ന്യൂഡൽഹി: സ്റ്റാർലിങ്കിന്റെ ഇന്ത്യയിലെ സേവനാരംഭം വൈകുന്നതിനെച്ചൊല്ലിയുള്ള വിവാദത്തിൽ ഇലോൺ മസ്കിനെ വിമർശിച്ച് മാധ്യമപ്രവർത്തകൻ എസ്. ഗുരുമൂർത്തി. രാജ്യസുരക്ഷയുമായി ബന്ധപ്പെട്ട നിർണായക ആശയവിനിമയ മേഖലയിൽ മസ്കിനെ വിശ്വസിക്കാനാകുമോയെന്ന് അദ്ദേഹം ചോദിച്ചു. സമൂഹമാധ്യമമായ എക്സിലൂടെയായിരുന്നു പ്രതികരണം.
അമേരിക്കയിലെയും യൂറോപ്പിലെയും രാഷ്ട്രീയത്തിൽ മസ്ക് നടത്തിയ ഇടപെടലുകൾ ചൂണ്ടിക്കാട്ടിയ ഗുരുമൂർത്തി, അദ്ദേഹത്തിന്റെ പ്രവർത്തനങ്ങളിൽ വ്യവസായിയേക്കാൾ രാഷ്ട്രീയക്കാരനെയാണ് കാണുന്നതെന്ന് അഭിപ്രായപ്പെട്ടു. സ്റ്റാർലിങ്കിന്റെ പ്രവേശനം സംബന്ധിച്ച ചർച്ചയിൽ ദേശീയ സുരക്ഷയ്ക്കാണ് പ്രാധാന്യം നൽകേണ്ടതെന്നാണ് അദ്ദേഹത്തിന്റെ നിലപാട്.
താൻ മുകേഷ് അംബാനിയുടെ ആരാധകനല്ലെന്നും എന്നാൽ ഇവിടെ പരിഗണിക്കേണ്ടത് ഇന്ത്യയുടെ താൽപര്യമാണെന്നും ഗുരുമൂർത്തി വ്യക്തമാക്കി. ഇന്ത്യയിലെ രാഷ്ട്രീയത്തിൽ ഇടപെടുന്നുവെന്ന് മസ്കിനെ കുറ്റപ്പെടുത്തിയ അദ്ദേഹം, ഇത്തരം സാഹചര്യത്തിൽ നിർണായക ആശയവിനിമയ സംവിധാനങ്ങളിലേക്കുള്ള പ്രവേശനം വിശ്വാസത്തിന്റെ പ്രശ്നം കൂടിയാണെന്ന് വാദിച്ചു.
സ്റ്റാർലിങ്കിന്റെ സേവനാരംഭത്തിന് തടസ്സം സൃഷ്ടിക്കാൻ അംബാനി രാഷ്ട്രീയ സ്വാധീനം ഉപയോഗിക്കുന്നുവെന്ന മസ്കിന്റെ ആരോപണത്തിന് പിന്നാലെയാണ് പ്രതികരണം. എന്നാൽ അംബാനിക്കെതിരായ ആരോപണത്തെ പിന്തുണയ്ക്കുന്ന തെളിവുകൾ മസ്ക് പുറത്തുവിട്ടിട്ടില്ലെന്ന് റോയിട്ടേഴ്സ് റിപ്പോർട്ട് ചെയ്തു.
അതേസമയം, ഏതെങ്കിലും മേഖലയിലെ കുത്തക ഇന്ത്യ അനുവദിക്കുന്നില്ലെന്ന് കേന്ദ്ര ടെലികോം മന്ത്രി ജ്യോതിരാദിത്യ സിന്ധ്യ വ്യക്തമാക്കി. സ്റ്റാർലിങ്കിന് ലൈസൻസ് ലഭിച്ചിട്ടുണ്ടെങ്കിലും വാണിജ്യസേവനം തുടങ്ങാൻ സുരക്ഷാ നിബന്ധനകൾ പാലിക്കുകയും സ്പെക്ട്രം അനുവദിക്കുകയും വേണം. ലൈസൻസുള്ള മൂന്ന് ഉപഗ്രഹ ആശയവിനിമയ കമ്പനികളും പൊതുവിൽ ഒരേ അനുമതി ഘട്ടത്തിലാണെന്നും വിവേചനമുണ്ടെന്ന ആരോപണം അടിസ്ഥാനരഹിതമാണെന്നും കേന്ദ്രസർക്കാർ വിശദീകരിച്ചു.