മനാമ: ആഗോളതലത്തിൽ പുതിയ വേരിയന്റുകളുടെ വ്യാപനത്തെത്തുടർന്ന് മുൻകരുതൽ നടപടിയായി ഫെബ്രുവരി 14 വരെ ബഹ്റൈൻ കോവിഡ്-19 യെല്ലോ അലർട്ട് ലെവലിൽ തുടരും. കഴിഞ്ഞ കുറച്ച് ദിവസങ്ങളായി കൊറോണ വൈറസ് അണുബാധയുടെ വർദ്ധനവ് പ്രതീക്ഷിക്കുന്നതായി ആരോഗ്യ മന്ത്രാലയം അണ്ടർ സെക്രട്ടറി ഡോ വലീദ് അൽ മനിയ പറഞ്ഞു. എന്നിരുന്നാലും, അതീവ ജാഗ്രത പാലിക്കണമെന്നും വ്യാപനം നേരിടാൻ പൊതുജന അവബോധം അത്യന്താപേക്ഷിതമാണെന്നും അദ്ദേഹം അറിയിച്ചു. പരിശോധനകൾ നടക്കുന്നുണ്ടെന്നും നിയമം ലംഘിക്കുന്നവർക്കെതിരെ കർശന നടപടികൾ ആരംഭിക്കുമെന്നും മുന്നറിയിപ്പ് നൽകി.
നിലവിൽ തീവ്രപരിചരണ വിഭാഗത്തിലെ (ഐസിയു) കേസുകളുടെ ശരാശരി അനുസരിച്ചാണ് അലേർട്ട് ലെവൽ പ്രഖ്യാപിക്കുന്നത്. പുതുക്കിയ പ്രോട്ടോക്കോളുകൾ അനുസരിച്ച്, 14 ദിവസത്തേക്ക് ഐസിയുവിൽ പോസിറ്റീവ് കേസുകൾ ശരാശരി 50 അല്ലെങ്കിൽ അതിൽ കുറവാണെങ്കിൽ, അത് ഗ്രീൻ ലെവലാണ്. ഏഴ് ദിവസത്തേക്ക് ഇത് 51 മുതൽ 100 വരെയാണെങ്കിൽ, രാജ്യം മഞ്ഞ നിലയിലേക്ക് നീങ്ങും. 101 മുതൽ 200 വരെ ആളുകൾ നാല് ദിവസത്തേക്ക് ഐസിയുവിലാണെങ്കിൽ ഓറഞ്ചും 201 അല്ലെങ്കിൽ അതിൽ കൂടുതൽ കേസുകൾ മൂന്ന് ദിവസത്തേക്ക് ഗുരുതരമായ പരിചരണത്തിലാണെങ്കിൽ ചുവപ്പും നടപ്പിലാക്കും. ഐസിയുവിലെ കേസുകൾ നിലവിൽ 15-ൽ താഴെയാണെങ്കിലും, അണുബാധയുടെ വർദ്ധനവ് കാരണം മുൻകരുതൽ നടപടിയായി മഞ്ഞ ലെവൽ നടപ്പിലാക്കിയിട്ടുണ്ട്.
ബിഅവെയർ ബഹ്റൈൻ (BeAware Bahrain) ആപ്ലിക്കേഷനിൽ പച്ച ഷീൽഡ് ഉള്ള വ്യക്തികൾക്ക് ഏഴ് ദിവസത്തെ ക്വാറന്റൈനുശേഷം പിസിആർ ടെസ്റ്റ് ഇല്ലാതെ തന്നെ ക്വാറന്റൈനിൽ നിന്ന് പുറത്തിറങ്ങാം. വാക്സിനേഷൻ എടുക്കാത്ത, അല്ലെങ്കിൽ ആപ്പിൽ മഞ്ഞയോ ചുവപ്പോ ഷീൽഡ് കൈവശം വെച്ചിരിക്കുന്നവർ, അണുബാധയുണ്ടായ തീയതി മുതൽ 10 ദിവസത്തേക്ക് സമ്പർക്ക വിലക്കിൽ കഴിയണം. 10 ദിവസത്തിനുശേഷം ടെസ്റ്റ് നടത്താതെ തന്നെ സമ്പർക്ക വിലക്കിൽ നിന്ന് മോചിതരാകാം.
രോഗലക്ഷണങ്ങൾ അനുഭവപ്പെടുകയാണെങ്കിൽ ആർ.ടി.പി.സി.ആർ ടെസ്റ്റ് എടുക്കേണ്ടത് പ്രധാനമാണ്. ഇത് പ്രാരംഭ ഘട്ടത്തിൽ തന്നെ വൈറസ് കണ്ടെത്തുന്നതിനും സമ്പർക്കത്തിലായവരെ ഒറ്റപ്പെടുത്തുന്നതിനും സഹായിക്കും. ഇത് രാജ്യത്ത് സജീവമായ കേസുകളുടെ എണ്ണം കുറയ്ക്കുന്നതിന് സഹായിക്കും.