മനാമ: രാജാവ് ഹമദ് ബിൻ ഈസ അൽ ഖലീഫയുടെ നിർദ്ദേശപ്രകാരം ബഹ്റൈനിൽ നിന്ന് അഫ്ഗാനിസ്ഥാനിലേക്ക് അടിയന്തര സഹായങ്ങൾ അയച്ചു. മെഡിക്കൽ സപ്ലൈകളും ഭക്ഷ്യവസ്തുക്കളും അടങ്ങിയ ആദ്യ കയറ്റുമതി ബഹ്റൈൻ അന്താരാഷ്ട്ര വിമാനത്താവളത്തിൽ രാജാവിന്റെ മാനുഷിക പ്രവർത്തനത്തിന്റെയും യുവജനകാര്യങ്ങളുടെയും പ്രതിനിധി ഷെയ്ഖ് നാസർ ബിൻ ഹമദ് അൽ ഖലീഫ പരിശോധിച്ചു. പ്രവർത്തനത്തിന്റെ മേൽനോട്ടം വഹിക്കാൻ ഹിസ് ഹൈനസ് ഷെയ്ഖ് നാസർ ബിൻ ഹമദ് അൽ ഖലീഫ അധ്യക്ഷനായ റോയൽ ഹ്യൂമാനിറ്റേറിയൻ ഫൗണ്ടേഷനെയാണ് (ആർഎച്ച്എഫ്) ചുമതലപ്പെടുത്തിയിട്ടുള്ളത്.
അന്താരാഷ്ട്ര ഐക്യദാർഢ്യം ഉറപ്പുവരുത്തുന്നതിനും ജനങ്ങൾ തമ്മിലുള്ള സാഹോദര്യ-മാനുഷിക ബന്ധം ശക്തിപ്പെടുത്തുന്നതിനുമുള്ള ബഹ്റൈനിന്റെ ശ്രമങ്ങളുടെ ഭാഗമായി ലോകമെമ്പാടുമുള്ള ദുരന്തബാധിതർക്കും ദുരിതബാധിതർക്കും വേണ്ടിയുള്ള രാജാവിന്റെ മാനുഷിക പദ്ധതികളെ ഷെയ്ഖ് നാസർ ബിൻ ഹമദ് അൽ ഖലീഫ പ്രശംസിച്ചു. കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫയുടെ അധ്യക്ഷതയിലുള്ള സർക്കാരിന്റെ പിന്തുണയെയും അദ്ദേഹം അഭിനന്ദിച്ചു. പ്രതിസന്ധിയിൽ അഫ്ഗാൻ ജനതക്കുള്ള ബഹ്റൈന്റെ മാനുഷിക പിന്തുണ അദ്ദേഹം ആവർത്തിച്ചു.
വിദേശകാര്യ മന്ത്രി ഡോ. അബ്ദുല്ലത്തീഫ് ബിൻ റാഷിദ് അൽ സയാനി രാജകീയ നിർദ്ദേശങ്ങളെ പ്രശംസിച്ചു. രാജകീയ നിർദ്ദേശങ്ങൾ നടപ്പിലാക്കുന്നതിൽ ഫൗണ്ടേഷനുമായി സഹകരിക്കുമെന്ന് അദ്ദേഹം പ്രഖ്യാപിച്ചു. വിദേശകാര്യ മന്ത്രാലയം, ആരോഗ്യ മന്ത്രാലയം, ബഹ്റൈൻ പ്രതിരോധ സേന എന്നിവയുമായി സഹകരിച്ചാണ് കയറ്റുമതി നടത്തിയത്.