Author: News Desk

സംസ്ഥാനത്ത് ഒന്ന് മുതൽ 10 വരെയുള്ള ക്ലാസുകളിലെ ഓണപ്പരീക്ഷകൾ ഓഗസ്റ്റ് 24 മുതൽ സെപ്റ്റംബർ 2 വരെ നടത്തുമെന്ന് വിദ്യാഭ്യാസ മന്ത്രി വി ശിവൻകുട്ടി. സെപ്റ്റംബർ 3 മുതൽ ഓണാവധിയായിരിക്കും. സെപ്റ്റംബർ 12ന് സ്കൂൾ തുറക്കുമെന്നും മന്ത്രി പറഞ്ഞു. കോട്ടൺഹിൽ സ്കൂളിലെ വിഷയത്തിൽ വിശദമായ അന്വേഷണത്തിന് ഉത്തരവിട്ടിട്ടുണ്ട്. രണ്ട് ദിവസത്തിനുള്ളിൽ റിപ്പോർട്ട് ലഭിക്കുമെന്നും ഇപ്പോൾ പ്രചരിക്കുന്നതിൽ ഭൂരിഭാഗവും അഭ്യൂഹങ്ങള്‍ ആണെന്നും മന്ത്രി പറഞ്ഞു.

കോഴിക്കോട്: ലൈംഗികാതിക്രമക്കേസിലെ പ്രതിയായ എഴുത്തുകാരൻ സിവിക് ചന്ദ്രൻ സംസ്ഥാനം വിട്ടതായി പൊലീസ് അറിയിച്ചു. കോഴിക്കോട് വെസ്റ്റ്ഹില്ലിലെ വീട്ടിൽ അന്വേഷണ സംഘം നിരവധി തവണ എത്തിയെങ്കിലും കണ്ടെത്താനായില്ല. ഫോൺ സ്വിച്ച് ഓഫാണെന്നും ചില വിവരങ്ങളുടെ അടിസ്ഥാനത്തിൽ അയൽ സംസ്ഥാനങ്ങൾ കേന്ദ്രീകരിച്ച് അന്വേഷണം നടക്കുകയാണെന്നും അന്വേഷണ സംഘം അറിയിച്ചു. യുവ എഴുത്തുകാരിയുടെ പരാതിയിൽ കഴിഞ്ഞയാഴ്ചയാണ് സിവിക് ചന്ദ്രനെതിരെ കൊയിലാണ്ടി പൊലീസ് കേസെടുത്തത്. പട്ടികജാതി പട്ടികവർഗ വിഭാഗങ്ങള്‍ക്കെതിരായ അതിക്രമം, ബലാത്സംഗം, സ്ത്രീത്വത്തെ അപമാനിക്കല്‍ എന്നീ വകുപ്പുകൾ പ്രകാരമാണ് കേസ് രജിസ്റ്റർ ചെയ്തിരിക്കുന്നത്. കേസ് രജിസ്റ്റർ ചെയ്ത് ഒരാഴ്ച കഴിഞ്ഞിട്ടും സിവിക് ചന്ദ്രൻ എവിടെയാണെന്ന് കണ്ടെത്താൻ പൊലീസിന് കഴിഞ്ഞിട്ടില്ലെന്നും ഒരാഴ്ചയ്ക്കകം നടപടിയുണ്ടായില്ലെങ്കിൽ ഉത്തരമേഖല ഐജിയുടെ ഓഫീസിന് മുന്നിൽ സമരം നടത്തുമെന്നും ദലിത് സംഘടനകൾ അറിയിച്ചു. ഐജിയുടെ ഓഫീസിന് മുന്നിൽ കുടിൽ നിർമ്മിച്ച് സമരം തുടങ്ങാനാണ് ദളിത് സംഘടനകളുടെ തീരുമാനം. പരാതിയിൽ നടപടി വൈകുന്നതിൽ ഇടപെടണമെന്നാവശ്യപ്പെട്ട് സാമൂഹിക സാംസ്കാരിക രംഗത്തെ 100 പേർ ഒപ്പിട്ട നിവേദനവും മുഖ്യമന്ത്രിക്ക് സമർപ്പിച്ചിട്ടുണ്ട്.

കണ്ണൂർ: കോൺഗ്രസിനും കെപിസിസി പ്രസിഡന്‍റ് കെ സുധാകരനുമെതിരെ രൂക്ഷവിമർശനവുമായി സിപിഎം കണ്ണൂർ ജില്ലാ സെക്രട്ടറി എം വി ജയരാജൻ. എൽ.ഡി.എഫിലെ അസംതൃപ്തരായ സഖ്യകക്ഷികളെ മുന്നണിയിലേക്ക് കൊണ്ടുവരണമെന്ന് ആവശ്യപ്പെട്ട് കഴിഞ്ഞ ദിവസം നടന്ന കോൺഗ്രസ് ചിന്തൻ ശിബിരത്തിൽ കോൺഗ്രസ് രാഷ്ട്രീയ പ്രമേയം അവതരിപ്പിച്ചിരുന്നു. ഇതിനെതിരെയാണ് ജയരാജന്‍റെ വിമർശനം. സ്വന്തം പാളയത്തിലെ ഉൾപ്പോരും ഗ്രൂപ്പ് തർക്കവും ശക്തിപ്പെടുത്താൻ മാത്രമാണ് കോൺഗ്രസ് ശിബിരം സഹായിച്ചതെന്നും പാൽ നൽകിയ കൈയിൽ കൊത്തുന്ന രാഷ്ട്രീയം നടപ്പാക്കുന്നവർ ഒരിക്കലും നേരെയാകാൻ പോകുന്നില്ലെന്നും എം.വി ജയരാജൻ ഫേസ്ബുക്ക് പോസ്റ്റിൽ പറഞ്ഞു. പോസ്റ്റിന്‍റെ പൂർണ്ണരൂപം: “പാല് നൽകിയ കൈയ്ക്ക് തന്നെ കൊത്തുന്നവരുടെ രാഷ്ട്രീയം” പാല് നൽകിയ കൈയ്ക്ക് തന്നെ തിരിച്ചു കൊത്തുന്ന രാഷ്ട്രീയരംഗത്തുള്ള ഒരാളുടെ പേര് പറയാമോ? ഒരു ക്ലൂ തരാം. കോൺഗ്രസിലാണ് കക്ഷി. ആജാനുബാഹുവാണ് ആൾ. ഇപ്പോൾ പിടികിട്ടി അല്ലെ! വോട്ട് നൽകിയാൽ ഇരന്നു വാങ്ങിയ മരണം സമ്മാനിക്കുന്ന ശീലം. കെ പി സി സി പ്രസിഡന്റ് സ്ഥാനം ലഭിച്ച ശേഷം…

ആലപ്പുഴ: നിയമനത്തിനെതിരായ പ്രതിഷേധങ്ങൾക്കിടെ ശ്രീറാം വെങ്കിട്ടരാമൻ ആലപ്പുഴ കളക്ടറായി ചുമതലയേറ്റു. എറണാകുളം കളക്ടറാകാൻ പോകുന്ന ഭാര്യ രേണു രാജിൽ നിന്നാണ് ശ്രീറാം ചുമതലയേറ്റത്. ശ്രീറാമിന്‍റെ വാഹനം കളക്ടറേറ്റിലെത്തിയപ്പോൾ യൂത്ത് കോൺഗ്രസ് പ്രവർത്തകർ കരിങ്കൊടി കാണിച്ച് പ്രതിഷേധിച്ചു. വൻ പോലീസ് സംഘം സ്ഥലത്തുണ്ടായിരുന്നു. യൂത്ത് കോൺഗ്രസ് പ്രവർത്തകരെ പോലീസ് അറസ്റ്റ് ചെയ്ത് നീക്കി. മാധ്യമപ്രവർത്തകൻ കെ.എം ബഷീറിനെ കൊലപ്പെടുത്തിയ കേസിലെ പ്രതിയായ ശ്രീറാമിനെ കളക്ടറായി നിയമിച്ചതിനെതിരെ ജില്ലയിൽ വലിയ പ്രതിഷേധമാണ് ഉയരുന്നത്.

തിരുവനന്തപുരം: കേന്ദ്രത്തിന്‍റെ നടപടികൾ മൂലം സംസ്ഥാനം കടുത്ത സാമ്പത്തിക പ്രതിസന്ധി നേരിടുകയാണെന്ന് ചൂണ്ടിക്കാണിച്ച് സംസ്ഥാന സർക്കാർ കേന്ദ്ര ധനമന്ത്രാലയത്തിന് കത്തയച്ചു. റവന്യൂ കമ്മി, ഗ്രാന്‍റുകളിലെ കുറവ്, ജിഎസ്ടി നഷ്ടപരിഹാരം നിർത്തലാക്കൽ എന്നിവ ഈ വർഷം സംസ്ഥാനത്തിന്‍റെ സാമ്പത്തിക ആരോഗ്യത്തെ സാരമായി ബാധിച്ചു. സംസ്ഥാനത്തിന്‍റെ വായ്പാ പരിധി ധനമന്ത്രാലയം ഏകപക്ഷീയമായി കുറച്ചതായി ധനമന്ത്രി കെ എൻ ബാലഗോപാൽ കേന്ദ്രത്തിന് അയച്ച കത്തിൽ പറഞ്ഞു. കിഫ്ബിയും പെൻഷൻ കമ്പനിയും എടുത്ത വായ്പ സംസ്ഥാനത്തിന്‍റെ കടപ്പത്ര അക്കൗണ്ടിൽ ഉൾപ്പെടുത്തരുതെന്നും ബാലഗോപാൽ ആവശ്യപ്പെട്ടു. കേന്ദ്രസർക്കാരിന്റെ ഏകപക്ഷീയമായ തീരുമാനങ്ങൾ ഭരണഘടനാപരമായ അവകാശങ്ങളുടെ ലംഘനമാണെന്ന് മന്ത്രി ചൂണ്ടിക്കാട്ടി. കിഫ്ബിയും, പെൻഷൻ കമ്പനിയായ സോഷ്യൽ സെക്യൂരിറ്റി പെൻഷൻ ലിമിറ്റഡും വഴി എടുത്ത 14,000 കോടി രൂപയുടെ കടം കേരളത്തിന്‍റെ കടമെടുക്കൽ പരിധിയിൽ ഉൾപ്പെടുത്തിയതായി കാണിച്ച് കേന്ദ്രസർക്കാർ സംസ്ഥാനത്തിന് നോട്ടീസ് നൽകിയിരുന്നു. ഇതിനെതിരെയാണ് കെ.എൻ. ബാലഗോപാലിന്‍റെ കത്ത്.

തിരുവനന്തപുരം: സംസ്ഥാന സർക്കാരിന്റെ അഭിമാന പദ്ധതിയായ കെ-റെയിലിന്‍റെ തുടർ പ്രവർത്തനങ്ങൾ വീണ്ടും പ്രതിസന്ധിയിലായി. നിശ്ചിത സമയത്തിനുള്ളിൽ സാമൂഹിക ആഘാത പഠനം പൂർത്തിയാകാത്തതിനാൽ ഭൂമി ഏറ്റെടുക്കൽ പ്രക്രിയ ഇനിയും വൈകുമെന്ന് വ്യക്തമായി. ഭൂമി ഏറ്റെടുക്കൽ നിയമപ്രകാരം ആറ് മാസത്തിനകം സാമൂഹികാഘാത പഠനം പൂർത്തിയാക്കണം. ജില്ലകളിലെ സാമൂഹിക ആഘാത പഠനത്തിന്‍റെ ചുമതല വിവിധ ഏജൻസികൾക്കാണ് നൽകിയത്. ചുരുക്കം ചില ജില്ലകളൊഴികെ മിക്ക ജില്ലകളിലും പഠനകാലാവധി അവസാനിച്ചിട്ടുണ്ട്. ബാക്കിയുള്ളവ ഈ മാസത്തോടെ അവസാനിക്കും. സാമൂഹികാഘാത പഠനം തുടരണമെങ്കിൽ സർക്കാർ ഇതുമായി ബന്ധപ്പെട്ട മുൻ വിജ്ഞാപനം പുതുക്കേണ്ടി വരും. എന്നാൽ, അത്തരമൊരു തീരുമാനം ഇതുവരെ എടുത്തിട്ടില്ല. 11 ജില്ലകളിലാണ് സാമൂഹികാഘാത പഠനം നടത്തിയത്. പഠനത്തിന്‍റെ നിലവിലെ സ്ഥിതി വ്യക്തമാക്കാൻ ഏജൻസികൾക്ക് റവന്യൂ വകുപ്പ് നിർദ്ദേശം നൽകിയിട്ടുണ്ട്.

ചെന്നൈ: തമിഴ്നാട്ടിൽ വീണ്ടും ദുരഭിമാനക്കൊല. കൂലിപ്പണിക്കാരനെ പ്രണയിച്ച് വിവാഹം കഴിച്ചതിനെ തുടർന്നാണ് പിതാവ് മകളെയും ഭർത്താവിനെയും വെട്ടിക്കൊലപ്പെടുത്തിയത്. തൂത്തുക്കുടി സ്വദേശികളായ രേഷ്മ, മണിക്കരാജു എന്നിവരാണ് മരിച്ചത്. ഇരട്ടക്കൊലപാതകത്തിന് ശേഷം ഒളിവിൽ പോയ പ്രതി മുത്തുക്കുട്ടിയെ പൊലീസ് പിടികൂടി. കഴിഞ്ഞ ദിവസം ഒളിച്ചോടി വിവാഹം കഴിച്ചവരെ വീരപ്പട്ടി പഞ്ചായത്ത് അധികൃതരാണ് ഗ്രാമത്തിലേക്ക് തിരികെ കൊണ്ടുവന്നത്. തുടർന്ന് വാടകവീട്ടിൽ താമസിക്കുമ്പോഴായിരുന്നു സംഭവം. ആർ.സി. സ്ട്രീറ്റ് സ്വദേശിനിയായ രേഷ്മ കോവിൽപട്ടിയിലെ കോളേജിലെ രണ്ടാം വർഷ ബിരുദ വിദ്യാർത്ഥിനിയാണ്. അയൽവാസിയായ മണികരാജുവുമായി രേഷ്മ ഏറെക്കാലമായി പ്രണയത്തിലായിരുന്നു. എന്നാൽ രേഷ്മയുടെ കുടുംബം ഈ ബന്ധത്തെ ശക്തമായി എതിർത്തു. തുടർന്ന് ഇരുവരും വീടുവിട്ടിറങ്ങി കുറച്ച് ദിവസങ്ങൾക്ക് മുമ്പ് വിവാഹിതരായി. പിന്നീട് വീരപ്പട്ടി പഞ്ചായത്ത് അധികൃതർ ഇവരെ കണ്ട് ഗ്രാമത്തിലേക്ക് തിരികെ കൊണ്ടുവന്നു. എന്നാൽ, വീട്ടുകാരുടെ എതിർപ്പിനെത്തുടർന്ന് ഇവർ വാടകവീട്ടിൽ താമസിച്ചു. ഇരുവരെയും കാണാനെത്തിയ പെൺകുട്ടിയെ അച്ഛൻ മുത്തുക്കുട്ടി ഇരുവരെയും അരിവാൾ കൊണ്ട് വെട്ടിക്കൊലപ്പെടുത്തുകയായിരുന്നു. മരണം ഉറപ്പാക്കിയ ശേഷമാണ് മുത്തുക്കുട്ടി സംഭവസ്ഥലത്ത്…

റിലയൻസ് ജിയോയും ഭാരതി എയർടെല്ലും ഉൾപ്പെടെ നാല് കമ്പനികൾ, 4.3 ലക്ഷം കോടി രൂപ വിലമതിക്കുന്ന 72 ജിഗാഹെർട്സ് റേഡിയോവേവുകൾക്കായി നാളെ ലേലം വിളിക്കാൻ ഒരുങ്ങുകയാണ്. ചൊവ്വാഴ്ച രാവിലെ 10 മണിക്ക് ആരംഭിക്കുന്ന ലേല പ്രക്രിയ വൈകുന്നേരം 6 മണി വരെ നീളും. ലേലത്തിന്‍റെ ദിവസങ്ങളുടെ എണ്ണം റേഡിയോവേവുകളുടെ യഥാർത്ഥ ആവശ്യകതയെയും വ്യക്തിഗത ലേലക്കാരുടെ സ്ട്രാറ്റജിയെയും ആശ്രയിച്ചിരിക്കുമെന്ന് ടെലികോം വകുപ്പ് വൃത്തങ്ങൾ പറഞ്ഞു.

തിരുവനന്തപുരം: സി.എസ്.ഐ ദക്ഷിണ കേരള മഹാഇടവകയില്‍ എൻഫോഴ്സ്മെന്‍റ് ഡയറക്ടറേറ്റ് (ഇ.ഡി) പരിശോധന നടത്തി. കാരക്കോണം മെഡിക്കൽ കോളേജ് തട്ടിപ്പുമായി ബന്ധപ്പെട്ടാണ് റെയ്ഡ് നടത്തിയത്. ബിഷപ്പ് ധർമ്മരാജ് റസാലം, കോളേജ് ഡയറക്ടർ ബെന്നറ്റ് എബ്രഹാം, സെക്രട്ടറി ടി.പി പ്രവീൺ എന്നിവർക്കെതിരെ കള്ളപ്പണം വെളുപ്പിച്ചതിന് ഇ.ഡി കേസെടുത്തിരുന്നു. സഭാ ആസ്ഥാനത്തിന് പുറമെ മൂന്നിടങ്ങളിൽ കൂടി ഇ.ഡി പരിശോധന നടത്തി. കാരക്കോണം മെഡിക്കൽ കോളേജ് സെക്രട്ടറി ടി.പി. പ്രവീണിന്‍റെ വീട്ടിലും കോളേജ് ഡയറക്ടർ ബെന്നറ്റ് എബ്രഹാമിന്‍റെ വീട്ടിലുമാണ് റെയ്ഡ് നടന്നത്. ഇ.ഡി സംഘം പരിശോധന പൂർത്തിയാക്കി മടങ്ങി. 13 മണിക്കൂറോളം പരിശോധന നടത്തി. അതേസമയം, ഇഡി നടപടിക്കിടെ സഭാ ആസ്ഥാനത്ത് പ്രതിഷേധം ഉയർന്നിരുന്നു. ബിഷപ്പിനെ പിന്തുണയ്ക്കുകയും എതിർക്കുകയും ചെയ്തവർ നേര്‍ക്കുനേരായിരുന്നു പ്രതിഷേധം. പരിശോധന പൂർത്തിയാക്കി ഇ.ഡി ഉദ്യോഗസ്ഥർ മടങ്ങിയതായി സഭാപ്രതിനിധി അറിയിച്ചു. പരിശോധനയിൽ ഒന്നും കണ്ടെത്താൻ കഴിഞ്ഞില്ലെന്ന് സഭാ പ്രതിനിധി റവ. ജയരാജ് പറഞ്ഞു.

ഇടപാടുകൾ കൂടുതൽ സുരക്ഷിതമാക്കാനും അനധികൃത ഇടപാടുകൾ ഒഴിവാക്കാനുമായി എടിഎം വഴിയുളള പണമിടപാടുകൾക്ക് ഒടിപി വരുന്നു. സ്റ്റേറ്റ് ബാങ്ക് ഓഫ് ഇന്ത്യ ഇടപാടുകൾക്ക് ഒടിപി നിർബന്ധമാക്കിയിട്ടുണ്ട്. 10,000 രൂപയ്ക്ക് മുകളിലുള്ള പണം പിൻവലിക്കാനാണ് ഒടിപി കൊണ്ടുവരുന്നത്. മറ്റ് ബാങ്കുകളും ഇടപാടുകൾക്കായി ഒടിപി കൊണ്ടുവരുമെന്ന് സൂചനയുണ്ട്. നാലക്ക നമ്പർ ഒടിപിയായി ലഭിക്കും. അതിനാൽ, ഇപ്പോൾ മുതൽ, ഡെബിറ്റ് കാർഡ് ഉപയോഗിച്ച് പണം പിൻവലിക്കുമ്പോൾ, ഫോൺ കൈവശം വയ്ക്കേണ്ടിവരും. എടിഎം കാർഡ് സ്വൈപ്പ് ചെയ്തതിന് ശേഷം, പിൻവലിക്കേണ്ട തുക ടൈപ്പുചെയ്യുക. തുടർന്ന് ഒടിപി നമ്പർ ബാങ്കിൽ രജിസ്റ്റർ ചെയ്ത ഫോൺ നമ്പറിൽ എത്തും. ആ നമ്പർ ടൈപ്പ് ചെയ്ത ശേഷം നിങ്ങൾക്ക് പണം പിൻവലിക്കാം. 2020 ജനുവരി മുതൽ എസ്ബിഐ സേവനങ്ങൾക്ക് ഒടിപി സേവനം ലഭ്യമാണ്. സോഷ്യൽ മീഡിയ പ്ലാറ്റ്ഫോമുകൾ വഴി അനധികൃത സാമ്പത്തിക ഇടപാടുകളെയും കുറ്റകൃത്യങ്ങളെയും കുറിച്ച് എസ്ബിഐ ഉപഭോക്താക്കൾക്ക് പ്രത്യേക നിർദ്ദേശങ്ങൾ നൽകുന്നുണ്ട്. ഇടപാടുകളിൽ കൂടുതൽ സുരക്ഷ ഉറപ്പാക്കാനാണ് നീക്കം. ഈ വർഷം…