ന്യൂഡൽഹി: രാജ്യത്ത് കഴിഞ്ഞ 24 മണിക്കൂറിനുള്ളില്‍ 8,488 പേര്‍ക്ക് കൂടി കോവിഡ് സ്ഥിരീകരിച്ചു. 2020 മാര്‍ച്ചിനു ശേഷം ഇതാദ്യമായാണ് പ്രതിദിന രോഗബാധിതരുടെ എണ്ണം ഇത്രയും കുറയുന്നത്. 249 മരണം കൂടി റിപ്പോര്‍ട്ട് ചെയ്തു. 12,510 പേര്‍ ഇന്നലെ രോഗമുക്തരായി.
പുതിയ രോഗികളില്‍ 5,080 പേരും കേരളത്തിലാണ്. രോഗമുക്തരില്‍ 7,908 പേരും മരണത്തില്‍ 40 എണ്ണവും സംസ്ഥാനത്ത് റിപ്പോര്‍ട്ട് ചെയ്യുന്നു. നിലവില്‍ 1,18,443 സജീവ രോഗികളുണ്ട്. 534 ദിവസത്തിനുള്ളിലെ കുറഞ്ഞ എണ്ണമാണിത്. ആകെ രോഗികളില്‍ 0.34% ആണ് സജീവ രോഗികള്‍.
ഇതുവരെ 63 കോടിയിലേറെ കോവിഡ് സാംപിള്‍ ടെസ്റ്റുകള്‍ നടത്തി. ഇന്നലെ മാത്രം 7,83,567 ടെസ്റ്റുകളാണ് നടത്തിയതെന്ന് ഐ.സി.എം.ആര്‍ വ്യക്തമാക്കി. കോവിഡ് രൂക്ഷമായിരുന്ന സമയത്ത് നടത്തിയിരുന്നതിന്റെ മൂന്നിലൊന്ന് ടെസ്റ്റുകള്‍ മാത്രമാണ് നിലവില്‍ നടക്കുന്നത്.
