ധാക്ക :ദുര്ഗാപൂജ ദിനത്തിലെ സംഘര്ഷത്തിനു പിന്നാലെ ബംഗ്ലാദേശില് കലാപസമാന സാഹചര്യം. ഞായറാഴ്ച മറ്റൊരു ഹിന്ദു ക്ഷേത്രം കൂടി രാജ്യത്ത് ആക്രമിക്കപ്പെട്ടു. ആക്രമണത്തില് ഇതുവരെ ആറു പേര് കൊല്ലപ്പെട്ടു. കഴിഞ്ഞയാഴ്ച ദുര്ഗാപൂജയുമായി ബന്ധപ്പെട്ട ഒരു വീഡിയോ പ്രചരിച്ചതിനു പിന്നാലെയാണ് രാജ്യത്ത് മുസ്ലിം വിശ്വാസികള് പ്രതിഷേധവുമായി രംഗത്തെത്തിയത്. ദുര്ഗാ പ്രതിഷ്ഠയ്ക്ക് മുന്നില് ഖുറാന് വെച്ച ഒരു വീഡിയോ ആയിരുന്നു ഇത്. ഇതിനു പിന്നാലെ ദുര്ഗാ പൂജ നടത്തിയ വേദികളിലേക്കും രാജ്യത്തെ ഹിന്ദു ന്യൂനപക്ഷങ്ങള്ക്ക് നേരെയും വ്യാപക ആക്രമണമുണ്ടായി. അക്രമം രാജ്യത്ത് അങ്ങിങ്ങായി കത്തിപ്പടരുകയും ചെയ്തു.
രാജ്യത്തെ രംഗ്പൂര് നഗരത്തില് ന്യൂനപക്ഷങ്ങളുടെ 20 വീടുകള് ആക്രമികള് കത്തിച്ചു. മുസ്ലിം വിഭാഗത്തെ അപമാനിക്കുന്ന തരത്തില് ഒരു ഹിന്ദു യുവാവ് ഫേസ്ബുക്കില് സ്റ്റാറ്റസ് ഇട്ടെന്ന പ്രചരണത്തിനു പിന്നാലെയാണ് ഈ നഗരത്തില് ആക്രമണം നടന്നത്. പോസ്റ്റിനു പിന്നാലെ യുവാവിന്റെ വീടിന് പൊലീസ് സുരക്ഷ ഒരുക്കിയിരുന്നു. എന്നാല് പ്രകോപിതരായ അക്രമികള് അയല്ക്കാരുടെ വീടുകള് ആക്രമിക്കുകയായിരുന്നു. രാജ്യത്തെ വിവിധ നഗരങ്ങളില് സമാനമായ അക്രമങ്ങള് തുടരെ നടന്നു വരികയാണ്.
രാജ്യത്തെ മതസാഹോദര്യം തകര്ക്കാനുള്ള ആസൂത്രിത ശ്രമമാണിതെന്ന് ബംഗ്ലാദേശ് ആഭ്യന്തര മന്ത്രി അസദുസമന് ഖാന് പ്രതികരിച്ചത്. രാജ്യത്തെ ന്യൂനപക്ഷങ്ങളെ എല്ലാ തരത്തിലും സംരക്ഷിക്കുമെന്ന് ബംഗ്ലാദേശ് പ്രധാനമന്ത്രി ഷെയ്ഖ് ഹസീനയും കഴിഞ്ഞ ദിവസം വ്യക്തമാക്കിയിരുന്നു. അക്രമങ്ങള്ക്കെതിരെ രാജ്യത്തെ ഹിന്ദു, ബുദ്ധ, ക്രിസ്ത്യന് യൂണിറ്റി കൗണ്സില് ഒക്ടോബര് 23 മുതല് നിരാഹാര സമരം നടത്താന് തീരുമാനിച്ചിട്ടുണ്ട്. സംഘര്ഷത്തില് 4000 പേര്ക്കെതിരെ ബംഗ്ലാദേശ് പൊലീസ് കേസെടുത്തു.