലെ പതിനൊന്നാമത്തെ ഹൈപ്പർമാർക്കറ്റ് ഉദ്ഘാടനം നിർവ്വഹിച്ചത്.
വ്യവസായ വാണിജ്യ മന്ത്രാലയം അണ്ടർസെക്രട്ടറി ഇമാൻ അഹമ്മദ് അൽ-ദോസെരി, ബഹറൈനിലെ ഇന്ത്യൻ അംബാസിഡർ വിനോദ് ജേക്കബ്, ലുലു ഗ്രൂപ്പ് ചെയർമാൻ എം. എം യൂസഫലി, ലുലു ബഹറൈൻ ഡയറക്ടർ ജൂസർ രൂപാവാല, മറ്റ് പ്രമുഖർ ഉൾപ്പെടെ ഉദ്ഘാടന ചടങ്ങിൽ സംബന്ധിച്ചു.
55,000 ചതുരശ്രയടി വിസ്തീർണ്ണത്തിലുള്ള ഹൈപ്പർ മാർക്കറ്റിൽ ഉപഭോക്താക്കൾക്കായി മികച്ച ഷോപ്പിംഗ് അനുഭവമാണ് ലുലു ഒരുക്കിയിട്ടുള്ളത്. അടുത്ത വർഷം ബഹറൈനിൽ രണ്ട് പുതിയ ഹൈപ്പർ മാർക്കറ്റുകൾ കൂടി തുറക്കുമെന്ന് ലുലു ഗ്രൂപ്പ് ചെയർമാൻ എം.എ. യൂസഫലി പറഞ്ഞു.
മനാമ സെൻ്ററിലെ ഹൈപ്പർ മാർക്കറ്റ് ആരംഭിക്കുവാൻ എല്ലാ സൗകര്യങ്ങളും പിന്തുണയും നൽകിയ ബഹറൈൻ വഖഫ് കൗൺസിലിനും യൂസഫലി നന്ദി അറിയിച്ചു. നേതൃത്വത്തിന്റെ സമഗ്രവും പുരോഗമനപരവുമായ കാഴ്ചപ്പാട്, ബിസിനസ് സൗഹൃദ സാമ്പത്തിക അന്തരീക്ഷം, ഉപഭോക്താക്കളെ എല്ലാറ്റിനും ഉപരിയായി ഉയർത്തുന്ന ലുലു സേവന മാതൃക ഉൾക്കൊള്ളാനുള്ള ബഹ്റൈൻ ജീവനക്കാരുടെ കഴിവ് എന്നിവയാണ് ബഹ്റൈനിലെ തങ്ങളുടെ വളർച്ചയെ ശക്തിപ്പെടുത്തുന്നതെന്ന് അദ്ദേഹം പറഞ്ഞു.
ആഗോളതലത്തിൽ ലുലു ഗ്രൂപ്പിൻ്റെ 261-മത്തെ ഹൈപ്പർമാർക്കറ്റാണ് ഇത്.