മുംബൈ: അന്താരാഷ്ട്ര ഒളിംപിക് കമ്മിറ്റിയുടെ 2023-ലെ യോഗത്തിന് മുംബൈ ആതിഥേയത്വം വഹിക്കും. ഐഒസി സെഷന്‍ 2022ല്‍ വോട്ടിംഗിലൂടെയാണ് മുംബൈയെ അടുത്തെ യോഗത്തിനുള്ള ആതിഥേയ നഗരമായി ഔദ്യോഗികമായി പ്രഖ്യാപിച്ചത്. മൊത്തം 82 ഐഒസി അംഗങ്ങള്‍ വോട്ടുചെയ്യാന്‍ യോഗ്യരായിരുന്നു, അതില്‍ 6 പേര്‍ വിട്ടുനില്‍ക്കാന്‍ വോട്ട് ചെയ്തു, 75 അംഗങ്ങള്‍ മുംബൈയ്ക്ക് അനുകൂലമായി വോട്ട് ചെയ്തു. അടുത്ത ഐഒസി സെഷന്റെ ആതിഥേയത്വത്തിനായി മുംബൈയ്‌ക്കെതിരെ ഒരു വോട്ട് മാത്രമാണ് ലഭിച്ചത്.
അന്താരാഷ്ട്ര ഒളിംപിക്സ് കമ്മിറ്റി അംഗ രാജ്യങ്ങളുടെ പൊതുയോഗമാണ് ഐഒസി സെഷന്‍. ഇത് IOC യുടെ ഏറ്റവും ഉന്നതമായ കൂടിച്ചേരലാണ്. ഈ യോഗത്തില്‍വെച്ചാണ് ഒളിംപിക്സ് വേദി ഉള്‍പ്പടെയുള്ള സുപ്രധാന തീരുമാനങ്ങള്‍ കൈക്കൊള്ളുന്നത്. ഐഒസിയുടെ 2023-ലെ പൊതുയോഗം മുംബൈ ജിയോ വേള്‍ഡ് സെന്ററില്‍ നടക്കും. “ഇത്തരം അഭിമാനകരമായ ഒളിമ്ബിക് കമ്മിറ്റിയുടെ ഉന്നത യോഗത്തിന് ആതിഥേയത്വം വഹിക്കുന്നതിലേക്ക് ഇന്ത്യന്‍ പ്രതിനിധി സംഘത്തെ നയിക്കാന്‍ സാധിച്ചത് അഭിമാനകരമാണ്,” അന്താരാഷ്ട്ര ഒളിമ്ബിക് കമ്മിറ്റി അംഗം നിത അംബാനി പറഞ്ഞു.
