യൂറോപ്പിൽ നടന്ന എൻഡുറൻസ് കാറോട്ട മത്സരത്തിനിടെ തമിഴ് നടൻ അജിത് കുമാറിന്റെ വാഹനം അപകടത്തിൽപ്പെട്ടു. അപകടത്തിൽ താരത്തിന് പരിക്കുകളൊന്നും സംഭവിച്ചിട്ടില്ലെന്നാണ് റിപ്പോർട്ട്.
അതിവേഗത്തിൽ സഞ്ചരിക്കുന്നതിനിടെ അജിത്തിന്റെ കാറിന്റെ നിയന്ത്രണം നഷ്ടപ്പെടുകയും ട്രാക്കിലുണ്ടായിരുന്ന മറ്റൊരു വാഹനവുമായി കൂട്ടിയിടിക്കുകയുമായിരുന്നുവെന്നാണ് ‘ഫിലിമിബീറ്റ് തമിഴ്’ റിപ്പോർട്ട് ചെയ്തത്. കൂട്ടിയിടിയിൽ കാറിന് കാര്യമായ കേടുപാടുകൾ സംഭവിച്ചു.
അപകടത്തിനു പിന്നാലെ അജിത് സുരക്ഷിതമായി കാറിൽനിന്ന് പുറത്തിറങ്ങി. അദ്ദേഹത്തിന് പരിക്കില്ലെന്ന വിവരം പുറത്തുവന്നതോടെ ആശങ്കയിലായിരുന്ന ആരാധകർക്കും മോട്ടോർസ്പോർട് പ്രേമികൾക്കും ആശ്വാസമായി.
വർഷങ്ങളായി മോട്ടോർസ്പോർട് രംഗത്ത് സജീവമായ അജിത് ‘അജിത് കുമാർ റേസിങ്’ എന്ന പേരിൽ സ്വന്തം ടീം രൂപീകരിച്ചിട്ടുണ്ട്. ഏഷ്യൻ ലെ മാൻസ് സീരീസ്, മിഷെലിൻ ലെ മാൻസ് കപ്പ് എന്നിവയുൾപ്പെടെയുള്ള അന്താരാഷ്ട്ര എൻഡുറൻസ് റേസിങ് മത്സരങ്ങളിൽ ടീം പങ്കെടുക്കുന്നുണ്ട്.
റേസിങ് ട്രാക്കിൽ അജിത് അപകടത്തിൽപ്പെടുന്നത് ഇതാദ്യമല്ല. മുൻപും മത്സരങ്ങൾക്കും പരിശീലനത്തിനുമിടെ അദ്ദേഹത്തിന്റെ വാഹനങ്ങൾ അപകടത്തിൽപ്പെട്ടിട്ടുണ്ട്. അപകടസാധ്യതകൾക്കിടയിലും മോട്ടോർസ്പോർട്ടിനോടുള്ള അഭിനിവേശം കൈവിടാതെ അന്താരാഷ്ട്ര മത്സരങ്ങളിൽ അദ്ദേഹം സജീവമായി തുടരുകയാണ്.