ഡിവൈ.എഫ്.ഐ.–സി.പി.എം പ്രവർത്തകർ നടത്തിയ ആക്രമണം അംഗീകരിക്കാനാകില്ലെന്ന് മുഖ്യമന്ത്രി വ്യക്തമാക്കി. മന്ത്രിയുടെ വാഹനത്തിന് നേരെ പലതവണ ആക്രമണമുണ്ടായെന്നും കല്ലും കൈയും ഉപയോഗിച്ച് വാഹനത്തിൽ അടിച്ചെന്നും അദ്ദേഹം ആരോപിച്ചു.

തളിപ്പറമ്പിലും പയ്യന്നൂരിലും മന്ത്രിയുടെ വാഹനത്തിന് നേരെ പ്രതിഷേധമുണ്ടായി. കാസർകോട്ടേക്ക് പോകുന്നതിനിടെയാണ് സംഭവങ്ങൾ. പയ്യന്നൂർ പിന്നിട്ടതിന് പിന്നാലെ നീലേശ്വരത്തും മന്ത്രിക്കെതിരെ പ്രതിഷേധമുണ്ടായതായി റിപ്പോർട്ടുണ്ട്.

ആക്രമണം നടത്തിയവരെയും ഗൂഢാലോചനയിൽ പങ്കെടുത്ത സി.പി.എം–ഡിവൈ.എഫ്.ഐ നേതാക്കളെയും നിയമത്തിന് മുന്നിൽ കൊണ്ടുവരുമെന്ന് മുഖ്യമന്ത്രി പറഞ്ഞു. ക്രിമിനൽ സംഘങ്ങളെ ഉപയോഗിച്ചുള്ള അക്രമ സമരമാണ് സി.പി.എം നടത്തുന്നതെങ്കിൽ അത് അവസാനിപ്പിക്കേണ്ട ഉത്തരവാദിത്തം സർക്കാരിനുണ്ടെന്നും അദ്ദേഹം മുന്നറിയിപ്പ് നൽകി.

സംഭവത്തിൽ കർശന നടപടി സ്വീകരിക്കാൻ ആഭ്യന്തര മന്ത്രി രമേശ് ചെന്നിത്തല ഡി.ജി.പിക്ക് നിർദേശം നൽകി. മന്ത്രി ഒ.ജെ. ജനീഷുമായി ആഭ്യന്തര മന്ത്രി ഫോണിൽ സംസാരിക്കുകയും സംഭവവിവരങ്ങൾ തേടുകയും ചെയ്തു.

The post മന്ത്രിയുടെ വാഹനം ആക്രമിച്ചത് സി.പി.എം നേതൃത്വത്തിന്റെ അറിവോടെയെന്ന് മുഖ്യമന്ത്രി appeared first on Starvision News Malayalam.

മലപ്പുറത്തെ അപകടസ്ഥലം അടിയന്തരമായി സന്ദർശിക്കേണ്ടതിനാലാണ് സ്വകാര്യ വിമാനത്തിൽ യാത്ര ചെയ്തതെന്ന് സതീശൻ വിശദീകരിച്ചു. വേഗത്തിൽ എത്താനുള്ള മാർഗം അന്വേഷിച്ചപ്പോൾ പരിചയക്കാരനായ ഒരു മലയാളി വിമാനം ഒരുക്കിനൽകുകയായിരുന്നു. ദുരന്തസ്ഥലം സന്ദർശിച്ചില്ലെങ്കിൽ മുഖ്യമന്ത്രി തിരിഞ്ഞുനോക്കിയില്ലെന്ന വിമർശനം ഉയരുമായിരുന്നുവെന്നും അദ്ദേഹം പറഞ്ഞു.

പരസ്യമായാണ് യാത്ര നടത്തിയതെന്നും അതിൽ തെറ്റൊന്നുമില്ലെന്നുമാണ് മുഖ്യമന്ത്രിയുടെ നിലപാട്. വിമാനം ഒരുക്കിയ വ്യക്തിയുടെ പേര് പുറത്തുപറഞ്ഞ് അവരെ വിവാദത്തിലേക്ക് വലിച്ചിഴയ്ക്കേണ്ടതെന്തിനാണെന്നും അദ്ദേഹം ചോദിച്ചു. ആവശ്യമായ സാഹചര്യങ്ങളിൽ ഇനിയും ഇത്തരം യാത്രകൾ നടത്തുമെന്നും സതീശൻ വ്യക്തമാക്കി.

മുൻ മുഖ്യമന്ത്രിമാരായ പിണറായി വിജയനും ഉമ്മൻചാണ്ടിയും സമാനരീതിയിൽ ഹെലികോപ്റ്റർ യാത്രകൾ നടത്തിയിട്ടുണ്ടെന്ന് മുഖ്യമന്ത്രി ചൂണ്ടിക്കാട്ടി. മറ്റു സംസ്ഥാനങ്ങളിലെ മുഖ്യമന്ത്രിമാരും മന്ത്രിമാരും ഔദ്യോഗിക ആവശ്യങ്ങൾക്കായി ഇത്തരം യാത്രാമാർഗങ്ങൾ ഉപയോഗിക്കാറുണ്ടെന്നും അദ്ദേഹം പറഞ്ഞു.

വിമാനം ഒരുക്കിനൽകിയവർ സർക്കാരിൽനിന്ന് പ്രത്യുപകാരം പ്രതീക്ഷിക്കുന്നവരല്ലെന്നും സതീശൻ വാദിച്ചു. ദുരന്തസ്ഥലത്തേക്ക് എത്താൻ സഹായിച്ചതിന്റെ പേരിൽ അവർക്ക് പ്രത്യേക ആനുകൂല്യങ്ങൾ നൽകില്ലെന്നും അത്തരം സമീപനം സ്വീകരിക്കുന്ന സർക്കാരല്ല ഇതെന്നും മുഖ്യമന്ത്രി കൂട്ടിച്ചേർത്തു.

The post വിമാനയാത്രയ്ക്ക് സർക്കാർ പണം ചെലവായിട്ടില്ല; സ്പോൺസറെ വെളിപ്പെടുത്തേണ്ടതില്ലെന്ന് മുഖ്യമന്ത്രി appeared first on Starvision News Malayalam.

കാന്തപുരത്തിന്റെ പ്രസ്താവനയോട് ശക്തമായ വിയോജിപ്പാണുള്ളത്. ഇത്തരം പരാമർശങ്ങൾ ഇസ്‌ലാമിനെപ്പോലും തെറ്റായി വ്യാഖ്യാനിക്കാൻ ഇടയാക്കുമെന്നും മുഖ്യമന്ത്രി കൂട്ടിച്ചേർത്തു.

നബിദിന റാലികളുടെ ഭാഗമായി പലയിടങ്ങളിലും സ്ത്രീകൾ പങ്കെടുത്തതിനെ തുടർന്നാണ് കാന്തപുരം നേതൃത്വം നൽകുന്ന സമസ്ത കേരള ജംഇയ്യത്തുൽ ഉലമ സർക്കുലർ പുറത്തിറക്കിയത്. ‘സ്ത്രീകളെ പ്രദർശിപ്പിക്കരുത്’ എന്നതുൾപ്പെടെയുള്ള പരാമർശങ്ങളാണ് സർക്കുലറിൽ ഉണ്ടായിരുന്നത്. ഇതിനെതിരെ വിവിധ കോണുകളിൽനിന്ന് ശക്തമായ വിമർശനം ഉയർന്നിരുന്നു.

അതേസമയം, വിവാദ സർക്കുലറിന്റെ പേരിൽ കാന്തപുരത്തെ പൂർണമായി തള്ളിപ്പറയാതെയായിരുന്നു മുസ്‌ലിം ലീഗ് സംസ്ഥാന അധ്യക്ഷൻ പാണക്കാട് സാദിഖലി ശിഹാബ് തങ്ങളുടെ പ്രതികരണം. സ്ത്രീസുരക്ഷ മുൻനിർത്തിയുള്ള പരാമർശമായിരിക്കാമെന്നും നിലവിലെ സാമൂഹിക സാഹചര്യമാണ് കാന്തപുരം ഉദ്ദേശിച്ചതെന്നുമായിരുന്നു അദ്ദേഹത്തിന്റെ വിശദീകരണം.

ഇത് ഒരു മതപണ്ഡിതന്റെ അഭിപ്രായമാണെന്നും സമൂഹത്തിന്റെ നന്മ ലക്ഷ്യമിട്ടുള്ള നിലപാടുകളോടൊപ്പം നിൽക്കുകയാണ് മുസ്‌ലിം ലീഗിന്റെ സമീപനമെന്നും സാദിഖലി തങ്ങൾ പറഞ്ഞു. കോൺഗ്രസ് മന്ത്രിമാർ ഉൾപ്പെടെയുള്ളവർ പരാമർശത്തെ പരസ്യമായി തള്ളിയപ്പോൾ മുസ്‌ലിം ലീഗ് വിഷയത്തിൽ കരുതലോടെയുള്ള നിലപാടാണ് സ്വീകരിച്ചത്.

The post കാന്തപുരത്തിന്റെ സ്ത്രീവിരുദ്ധ പരാമർശം തള്ളി മുഖ്യമന്ത്രി; ‘സ്ത്രീകൾ വീട്ടിൽ ഒതുങ്ങിക്കഴിയേണ്ടവരല്ല’ appeared first on Starvision News Malayalam.

പൊതുഅവധി ഇല്ലാത്ത തിങ്കൾ, ബുധൻ, വെള്ളി ദിവസങ്ങളിൽ വൈകീട്ട് മൂന്ന് മുതൽ 5.30 വരെയാണ് സന്ദർശകർക്ക് മുഖ്യമന്ത്രിയെ കാണാൻ അവസരം ലഭിക്കുക.

ഈ ദിവസങ്ങളിൽ പ്രായമായവർ, ഭിന്നശേഷിക്കാർ, ശാരീരിക അവശതകളുള്ളവർ എന്നിവരെ സെക്രട്ടേറിയറ്റ് വളപ്പിലെ പരാതി പരിഹാര സെല്ലിൽ മുഖ്യമന്ത്രി നേരിട്ട് കാണും. ഇതിനുശേഷമായിരിക്കും മുഖ്യമന്ത്രിയുടെ ഓഫീസിൽ മറ്റു സന്ദർശകരെ കാണുക.

മുൻകൂട്ടി അപ്പോയിന്റ്‌മെന്റ് നേടിയവർക്കും നിശ്ചിത സമയത്ത് ഓഫീസിലെത്തി മുഖ്യമന്ത്രിയെ കാണാം. മറ്റു ജില്ലകളിൽനിന്ന് എത്തുന്നവർക്ക് വേഗത്തിൽ പരാതി സമർപ്പിക്കാനും സന്ദർശകരുടെ തിരക്ക് ഒഴിവാക്കാനുമാണ് പുതിയ ക്രമീകരണമെന്ന് മുഖ്യമന്ത്രിയുടെ ഓഫീസ് വ്യക്തമാക്കി.

മുഖ്യമന്ത്രി സെക്രട്ടേറിയറ്റിൽ ഇല്ലാത്ത ദിവസങ്ങളിലും പൊതുജനങ്ങൾക്ക് പരാതി പരിഹാര സെല്ലിൽ നേരിട്ട് പരാതി നൽകാം. വൈകീട്ട് മൂന്ന് മുതൽ അഞ്ച് വരെ പ്രത്യേകം നിയോഗിച്ച ഉദ്യോഗസ്ഥർ പരാതികൾ സ്വീകരിക്കുമെന്നും മുഖ്യമന്ത്രിയുടെ ഓഫീസ് അറിയിച്ചു.

The post മുഖ്യമന്ത്രിക്ക് നേരിട്ട് പരാതി നൽകാം; ആഴ്ചയിൽ മൂന്നുദിവസം സന്ദർശകരെ കാണും appeared first on Starvision News Malayalam.

തിരുവനന്തപുരം: മഴക്കെടുതിയെത്തുടർന്ന് സംസ്ഥാനത്ത് രൂപപ്പെട്ട സാഹചര്യം നിയന്ത്രണവിധേയമാണെന്ന് മുഖ്യമന്ത്രി വി.ഡി. സതീശൻ അറിയിച്ചു. അടിയന്തരയോഗം ചേർന്ന് സ്ഥിതിഗതികൾ വിലയിരുത്തിയതായും രക്ഷാപ്രവർത്തനത്തിനായി രണ്ട് ഹെലികോപ്റ്ററുകൾ എത്തിയതായും മുഖ്യമന്ത്രി വാർത്താസമ്മേളനത്തിൽ പറഞ്ഞു. എൻഡിആർഎഫ്, പൊലീസ്, ഫയർഫോഴ്‌സ് സേനകൾ രക്ഷാപ്രവർത്തന രംഗത്തുണ്ട്.

സംസ്ഥാനത്ത് നിലവിൽ 316 ദുരിതാശ്വാസ ക്യാമ്പുകളിലായി 11,018 പേരാണ് കഴിയുന്നത്. ക്യാമ്പുകളിൽ ആവശ്യമായ ഭക്ഷണവും മറ്റ് സൗകര്യങ്ങളും ഉറപ്പാക്കിയിട്ടുണ്ട്. മഴക്കെടുതിയിൽ ഇതുവരെ 15 പേർ മരിക്കുകയും ഏഴുപേരെ കാണാതാവുകയും ചെയ്തതായി മുഖ്യമന്ത്രി അറിയിച്ചു.

മഴ ശക്തമാകാനുള്ള സാധ്യത പരിഗണിച്ച് കഴിഞ്ഞ മാസം 30 മുതൽ തന്നെ ആവശ്യമായ തയ്യാറെടുപ്പുകൾ ആരംഭിച്ചിരുന്നു. പ്രാഥമിക കണക്കുകൾ പ്രകാരം 165 ഹെക്ടർ കൃഷി നശിച്ചിട്ടുണ്ട്.

സംസ്ഥാനത്തെ പ്രധാന അണക്കെട്ടുകളിലെ ജലനിരപ്പ് താഴെയാണെന്നും ആശങ്കപ്പെടേണ്ട സാഹചര്യമില്ലെന്നും മുഖ്യമന്ത്രി വ്യക്തമാക്കി. അണക്കെട്ടുകളിൽനിന്ന് വെള്ളം തുറന്നുവിടുന്നുവെന്ന തരത്തിൽ പ്രചരിക്കുന്ന വാർത്തകൾ അടിസ്ഥാനരഹിതമാണ്. തെറ്റായ വാർത്തകൾ പ്രചരിപ്പിക്കുന്നവർക്കെതിരെ നടപടി സ്വീകരിക്കുമെന്നും അദ്ദേഹം മുന്നറിയിപ്പ് നൽകി.

രാത്രിസമയങ്ങളിൽ അണക്കെട്ടുകളിൽനിന്ന് വെള്ളം തുറന്നുവിടുന്നുണ്ടോയെന്നത് നേരിട്ട് പരിശോധിക്കും. കടലാക്രമണ സാധ്യതയുള്ള പ്രദേശങ്ങളിൽ പ്രത്യേക ജാഗ്രതയും നിരീക്ഷണവും ഏർപ്പെടുത്തുമെന്നും മുഖ്യമന്ത്രി അറിയിച്ചു.

മരിച്ചവരുടെ സംസ്കാരച്ചടങ്ങുകൾക്കായി 10,000 രൂപ വീതം നൽകും. വീടുകളിൽ വെള്ളം കയറിയ കുടുംബങ്ങൾക്ക് 10,000 രൂപ അടിയന്തരസഹായം അനുവദിക്കും. ജീവനോപാധി നഷ്ടപ്പെട്ടവർക്ക് പ്രതിസന്ധി അവസാനിക്കുന്നതുവരെ 300 രൂപ വീതം ധനസഹായം നൽകുമെന്നും മുഖ്യമന്ത്രി വ്യക്തമാക്കി.

The post മഴക്കെടുതി: സംസ്ഥാനത്തെ സ്ഥിതിഗതികൾ നിയന്ത്രണവിധേയമെന്ന് മുഖ്യമന്ത്രി appeared first on Starvision News Malayalam.

തിരുവനന്തപുരം: സർക്കാർ പ്ലീഡർമാരുടെ നിയമനവുമായി ബന്ധപ്പെട്ട വിവാദത്തിൽ കെഎസ്‌യു സംസ്ഥാന പ്രസിഡന്റ് അലോഷ്യസ് സേവ്യറിന് പറയാനുള്ളത് സശ്രദ്ധം കേട്ടതായി മുഖ്യമന്ത്രി വി.ഡി. സതീശൻ. നൂറിലധികം സർക്കാർ പ്ലീഡർമാരെ നിയമിച്ചതിൽ രണ്ട് നിയമനങ്ങൾക്കെതിരെ മാത്രമാണ് ആക്ഷേപം ഉയർന്നതെന്നും മുൻ സർക്കാരുകളുടെ കാലത്തെ നിയമനങ്ങൾ കൂടി പരിശോധിക്കണമെന്നും മുഖ്യമന്ത്രി ആവശ്യപ്പെട്ടു.

അലോഷ്യസ് സേവ്യറിന് മുഖ്യമന്ത്രിയെ കാണാൻ അനുമതി നിഷേധിച്ചെന്ന മാധ്യമവാർത്തകൾ തെറ്റാണെന്ന് അദ്ദേഹം പറഞ്ഞു. മുഖ്യമന്ത്രിയുടെ ഓഫീസ് ആർക്കും സന്ദർശനാനുമതി നിഷേധിക്കാറില്ല. സാധാരണക്കാർ മുതൽ വ്യവസായികളും രാഷ്ട്രീയ നേതാക്കളും ഉൾപ്പെടെ നിരവധി പേർ തന്നെ കാണാറുണ്ടെന്നും അദ്ദേഹം വ്യക്തമാക്കി.

തേവര കോളജിലെ പരിപാടിക്കിടെ അലോഷ്യസിനെ കണ്ടിട്ടും സംസാരിക്കാതെ പോയെന്ന ആരോപണവും മുഖ്യമന്ത്രി നിഷേധിച്ചു. പരിപാടി കഴിഞ്ഞ് ഉച്ചയ്ക്ക് 2.50ന് മടങ്ങിയെന്നും മൂന്നുമണിക്ക് പ്രധാനമന്ത്രിയുടെ ഓൺലൈൻ പരിപാടിയിൽ പങ്കെടുക്കേണ്ടതിനാൽ തിരക്കിട്ട് പോകുകയായിരുന്നുവെന്നും അദ്ദേഹം വിശദീകരിച്ചു. അന്ന് രാവിലെ മുതൽ ഉച്ചവരെ എറണാകുളം ഗസ്റ്റ് ഹൗസിലുണ്ടായിരുന്ന വിവരം അലോഷ്യസിനെ അറിയിച്ചിരുന്നതായും മുഖ്യമന്ത്രി പറഞ്ഞു.

പ്ലീഡർ നിയമനവുമായി ബന്ധപ്പെട്ട് കെഎസ്‌യുവിനെതിരെ ഒന്നും പറഞ്ഞിട്ടില്ല. തിരുവനന്തപുരം ലോ കോളജ് കെഎസ്‌യു യൂണിറ്റിന് നിയമനത്തിൽ എതിർപ്പുണ്ടെന്ന് മാധ്യമപ്രവർത്തകർ ചൂണ്ടിക്കാട്ടിയപ്പോൾ, ലോ കോളജ് യൂണിറ്റിനോട് ചോദിച്ചാണോ പ്ലീഡറെ നിയമിക്കുന്നതെന്ന് മാത്രമാണ് ചോദിച്ചതെന്നും അദ്ദേഹം വ്യക്തമാക്കി.

The post പ്ലീഡർ നിയമന വിവാദം: അലോഷ്യസ് സേവ്യറിന്റെ വാക്കുകൾ സശ്രദ്ധം കേട്ടെന്ന് മുഖ്യമന്ത്രി വി.ഡി. സതീശൻ appeared first on Starvision News Malayalam.

തിരുവനന്തപുരം: വിഴിഞ്ഞം തുറമുഖ ഓഹരി കൈമാറ്റവുമായി ബന്ധപ്പെട്ട് മുഖ്യമന്ത്രിക്ക് കത്തയച്ച് പ്രതിപക്ഷ നേതാവ്. അദാനി കമ്പനി സര്‍ക്കാരിന് നല്‍കിയ കത്തിന്മേല്‍ ഇതുവരെ എന്തൊക്കെ നടപടികളാണ് സ്വീകരിച്ചതെന്ന് വ്യക്തമാക്കണമെന്ന് കത്തില്‍ ആവശ്യപ്പെട്ടു.

ഓഹരി കൈമാറ്റവുമായി ബന്ധപ്പെട്ട് സര്‍ക്കാര്‍ നിയമോപദേശം തേടിയിട്ടുണ്ടോ, കരാര്‍ ലംഘനം സംബന്ധിച്ച് സ്റ്റോക്ക് എക്‌സ്‌ചേഞ്ച് അധികാരികളെ അറിയിച്ചിട്ടുണ്ടോ എന്നീ കാര്യങ്ങളിലും വ്യക്തത വേണമെന്നും പ്രതിപക്ഷ നേതാവ് ആവശ്യപ്പെട്ടു. കരാര്‍ വ്യവസ്ഥകള്‍ ലംഘിച്ചതിനെ ലാഘവത്തോടെ കാണാനാകില്ലെന്നും സര്‍ക്കാരിന്റെ മൗനം ദുരൂഹമാണെന്നും കത്തില്‍ ചൂണ്ടിക്കാട്ടുന്നു.

കേരള സര്‍ക്കാര്‍ അറിയാതെയാണോ അദാനി സെബിയുമായി ബന്ധപ്പെട്ട നടപടികളിലേക്ക് നീങ്ങിയതെന്നും കത്തില്‍ ചോദിക്കുന്നു. അത്തരമൊരു നീക്കം ഉണ്ടായിട്ടുണ്ടെങ്കില്‍ അത് കരാര്‍ ലംഘനമാണെന്നും ഇതില്‍ സര്‍ക്കാര്‍ നിയമ നടപടിയോ നിയമോപദേശമോ സ്വീകരിച്ചിട്ടുണ്ടോ എന്നും പ്രതിപക്ഷം ചോദിച്ചു.

അദാനി നല്‍കിയ അപേക്ഷ സംബന്ധിച്ചും കത്തില്‍ വിശദീകരണം തേടിയിട്ടുണ്ട്. ആദ്യം ഒരു അപേക്ഷ നല്‍കിയെന്നും പിന്നീട് ചില കൂട്ടിച്ചേര്‍ക്കലുകള്‍ക്കുശേഷം മറ്റൊരു അപേക്ഷ നല്‍കിയെന്നുമുള്ള മാധ്യമവാര്‍ത്തകളിലെ സത്യാവസ്ഥ വ്യക്തമാക്കണമെന്നും ആവശ്യപ്പെട്ടു.

ജൂണ്‍ 29ന് അദാനി ഗ്രൂപ്പ് ഓഹരി കൈമാറ്റവുമായി ബന്ധപ്പെട്ട് സെബിക്ക് കത്ത് നല്‍കിയതായാണ് വിവരം പുറത്തുവന്നത്. ജൂലായ് 1ന് നിയമസഭയില്‍ വിഷയം പ്രതിപക്ഷം ഉന്നയിച്ചപ്പോള്‍ സര്‍ക്കാരിന് ഇതുസംബന്ധിച്ച് അറിയിപ്പ് ലഭിച്ചിട്ടില്ലെന്നായിരുന്നു മുഖ്യമന്ത്രിയുടെ മറുപടി. സര്‍ക്കാരറിയാതെ ഇത്തരമൊരു നീക്കം നടത്താന്‍ അദാനിക്ക് എങ്ങനെ ധൈര്യം ലഭിച്ചുവെന്നതാണ് സംശയം ഉയര്‍ത്തുന്നതെന്ന് പ്രതിപക്ഷ നേതാവ് നേരത്തെയും ചൂണ്ടിക്കാട്ടിയിരുന്നു.

The post വിഴിഞ്ഞം ഓഹരി കൈമാറ്റം: വ്യക്തത തേടി മുഖ്യമന്ത്രിക്ക് പ്രതിപക്ഷ നേതാവിന്റെ കത്ത് appeared first on Starvision News Malayalam.

തിരുവനന്തപുരം: സംസ്ഥാനത്ത് മയക്കുമരുന്ന് കടത്ത് തടയുന്നതിനും ലഹരിമരുന്ന് ശൃംഖലകളെ പൂർണമായി തകർക്കുന്നതിനുമായി നടപ്പിലാക്കുന്ന ‘ഓപ്പറേഷൻ തൂഫാൻ’ കൂടുതൽ ശക്തമാക്കുന്നതിന്റെ ഭാഗമായി മുഖ്യമന്ത്രി വി.ഡി. സതീശൻ അയൽ സംസ്ഥാനങ്ങളായ കർണാടക, തമിഴ്നാട്, പുതുച്ചേരി എന്നിവിടങ്ങളിലെ മുഖ്യമന്ത്രിമാർക്ക് കത്തയച്ചു.

മയക്കുമരുന്ന് മാഫിയകൾ വിവിധ സംസ്ഥാനങ്ങളിലായി വ്യാപിച്ചുകിടക്കുന്ന സാഹചര്യത്തിൽ, അവരെ ഫലപ്രദമായി നേരിടാൻ സംസ്ഥാനങ്ങൾ തമ്മിലുള്ള ഏകോപിത പ്രവർത്തനം അനിവാര്യമാണെന്ന് മുഖ്യമന്ത്രി കത്തിൽ ചൂണ്ടിക്കാട്ടി. കേരളം, കർണാടക, തമിഴ്നാട്, പുതുച്ചേരി എന്നിവിടങ്ങളിലെ അതിർത്തി മേഖലകൾ, പ്രധാന റോഡ് ഇടനാഴികൾ, വിനോദസഞ്ചാര കേന്ദ്രങ്ങൾ, വിദ്യാർത്ഥി ശൃംഖലകൾ, നഗര വിതരണ കേന്ദ്രങ്ങൾ തുടങ്ങിയ മേഖലകൾ മയക്കുമരുന്ന് സംഘങ്ങൾ ദുരുപയോഗം ചെയ്യാൻ സാധ്യതയുള്ളവയാണെന്നും അദ്ദേഹം വ്യക്തമാക്കി.

ഓപ്പറേഷൻ തൂഫാന്റെ ഭാഗമായി ഇന്റലിജൻസ് അധിഷ്ഠിത പരിശോധനകളും നിയമനടപടികളും ശക്തമാക്കിയതായും, മയക്കുമരുന്ന് കടത്തുകാരുടെ സാമ്പത്തിക ശൃംഖലകൾ തകർക്കുന്നതിനും അനധികൃത സ്വത്തുക്കൾ കണ്ടുകെട്ടുന്നതിനുമുള്ള നടപടികൾ തുടരുകയാണെന്നും മുഖ്യമന്ത്രി അറിയിച്ചു.

ഇതിനകം നിരവധി അന്തർസംസ്ഥാന-അന്തർദേശീയ മയക്കുമരുന്ന് കടത്ത് സംഘങ്ങളെ കേരള പൊലീസ് പിടികൂടിയിട്ടുണ്ടെന്നും, ഇത്തരം കുറ്റകൃത്യങ്ങളെ ഫലപ്രദമായി നേരിടാൻ തത്സമയ വിവര കൈമാറ്റം, സംയുക്ത റെയ്ഡുകൾ, ഏകോപിത ആസൂത്രണം എന്നിവ നിർണായകമാണെന്നും അദ്ദേഹം പറഞ്ഞു.

ഇതിന്റെ ഭാഗമായി കേരളം, കർണാടക, തമിഴ്നാട്, പുതുച്ചേരി എന്നിവിടങ്ങളിലെ പൊലീസ്-ആഭ്യന്തര വകുപ്പ് ഉന്നത ഉദ്യോഗസ്ഥരുടെ യോഗം വിളിച്ചുചേർത്ത് സംയുക്ത പ്രവർത്തന പദ്ധതി രൂപീകരിക്കണമെന്ന നിർദേശവും മുഖ്യമന്ത്രി മുന്നോട്ടുവച്ചു.

ആഭ്യന്തര വകുപ്പ് മന്ത്രി രമേശ് ചെന്നിത്തലയുടെ നേതൃത്വത്തിൽ സംസ്ഥാന പൊലീസ് മേധാവി റാവഡ ചന്ദ്രശേഖർ, ടാക്ടിക്കൽ കമാൻഡർ പുട്ട വിക്രമാദിത്യ എന്നിവർ അയൽ സംസ്ഥാനങ്ങളിലെ പൊലീസ് മേധാവിമാരുമായും ആഭ്യന്തര വകുപ്പ് ഉദ്യോഗസ്ഥരുമായും ചർച്ച നടത്താൻ തയ്യാറാണെന്നും മുഖ്യമന്ത്രി കത്തിൽ വ്യക്തമാക്കിയിട്ടുണ്ട്.

The post കേരളം ലഹരിമുക്തമാകണം: അയൽ സംസ്ഥാനങ്ങളോട് സംയുക്ത നീക്കത്തിന് മുഖ്യമന്ത്രി appeared first on Starvision News Malayalam.

മനാമ: വർഷങ്ങളോളം പ്രവാസി ക്ഷേമനിധിയിൽ പൈസ അടച്ച പ്രവാസികൾ അവസാന വർഷം പെൻഷൻ ആവുന്ന തീയതിയ്ക്ക് മുമ്പ് ചെറിയ കുടിശ്ശിക അടച്ചു തീർത്തിട്ടില്ല എന്ന നിസാര കാരണത്താൽ അവരുടെ കുടിശ്ശിക ബാക്കി അടക്കാൻ അനുവദിക്കാതെ പെൻഷൻ തടഞ്ഞു വെക്കുന്ന നിയമം കഴിഞ്ഞ സർക്കാർ കാലത്ത് ക്ഷേമനിധി ബോർഡ്‌ എടുത്തനിയമം പുനഃപരിശോധിച്ചു ക്ഷേമനിധിയിൽ പണം അടച്ചു വരുന്ന എല്ലാവർക്കും കുടിശ്ശിക അടച്ചു പെൻഷൻ അനുവദിക്കാൻ അടിയന്തിരമായി ഇടപെടൽ ഉണ്ടാകണമെന്നും നീതി അനുവദിച്ചു കിട്ടണമെന്നും കെഎംസിസി ബഹ്‌റൈൻ മുഖ്യമന്ത്രി വി ഡി സതീശനോട് ആവശ്യപ്പെട്ടു.

പെൻഷന് അപേക്ഷ കൊടുത്താൽ അത് അനുവദിച്ചു തരുവാൻ ആറുമാസം മുതൽ ഒരു വർഷം വരെ എടുക്കുന്ന നിലവിലെ രീതി മാറ്റി അപേക്ഷ കൊടുത്താൽ ഒന്നോ രണ്ടോ മാസത്തിനുള്ളിൽ തന്നെ പെൻഷൻ അനുവദിക്കുന്ന രീതി നടപ്പിൽ വരുത്താനും കെഎംസിസി ആവശ്യപ്പെട്ടു.

പ്രവാസി പെൻഷൻ പലർക്കും കൃത്യമായി ലഭിക്കാതെ കുടിശ്ശികയായി കിടക്കുകയാണ്. അതൊക്കെ സമയബന്ധിതമായി കൊടുത്ത് തീർക്കാനുള്ള നടപടി എടുക്കാനും പ്രവാസി ക്ഷേമ നിധിയിൽ ചേരാനുള്ള പ്രായപരിധി 60 വയസ്സ് എന്നുള്ളത് 70 വയസ്സ് വരെയാക്കാനും പ്രവാസി ക്ഷേമനിധിയിലെ ചികിത്സാ സഹായം മരണാനന്തര സഹായം എന്നിവക്ക് അപേക്ഷ ലഭിച്ചാൽ അനന്തമായി നീട്ടികൊണ്ട് പോവാതെ പെട്ടന്ന് തന്നെ സഹായം ലഭ്യമാക്കാനുള്ള പ്രവർത്തനം ത്വരിതപ്പെടുത്താനും കമ്മിറ്റി ആവശ്യപ്പെട്ടു.

കൂടാതെ ക്ഷേമനിധി ഓഫീസുകളിൽ 24 മണിക്കൂർ ഹെല്പ് ഡെസ്കും അനുവദിക്കണമെന്നും പലപ്പോഴും വിളിച്ചാൽ ഫോൺ എടുക്കാത്ത സാഹചര്യം ഒഴിവാക്കണമെന്നും ഇത്തരം കാര്യങ്ങളിൽ അടിയന്തിരമായ ഇടപെടൽ നിന്നുണ്ടാവണമെന്നും മുഖ്യമന്ത്രിയോട് ആവശ്യപ്പെട്ടു.

മരുന്ന് വാങ്ങാനും അത്യാവശ്യ കാര്യങ്ങൾക്കും വേണ്ടി പെൻഷൻ കിട്ടുമെന്നുള്ള പ്രതീക്ഷയോടു കൂടി വളരെ ആകാംക്ഷയോടെ കാത്തിരിക്കുന്ന പ്രവാസികളായിരുന്നവർ അവർക്ക് അർഹതപ്പെട്ട പെൻഷൻ യഥാസമയം കിട്ടാത്തതിന്റെ പ്രതിഷേധം അവരിൽ ഒരു വേദനയായി മാറിയിരിക്കുകയാണ്.

അപേക്ഷ നൽകിയാൽ മിക്കവർക്കും ഒരു വർഷത്തിന് ശേഷമാണ് പെൻഷൻ കൊടുത്തു തുടങ്ങുന്നത്. അപേക്ഷിച്ചതിന് ശേഷം രണ്ടു മാസത്തിനു ശേഷം കിട്ടേണ്ടുന്ന പെൻഷനാണ് ഒരു വർഷമെടുക്കുന്നത്.

നിലവിൽ പെൻഷൻ പാസ്സായി കഴിഞ്ഞാൽ അപേക്ഷിക്കുന്ന മാസം മുതൽ പെൻഷൻ കൊടുക്കുന്നില്ലെന്ന് മാത്രമല്ല ബാക്കി വരുന്ന മാസങ്ങളിലെ പൈസ പല പ്രവാസികൾക്കും ഇതുവരെ ലഭിച്ചിട്ടുമില്ല. മാസങ്ങളായി ലഭിക്കാത്ത 30000 ത്തിലധികം വരുന്ന തുക യോളം ഉള്ളവരും സർക്കാരിനോട് പല പ്രാവശ്യമായി ആവശ്യപ്പെട്ടിട്ടും ഇതുവരെ നൽകാൻ കഴിഞ്ഞ സർക്കാരിന് കഴിഞ്ഞിട്ടില്ല.

എന്തെങ്കിലും കാരണവശാൽ ഒരു ദിവസം ചെറിയ തുക അടക്കാൻ ബാക്കിയായി പ്രവാസി പെൻഷന് അപേക്ഷ കൊടുക്കാൻ സാധിച്ചിട്ടില്ലെങ്കിൽ അവരുടെ പെൻഷൻ തന്നേ ഇല്ലാതായി പോകുന്ന അവസ്ഥയാനുള്ളത്. ആയത് കൊണ്ട് ഓരോ ആളുകൾക്കും അർഹതപ്പെട്ട മുഴുവൻ പെൻഷനും നൽകണമെന്നും അത് മാസത്തിലെ അഞ്ചാം തിയ്യതി നിർബന്ധമായും നൽകണമെന്നും
അത് പോലെ ഭാരിച്ച ഫൈൻ കൊണ്ടും ബുദ്ധിമുട്ടുന്നവർ നിരവധിയാണെന്നും ഫൈൻ പൂർണ്ണമായും എടുത്തു കളയണമെന്നും കെഎംസിസിവൈസ് പ്രസിഡന്റ്‌ ഏ പി ഫൈസൽ പാറക്കൽ എം എൽ എ മുഖേന നിവേദനം നൽകി കൊണ്ട് മുഖ്യമന്ത്രിയോട് അഭ്യർത്ഥിച്ചു.

The post എൽ ഡി എഫ് സർക്കാരിന്റെ തെറ്റായ തീരുമാനം പുനഃപരിശോധിക്കണം: മുഖ്യമന്ത്രിക്ക് പരാതി നൽകി കെഎംസിസി appeared first on Starvision News Malayalam.

കോട്ടയം: മുഖ്യമന്ത്രി വി.ഡി. സതീശനെതിരെ രൂക്ഷ വിമർശനവുമായി എൻഎസ്എസ് ജനറൽ സെക്രട്ടറി ജി. സുകുമാരൻ നായർ. മുഖ്യമന്ത്രിയുമായി കൂടിക്കാഴ്ചയ്ക്ക് അനുമതി ലഭിക്കാത്തതിൽ അതൃപ്തി പ്രകടിപ്പിച്ച അദ്ദേഹം, മുഖ്യമന്ത്രി അഹങ്കാരപരമായ സമീപനമാണ് സ്വീകരിക്കുന്നതെന്ന് ആരോപിച്ചു.

പെരുന്നയിലെ എൻഎസ്എസ് ആസ്ഥാനത്ത് നടന്ന സംഘടനയുടെ വാർഷിക ബജറ്റ് സമ്മേളനത്തിൽ സംസാരിക്കുകയായിരുന്നു സുകുമാരൻ നായർ. ഇനി മുഖ്യമന്ത്രിയുടെ കാൽപിടിക്കാൻ താൻ തയ്യാറല്ലെന്നും അദ്ദേഹം പറഞ്ഞു.

സാമുദായിക നേതാക്കളെ കാണാൻ പോകില്ലെന്ന വി.ഡി. സതീശന്റെ മുൻകാല പരാമർശങ്ങൾ ചൂണ്ടിക്കാട്ടിയായിരുന്നു വിമർശനം. മുമ്പ് പലതവണ എൻഎസ്എസ് ആസ്ഥാനത്തെത്തി തന്നെ കാണാൻ കാത്തുനിന്നിരുന്ന വ്യക്തിയാണ് ഇന്ന് നിലപാട് മാറ്റി അഹങ്കാരപരമായി പെരുമാറുന്നതെന്നും അദ്ദേഹം കുറ്റപ്പെടുത്തി.

ഇൻകം ടാക്സ് ഭേദഗതിയുമായി ബന്ധപ്പെട്ട വിഷയത്തിൽ ചർച്ച നടത്തുന്നതിനായി മുഖ്യമന്ത്രിയുമായി കൂടിക്കാഴ്ചയ്ക്ക് എൻഎസ്എസ് നേതൃത്വം രണ്ട് തവണ മുഖ്യമന്ത്രിയുടെ ഓഫീസിനെ സമീപിച്ചിരുന്നു. എന്നാൽ, ഇരുവട്ടവും സമയം അനുവദിച്ചില്ലെന്ന് സുകുമാരൻ നായർ ആരോപിച്ചു. ഇതിന് പിന്നാലെയാണ് പെരുന്നയിൽ ചേർന്ന വാർഷിക ബജറ്റ് സമ്മേളനത്തിൽ മുഖ്യമന്ത്രിക്കെതിരെ അദ്ദേഹം പരസ്യമായി വിമർശനം ഉന്നയിച്ചത്.

The post മുഖ്യമന്ത്രി സതീശൻ അഹങ്കാരി; കൂടിക്കാഴ്ചയ്ക്ക് അനുമതി ലഭിച്ചില്ല, ഇനി കാൽപിടിക്കാനില്ലെന്ന് സുകുമാരൻ നായർ appeared first on Starvision News Malayalam.