മനാമ: ബഹ്‌റൈനില്‍ എല്ലാ ഇന്ത്യന്‍ കോണ്‍സുലാര്‍ സേവനങ്ങളും ഓഗസ്റ്റ് ഒന്നു മുതല്‍ ബഹ്‌റൈന്‍ മാളിലെ പുതിയ ഇന്ത്യന്‍ കോണ്‍സുലാര്‍ ആപ്ലിക്കേഷന്‍ സെന്ററില്‍ (ഐ.സി.എ.സി) ആയിരിക്കുമെന്ന് ഇന്ത്യന്‍ എംബസി അറിയിച്ചു.
സനാബീസിലെ ബഹ്‌റൈന്‍ മാളിന്റെ ഒന്നാം നിലയിലുള്ള കെ.ഇ. വിസ സര്‍വീസസിലാണ് പുതിയ കേന്ദ്രം പ്രവര്‍ത്തിക്കുന്നത്. എംബസിയില്‍ ഉണ്ടായിരുന്ന പാസ്‌പോര്‍ട്ട്, വിസ, അറ്റസ്‌റ്റേഷന്‍ തുടങ്ങി എല്ലാ സേവനങ്ങളും ഇവിടെ ലഭ്യമാകും. ശനിയാഴ്ച മുതല്‍ വ്യാഴാഴ്ച വരെ രാവിലെ 8 മുതല്‍ വൈകുന്നേരം 6 വരെ സേവനങ്ങള്‍ ലഭ്യമാകും. അപേക്ഷകര്‍ക്ക് അവരുടെ നടപടികള്‍ പൂര്‍ത്തിയായ രേഖകള്‍ അപ്പോയിന്റ്‌മെന്റ് ഇല്ലാതെ തന്നെ പ്രവൃത്തി സമയത്ത് നേരിട്ട് വാങ്ങാം.
EoIBH കണക്ട് ആപ്പ് ഇനി ഉപയോഗത്തിലില്ലാത്തതിനാല്‍ www.skylane.com/bh/india എന്ന വെബ്‌സൈറ്റിലൂടെ മാത്രമേ അപ്പോയിന്റ്‌മെന്റ് ബുക്ക് ചെയ്യാന്‍ കഴിയൂ.
ഇന്ത്യാ ഗവണ്മെന്റിന്റെ ഫീസുകള്‍ക്കു പുറമെ ബാധകമായ ബാങ്ക് ഫീസുകള്‍ക്കൊപ്പം 180 ഫില്‍സ് സര്‍വീസ് ചാര്‍ജും ഈടാക്കും. അപേക്ഷകര്‍ക്ക് പണമായി നേരിട്ടോ ഡെബിറ്റ് കാര്‍ഡ്, ക്രെഡിറ്റ് കാര്‍ഡ്, ബെനിഫിറ്റ്, എസ്റ്റിസി പേ എന്നിവ ഉപയോഗിച്ചോ പണമടയ്ക്കാം.
