വാഷിങ്ടൺ: 2026ലെ സമാധാനത്തിനുള്ള നൊബേൽ പുരസ്കാരം ദക്ഷിണാഫ്രിക്കൻ നിയമജ്ഞ നവനീതം ‘നവി’ പിള്ളയ്ക്ക് പ്രഖ്യാപിച്ചതിനു പിന്നാലെ നൊബേൽ സമിതിക്കെതിരെ രൂക്ഷവിമർശനവുമായി അമേരിക്കൻ പ്രസിഡന്റ് ഡോണൾഡ് ട്രംപ്. പുരസ്‌കാര നിർണയം അപമാനകരവും നാണക്കേടുണ്ടാക്കുന്നതുമായ തീരുമാനമാണെന്ന് അദ്ദേഹം പറഞ്ഞു. ന്യൂയോർക്കിലെ സിറാക്കൂസിൽ നടന്ന തിരഞ്ഞെടുപ്പ് റാലിയിലായിരുന്നു പ്രതികരണം.
നവി പിള്ളയെക്കുറിച്ച് താൻ കേട്ടിട്ടുപോലുമില്ലെന്ന് പറഞ്ഞ ട്രംപ്, എങ്കിലും അവരെ അഭിനന്ദിക്കുന്നതായി കൂട്ടിച്ചേർത്തു. താൻ പ്രസിഡന്റായി പ്രതിനിധീകരിക്കുന്ന അമേരിക്കയ്ക്കായിരുന്നു സമാധാനത്തിനുള്ള നൊബേൽ ലഭിക്കേണ്ടിയിരുന്നതെന്നും അദ്ദേഹം വാദിച്ചു.
പുരസ്‌കാര നിർണയം നോർവേയ്ക്ക് മായാത്ത കളങ്കമാണെന്നും ഇത് മറക്കില്ലെന്നും ട്രംപ് പറഞ്ഞു. ജനാധിപത്യവിരുദ്ധരായ ഏതാനും തീവ്ര ആശയക്കാർ സമാധാന നൊബേലിന്റെ വിശ്വാസ്യത തകർത്തുവെന്ന ആരോപണവും അദ്ദേഹം ഉന്നയിച്ചു.
സമാധാനത്തിനുള്ള നൊബേൽ ലഭിക്കണമെന്ന ആഗ്രഹം ട്രംപ് നേരത്തേ പലതവണ പരസ്യമായി പ്രകടിപ്പിച്ചിരുന്നു. എട്ട് യുദ്ധങ്ങൾ അവസാനിപ്പിച്ചെന്നും രണ്ടെണ്ണം കൂടി അവസാനിപ്പിക്കുകയോ വിജയിക്കുകയോ ചെയ്യുന്ന ഘട്ടത്തിലാണെന്നും അദ്ദേഹം അവകാശപ്പെട്ടിരുന്നു. വിവിധ സംഘർഷങ്ങൾ പരിഹരിക്കുന്നതിൽ താൻ വഹിച്ച പങ്കും റാലിയിൽ ട്രംപ് ആവർത്തിച്ചു.
സമാധാനത്തിനും അന്താരാഷ്ട്ര നിയമത്തിനും നൽകിയ സംഭാവനകൾ പരിഗണിച്ചാണ് ഇന്ത്യൻ വംശജയായ നവി പിള്ളയെ ഇത്തവണത്തെ പുരസ്‌കാരത്തിന് തിരഞ്ഞെടുത്തത്. ഐക്യരാഷ്ട്രസഭയുടെ മുൻ മനുഷ്യാവകാശ ഹൈക്കമ്മീഷണറായ അവർ അന്താരാഷ്ട്ര നീതിന്യായരംഗത്തും പ്രവർത്തിച്ചിട്ടുണ്ട്.
അതേസമയം, പുരസ്‌കാര പ്രഖ്യാപനത്തിനു പിന്നാലെ തന്നെ അഭിനന്ദിച്ച സദസ്സിനോട് നവി പിള്ള നടത്തിയ തമാശയും ശ്രദ്ധേയമായി. “നിങ്ങൾ കുറച്ചുകൂടി കൈയടിച്ചാൽ ഈ പുരസ്കാരം ഞാൻ ട്രംപുമായി പങ്കിട്ടേക്കാം” എന്നായിരുന്നു അവരുടെ പ്രതികരണം.