ന്യൂഡൽഹി: പല സംസ്ഥാനങ്ങളിലും കോവിഡ്വര്ധിക്കുന്ന സാഹചര്യത്തില് രാജ്യത്ത് ഇന്നലെ സ്ഥിരീകരിച്ചത് 2,067 കേസുകള്. കഴിഞ്ഞ ദിവസത്തേക്കാൾ അറുപത് ശതമാനം അധികം കേസുകൾ ഇന്ന് റിപ്പോർട്ട് ചെയ്തു. 40 പേര് കൂടി കോവിഡ് ബാധിച്ചു മരിച്ചതായി കേന്ദ്ര ആരോഗ്യമന്ത്രാലയം അറിയിച്ചു. നിലവില് വൈറസ് ബാധിച്ച് ആശുപത്രികളിലും വീടുകളിലുമായി ചികിത്സയിലുള്ളത് 12,340 പേരാണ്.
നിലവില് കൂടുതല് കൊവിഡ് കേസുകള് റിപ്പോര്ട്ട് ചെയ്യപ്പെട്ടിരിക്കുന്ന പ്രധാന നഗരങ്ങളില് ദില്ലിയാണ് ഏറ്റവും മുമ്പിലുള്ളത്. 632 പേർക്കാണ് തലസ്ഥാനത്ത് ഇന്നലെ കൊവിഡ് സ്ഥിരീകരിച്ചത്. ആരോഗ്യ മന്ത്രാലയത്തിൻ്റെ കണക്ക് പ്രകാരം പ്രതിദിന രോഗികളുടെ എണ്ണത്തിൽ കേരളമാണ് രണ്ടാം സ്ഥാനത്ത്. 488 പേർക്കാണ് കേരളത്തിൽ ഇന്നലെ കൊവിഡ് സ്ഥിരീകരിച്ചത്. മഹാരാഷ്ട്ര, ഉത്തർപ്രദേശ്, ഹരിയാന, മിസോറാം സംസ്ഥാനങ്ങളിലും കൊവിഡ് കേസുകളിൽ വർധനയുണ്ടായി. നിരീക്ഷണവും പ്രതിരോധ പ്രവർത്തനങ്ങളും ഊർജിതമാക്കാൻ ആരോഗ്യ മന്ത്രാലയം ഈ സംസ്ഥാനങ്ങൾക്ക് നിർദേശം നൽകി.
ആക്ടിവ് കേസുകള് ഇന്നലത്തേക്കാള് 480 ആണ് ഉയര്ന്നിട്ടുള്ളത്. പ്രതിദിന പോസിറ്റിവിറ്റി നിരക്ക് 0.49 ശതമാനമാണ്. ഇന്നലെ സ്ഥിരീകരിച്ച 40 മരണങ്ങളില് 34ഉം കേരളത്തിലാണ്. മഹാരാഷ്ട്രയില് മൂന്നു പേരും ഉത്തര്പ്രേദശ്, മിസോറം, നാഗാലാന്ഡ് എന്നിവിടങ്ങളില് ഓരോരുത്തരും മരിച്ചു.
ഇതുവരെ രാജ്യത്ത് കോവിഡ് ബാധിച്ചു മരിച്ചത് 5,22,006 പേരാണ്. ഇതില് 1,47,830 പേര് മഹാരാഷ്ട്രയിലാണ്. 68,649 പേര് കേരളത്തിലും 40,057 പേര് കര്ണാടകയിലുമാണ് മരിച്ചത്. തമിഴ്നാട്38025, ഡല്ഹി 26,160 യുപി 23,502, എന്നിങ്ങനെയാണ് മരണ സംഖ്യ.