തിരുവനന്തപുരം: ലോക്സഭാ തിരഞ്ഞെടുപ്പിലേറ്റ പരാജയത്തിലും പാര്ട്ടിക്ക് ഒന്നും സംഭവിച്ചിട്ടില്ലെന്നും അടിത്തറ ഭദ്രമാണെന്നും സിപിഎം സംസ്ഥാന സെക്രട്ടറി എം.വി.ഗോവിന്ദന്. ലോക്സഭാ തിരഞ്ഞെടുപ്പില് ഇടതുമുന്നണിക്ക് ആകെ ഒരു സീറ്റില് മാത്രമാണ് ജയിക്കാനായിരുന്നത്.
‘പാര്ട്ടിയെ സംബന്ധിച്ച് ഒരു പ്രതിസന്ധിയുമില്ല. അടിസ്ഥാനപരമായ വോട്ട് നഷ്ടപ്പെട്ടിട്ടില്ല. 47 ശതമാനം വോട്ടുണ്ടായിരുന്ന യുഡിഎഫിന് 42 ശതമാനമേ ഇത്തവണ ലഭിച്ചിട്ടുള്ളൂ. അഞ്ച് ശതമാനം കുറഞ്ഞു. 36 ശതമാനം വോട്ടുണ്ടായിരുന്ന ഞങ്ങള്ക്ക് ഒരു ശതമാനമേ ഇക്കുറി നഷ്ടമായിട്ടുള്ളൂ. അടിത്തറ ശക്തമായ നിലനില്ക്കുന്നുവെന്നാണ് അത് കാണിക്കുന്നത്’ എം.വി.ഗോവിന്ദന് പറഞ്ഞു.
കേരളത്തില് ബിജെപി അക്കൗണ്ട് തുറക്കില്ലെന്ന് നേരത്തെ ഉറപ്പിച്ച് പറഞ്ഞിരുന്നല്ലോ എന്ന ചോദ്യത്തിന് എം.വി.ഗോവിന്ദന് ഇങ്ങനെ മറുപടി നല്കി, ‘കോണ്ഗ്രസിന്റെ വോട്ട് കോണ്ഗ്രസ് പിടിക്കുമെന്നാണ് ഞങ്ങള് കരുതിയത്. 86000 വോട്ടാണ് കോണ്ഗ്രസിന് കുറഞ്ഞത്. സുരേഷ് ഗോപി 74000 വോട്ടിനാണ് വിജയിച്ചത്. ഞങ്ങള്ക്കവിടെ ആറായിരത്തലിധം വോട്ടുകള് കുറയുകയും ചെയ്തു. ബാക്കി നിങ്ങള് കണക്ക് കൂട്ടിയാല് മതി. ബിജെപി ജയിക്കില്ലെന്ന് ഞാന് പറഞ്ഞത് കറക്ടറാണ്. പക്ഷേ ബിജെപിയെ കോണ്ഗ്രസ് ജയിപ്പിച്ചിരിക്കുന്നു’.
പരാജയം സംബന്ധിച്ച് ആവശ്യമായ പരിശോധനയും തിരുത്തലും വരുത്തും. അതിനുള്ള പ്രയാസമില്ല. തിരുത്തിമുന്നോട്ട് പോകുക തന്നെ ചെയ്യും. വി.ജോയിയുടേത് ജയിച്ച തോല്വിയാണ്. അത് തോറ്റതിന്റെ കൂട്ടത്തില് കൂട്ടേണ്ടതില്ല. കഴിഞ്ഞ തവണത്തേത് പോലെ ഞങ്ങള് തിരിച്ചുപിടിക്കും. അടിസ്ഥാനപരമായ വോട്ട് നഷ്ടപ്പെട്ടിട്ടില്ല. മാധ്യമങ്ങളാകെ ഒറ്റക്കെട്ടായി യുഡിഎഫിന്റെ ഘടകകക്ഷി ആയിരുന്നിട്ടും ഇത്രയേ കുറഞ്ഞിട്ടുള്ളൂ. പാര്ട്ടിയുടെ മുഖത്തിന് ഇപ്പോള് ഒരു തകരാറുമില്ലെന്നും ഗോവിന്ദന് കൂട്ടിച്ചേര്ത്തു.