ഹോളിവുഡിലെ പ്രശസ്ത രഹസ്യ ഏജന്റായ ജെയിംസ് ബോണ്ടിന്റെ വേഷത്തിൽ ഇനി ബ്രിട്ടീഷ് നടൻ റോബർട്ട് പാറ്റിൻസൺ. പുതിയ ബോണ്ട് ചിത്രത്തിൽ പാറ്റിൻസൺ 007 ആയി എത്തുമെന്ന് ആമസോൺ എംജിഎം സ്റ്റുഡിയോസ് ഔദ്യോഗികമായി അറിയിച്ചു.
‘ഹാരി പോട്ടർ’ പരമ്പരയിലെ സെഡ്രിക് ഡിഗറിയായും ‘ട്വിലൈറ്റ്’ ചിത്രങ്ങളിലെ എഡ്വേർഡ് കുള്ളനായും ‘ദ ബാറ്റ്മാൻ’ ചിത്രത്തിലെ ബ്രൂസ് വെയ്നായും ശ്രദ്ധ നേടിയ താരമാണ് 40കാരനായ പാറ്റിൻസൺ. ഡാനിയൽ ക്രെയ്ഗിന് ശേഷം ബോണ്ട് വേഷത്തിലെത്തുന്ന പുതിയ നടനാണ് അദ്ദേഹം.
ഡെനിസ് വില്ലന്യൂവ് സംവിധാനം ചെയ്യുന്ന ചിത്രത്തിന്റെ തിരക്കഥ ‘പീക്കി ബ്ലൈൻഡേഴ്സ്’ സ്രഷ്ടാവ് സ്റ്റീവൻ നൈറ്റാണ് ഒരുക്കുന്നത്. ആമി പാസ്കലും ഡേവിഡ് ഹെയ്മാനും നിർമാതാക്കളായും താന്യ ലാപോയിന്റ് എക്സിക്യൂട്ടീവ് പ്രൊഡ്യൂസറായും പ്രവർത്തിക്കും. ചിത്രത്തിന്റെ പേരും ചിത്രീകരണ തീയതിയും മറ്റ് അഭിനേതാക്കളും സംബന്ധിച്ച വിവരങ്ങൾ ഇതുവരെ പുറത്തുവിട്ടിട്ടില്ല.
ഡാനിയൽ ക്രെയ്ഗ് നായകനായ ‘നോ ടൈം ടു ഡൈ’യാണ് ഇതുവരെ പുറത്തിറങ്ങിയ ഏറ്റവും പുതിയ ബോണ്ട് ചിത്രം. ഷോൺ കോണറി, ഡേവിഡ് നിവൻ, ജോർജ് ലേസൻബി, റോജർ മൂർ, തിമോത്തി ഡാൾട്ടൺ, പിയേഴ്സ് ബ്രോസ്നൻ, ഡാനിയൽ ക്രെയ്ഗ് എന്നിവർക്ക് പിന്നാലെ ബോണ്ടായി എത്തുന്ന നടനാണ് പാറ്റിൻസൺ.

