മനാമ: ബഹ്റൈൻ ടിവി ന്യൂസ് സെന്ററിന്റെ പ്രധാന സ്റ്റുഡിയോയും ഇസാ ടൗണിലെ ഇൻഫർമേഷൻ മന്ത്രാലയ പരിസരത്ത് സ്വകാര്യ റേഡിയോ ചാനലുകളുടെ കെട്ടിടവും ഡെപ്യൂട്ടി രാജാവ് പ്രിൻസ് സൽമാൻ ബിൻ ഹമദ് അൽ ഖലീഫ ഉദ്ഘാടനം ചെയ്തു. ബഹ്റൈനിൽ ടെലിവിഷൻ സംപ്രേക്ഷണം ആരംഭിച്ചതിന്റെ 50-ാം വാർഷികത്തോടനുബന്ധിച്ചായിരുന്നു ഉദ്ഘാടനം. പ്രിൻസ് സൽമാൻ ബിൻ ഹമദ് ബഹ്റൈൻ ടിവി ന്യൂസ് സെന്ററിന്റെ പ്രധാന സ്റ്റുഡിയോയും അത്യാധുനിക ടെലിവിഷൻ, റേഡിയോ ഉപകരണങ്ങളും സാങ്കേതികവിദ്യയും ഉൾപ്പെടുന്ന സ്വകാര്യ റേഡിയോ ചാനലുകളുടെ കെട്ടിടവും സന്ദർശിച്ചു. മാധ്യമങ്ങൾ ഉൾപ്പെടെ എല്ലാ മേഖലകളിലും വിജയഗാഥകൾ സൃഷ്ടിച്ച ബഹ്റൈൻ ടീമിൽ രാജ്യം വിശ്വാസമർപ്പിക്കുന്നതായി അദ്ദേഹം പറഞ്ഞു.
വാർത്താ മന്ത്രാലയത്തിലേക്കുള്ള ഡെപ്യൂട്ടി രാജാവിന്റെ സന്ദർശനത്തെ ഇൻഫർമേഷൻ മന്ത്രി റംസാൻ ബിൻ അബ്ദുല്ല അൽ നോയ്മി സ്വാഗതം ചെയ്തു. ബഹ്റൈൻ ടെലിവിഷൻ സ്ഥാപിച്ചതിന്റെ അമ്പതാണ്ട് പൂർത്തിയാകുന്ന വേളയിൽ രാജാവ് ഹമദ് ബിൻ ഈസ ആൽ ഖലീഫ, കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് ആൽ ഖലീഫ എന്നിവർക്ക് ഇൻഫർമേഷൻ മന്ത്രി ആശംസകൾ നേർന്നു.
കഴിഞ്ഞ വർഷങ്ങളിൽ രാജ്യത്തിന്റെ വിവിധ സംഭവ വികാസങ്ങൾ ജനങ്ങളിലേക്കെത്തിക്കാൻ ബഹ്റൈൻ ടി.വി ചാനലിന് സാധിച്ചതായും രാജാവ് ഹമദ് ബിൻ ഈസ ആൽ ഖലീഫയുടെ ഭരണകാലത്ത് മാധ്യമ മേഖലയിലുണ്ടായ വളർച്ച ഏറെ ശ്രദ്ധേയമായിരുന്നുവെന്നും അദ്ദേഹം പറഞ്ഞു.
ബഹ്റൈൻ ടിവി ന്യൂസ് സെന്ററിന്റെ പ്രധാന സ്റ്റുഡിയോ നിലവിലെ സ്റ്റുഡിയോയേക്കാൾ മൂന്നിരട്ടി വലുതാണ്. കൂടാതെ പ്രാദേശിക, അന്തർദേശീയ ഇവന്റുകൾ ക്രിയാത്മകമായും കാര്യക്ഷമമായും കവർ ചെയ്യുന്നതിനുള്ള അത്യാധുനിക സാങ്കേതികവിദ്യയും സജ്ജീകരിച്ചിട്ടുണ്ട്. എല്ലാ സാങ്കേതിക ഉപകരണങ്ങൾക്കും സിസ്റ്റങ്ങൾക്കും സുസ്ഥിരമായ വൈദ്യുത പ്രവാഹം നൽകുന്നതിനുള്ള ഏറ്റവും പുതിയ വൈദ്യുത പവർ സംവിധാനങ്ങൾ സ്വകാര്യ ബ്രോഡ്കാസ്റ്റിംഗ് സ്റ്റുഡിയോ ബിൽഡിംഗ് പ്രോജക്റ്റിനുണ്ട്. ഡിജിറ്റൽ ഓഡിയോ ബ്രോഡ്കാസ്റ്റിംഗ് (DAB+) സാങ്കേതികവിദ്യയും ഉത്ഘടനത്തോടനുബന്ധിച്ച് ആരംഭിച്ചിട്ടുണ്ട്. ബ്രോഡ്കാസ്റ്റിംഗ് സംവിധാനങ്ങളുടെ ഏറ്റവും ആധുനികവും മൂന്നാം തലമുറയിൽ പെട്ടതുമാണ് ഈ സംവിധാനം.
സ്വകാര്യ റേഡിയോ സ്റ്റേഷനുകൾക്ക് മികച്ച ഉപകരണങ്ങളും സാങ്കേതിക വിദ്യകളും ലഭ്യമാക്കുന്നതിനായി റേഡിയോ ടെക്നോളജി കമ്പനികളുമായി സഹകരിച്ചാണ് പദ്ധതി നടപ്പാക്കിയത്. നിരവധി മുതിർന്ന ഉദ്യോഗസ്ഥരും ഉദ്ഘാടന ചടങ്ങിൽ സന്നിഹിതരായിരുന്നു.