തിരുവനന്തപുരം: സിഎംആർഎൽ–എക്സാലോജിക് സാമ്പത്തിക ഇടപാടുമായി ബന്ധപ്പെട്ട് പ്രതിപക്ഷ നേതാവ് പിണറായി വിജയനെതിരെ അഴിമതി നിരോധന നിയമപ്രകാരം കേസെടുക്കണമെന്ന എൻഫോഴ്സ്മെന്റ് ഡയറക്ടറേറ്റിന്റെ കത്തിൽ നിയമപരിശോധന പൂർത്തിയാക്കിയശേഷം തീരുമാനമെടുക്കുമെന്ന് മുഖ്യമന്ത്രി വി.ഡി. സതീശൻ. വിഷയത്തിൽ രാഷ്ട്രീയ പരിഗണനകളില്ലെന്നും തീരുമാനം വൈകാതെ പ്രഖ്യാപിക്കുമെന്നും അദ്ദേഹം വാർത്താസമ്മേളനത്തിൽ വ്യക്തമാക്കി.
രാഷ്ട്രീയ പാർട്ടികൾ കമ്പനികളിൽനിന്നും സ്ഥാപനങ്ങളിൽനിന്നും സംഭാവന സ്വീകരിക്കുന്നത് സാധാരണമാണ്. എന്നാൽ സിഎംആർഎൽ–എക്സാലോജിക് ഇടപാട് അതിൽനിന്ന് വ്യത്യസ്തമാണെന്നാണ് ഇഡി കൈമാറിയ വിവരങ്ങൾ സൂചിപ്പിക്കുന്നതെന്ന് സതീശൻ പറഞ്ഞു. ഈ കേസുമായി ബന്ധപ്പെട്ട കാര്യങ്ങൾ മാത്രമല്ല, അതിനപ്പുറമുള്ള ഗൗരവമേറിയ വിവരങ്ങളും തെളിവുകളും ഇഡിയുടെ കത്തിലുണ്ടെന്നും അദ്ദേഹം വ്യക്തമാക്കി.
കേന്ദ്ര അന്വേഷണ ഏജൻസി കൈമാറിയ വിവരങ്ങളിൽ നിയമപരമായ പരിശോധന നടത്തേണ്ടത് സർക്കാരിന്റെ ഉത്തരവാദിത്വമാണ്. കത്ത് അയച്ചത് ഇഡിയാണെന്ന കാരണത്താൽ മാത്രം അത് തള്ളിക്കളയാൻ സർക്കാരിന് കഴിയുമോയെന്നും സതീശൻ ചോദിച്ചു.
സോണിയ ഗാന്ധിക്കും രാഹുൽ ഗാന്ധിക്കുമെതിരെ കേന്ദ്ര ഏജൻസികൾ അന്വേഷണം നടത്തിയപ്പോൾ കോൺഗ്രസ് അതിനെ നിയമപരമായാണ് നേരിട്ടത്. രാഹുൽ ഗാന്ധി മണിക്കൂറുകളോളം ചോദ്യംചെയ്യലിന് ഹാജരാകുകയും അന്വേഷണവുമായി പൂർണമായി സഹകരിക്കുകയും ചെയ്തു. രാഷ്ട്രീയ ലക്ഷ്യങ്ങൾ പ്രകടമായ ഘട്ടങ്ങളിൽ അത് തുറന്നുകാട്ടിയിട്ടുമുണ്ട്. അതിൽ എന്താണ് തെറ്റെന്നും വി.ഡി. സതീശൻ ചോദിച്ചു.