തിരുവനന്തപുരം: സംസ്ഥാനത്ത് മടങ്ങിയെത്തിയ ഗവര്ണര് ആരിഫ് മുഹമ്മദ് ഖാനെതിരെ വീണ്ടും കരിങ്കൊടി പ്രതിഷേധം. തിരുവനന്തപുരം പാളയം ജനറല് ആശുപത്രി ജങ്ഷന് സമീപത്ത് വെച്ചാണ് എസ്എഫ്ഐ പ്രവര്ത്തകര് കരിങ്കൊടി പ്രതിഷേധം നടത്തിയത്. നാലുപ്രവര്ത്തകരെ പോലീസ് കസ്റ്റഡിയിലെടുത്തു. തിരുവനന്തപുരം വിമാനത്താവളത്തില് നിന്ന് രാജ്ഭവനിലേക്ക് ഗവര്ണര് പോകും വഴിയാണ് പ്രതിഷേധമുണ്ടായത്. ആരിഫ് മുഹമ്മദ് ഖാന് ഗോ ബാക്ക് എന്ന് മുദ്രാവാക്യം വിളിച്ചാണ് എസ്എഫ്ഐ പ്രവര്ത്തകര് കരിങ്കൊടി കാണിച്ചത്. പുതിയ മന്ത്രിമാരുടെ സത്യപ്രതിജ്ഞാ ചടങ്ങിന് മുന്നോടിയായിട്ടാണ് ഗവര്ണര് ഡല്ഹിയില് നിന്ന് കേരളത്തിലേക്ക് മടങ്ങിയെത്തിയത്. വെള്ളിയാഴ്ച വൈകീട്ടാണ് സത്യപ്രതിജ്ഞ ചടങ്ങ്. മുഖ്യമന്ത്രിയും ഗവര്ണറും തമ്മിലുള്ള തര്ക്കം രൂക്ഷമായ സാഹചര്യത്തില് സത്യപ്രതിജ്ഞ ചടങ്ങ് മഞ്ഞുരുകലിന് വേദിയാകുമെന്ന വിലയിരുത്തലുകള്ക്കിടെയാണ് വീണ്ടും എസ്എഫ്ഐയുടെ പ്രതിഷേധമുണ്ടായിരിക്കുന്നത്.
വിമാനത്താവളത്തില് വെച്ച് മാധ്യമങ്ങളോട് സംസാരിച്ച ഗവര്ണര് എസ്എഫ്ഐ പ്രതിഷേധംതുടര്ന്നാല് താന് വാഹനത്തില് നിന്ന് ഇനിയും പുറത്തിറങ്ങുമെന്നടക്കം പറഞ്ഞിരുന്നു. നേരത്തെ തനിക്കുനേരെ നടന്ന പ്രതിഷേധത്തിലും വാഹനത്തിന് നേരെ നടന്ന അതിക്രമത്തിലും നടപടിയെടുക്കാത്തതിനേയും അദ്ദേഹം വിമര്ശിച്ചിരുന്നു. ഇതിന് തൊട്ടുപിന്നാലെയാണ് എസ്എഫ്ഐ പ്രവര്ത്തകര് കരിങ്കൊടി കാണിച്ചത്.
നേരത്തെയുണ്ടായ പ്രതിഷേധങ്ങള്ക്കൊടുവില് തെരുവില് ഇറങ്ങി നടന്നതടക്കം നാടകീയ നീക്കങ്ങള് സൃഷ്ടിച്ചാണ് ഗവര്ണര് ഡല്ഹിയിലേക്ക് വിമാനം കയറിയത്.