ന്യൂഡൽഹി: ബലാത്സംഗത്തിന് ഇരയായ പതിനാറു വയസുള്ള പെൺകുട്ടി ഒരു കുഞ്ഞിന് ജന്മം നൽകി. ഉത്തര ഡൽഹിയിലാണ് സംഭവം. വീടിന്റെ ടെറസിൽ വച്ചായിരുന്നു പെൺകുട്ടി പ്രസവിച്ചത്. ഒക്ടോബർ 31ന് കുഞ്ഞ് ജനിച്ചതുമായി ബന്ധപ്പെട്ട് പൊലീസിന് പി സി ആർ കോൾ ലഭിക്കുകയായിരുന്നു.
ഇതിനെ തുടർന്ന് പൊലീസ് നടത്തിയ അന്വേഷണത്തിൽ ഉത്തര ഡൽഹിയിൽ തുണിയിൽ പൊതിഞ്ഞ നിലയിൽ ഒരു കുഞ്ഞിനെ കണ്ടെത്തുകയായിരുന്നു. എന്നാൽ കുഞ്ഞിനെക്കുറിച്ച് കൂടുതൽ വിവരങ്ങളൊന്നും ലഭ്യമല്ല. അതിനു ശേഷം പൊലീസ് പ്രദേശത്തെ സി സി ടി വി ഫൂട്ടേജുകൾ പരിശോധിക്കുകയായിരുന്നു.തുടർന്നു നടത്തിയ അന്വേഷണത്തിൽ പൊലീസ് പെൺകുട്ടിയെ കണ്ടെത്തി. ഏകദേശം എട്ട് – ഒമ്പത് മാസങ്ങൾക്ക് മുമ്പ് പെൺകുട്ടിയെ അറുപതു വയസുള്ളയാൾ ബലാത്സംഗം ചെയ്തിരുന്നു. എന്നാൽ, പേടി കാരണം അമ്മയോട് ഇക്കാര്യം വെളിപ്പെടുത്തിയില്ലെന്നും പെൺകുട്ടി പൊലീസിനോട് പറഞ്ഞു. വീട്ടു ജോലികൾ ചെയ്ത് കുടുംബം പുലർത്തുന്ന സ്ത്രീയാണ് പെൺകുട്ടിയുടെ അമ്മ.
