തിരുവനന്തപുരം: തൃശൂരിൽ ബി.ജെ.പി. നേടിയ വിജയം മുഖ്യമന്ത്രി പിണറായി വിജയൻ സ്വർണത്താലത്തിൽ വെച്ചു നൽകിയ സമ്മാനമാണെന്ന് യു.ഡി.എഫ്. കൺവീനർ എം.എം. ഹസൻ. കേന്ദ്ര, സംസ്ഥാന സര്ക്കാരുകളുടെ ജനവിരുദ്ധ നയങ്ങള്ക്കുള്ള തിരിച്ചടിയാണ് തെരഞ്ഞെടുപ്പ് ഫലമെന്നും അദ്ദേഹം വാർത്താസമ്മേളനത്തിൽ പറഞ്ഞു.
സി.പി.എം. കേരളത്തില് വര്ഗീയ ധ്രുവീകരണത്തിനു ശ്രമിച്ചു. തൃശൂരിലെ പരാജയം സംബന്ധിച്ച് പഠിക്കും. അവിടെ സിപിഎം- ബിജെപി ഡീല് ഉണ്ടായിരുന്നു. വടകരയില് ഷാഫി പറമ്പിലിനെ വര്ഗീയവാദിയായി ചിത്രീകരിച്ചാണ് സി.പി.എം. പ്രചാരണം നടത്തിയത്. ഷാഫിക്ക് വമ്പിച്ച ഭൂരിപക്ഷം ലഭിച്ച സാഹചര്യത്തില് കെ.കെ. ശൈലജയും സി.പി.എമ്മും ജനങ്ങളോടു മാപ്പു പറയണം. വടകരയില് സമാധാനപരമായി കഴിഞ്ഞ ജനതയെ വര്ഗീയമായി ഭിന്നിപ്പിക്കാനുള്ള ശ്രമമാണ് പരാജയപ്പെട്ടത്. മോദി കേന്ദ്രത്തില് നടത്തിയതിനു സമാനമായ പ്രചാരണമാണ് അവിടെ ഇടതുപക്ഷം നടത്തിയത്.
ലോക്സഭാ തിരഞ്ഞെടുപ്പ് സംസ്ഥാന സര്ക്കാരിന്റെ വിലയിരുത്തലാണെന്ന് സി.പി.എം. സംസ്ഥാന സെക്രട്ടറി ഉള്പ്പെടെ പറഞ്ഞു. അങ്ങനെയെങ്കില് സര്ക്കാരിന് തുടരാന് അവകാശമില്ല. വമ്പിച്ച വിജയം നേടിയപ്പോള് ആവേശത്തോടെ ജനങ്ങളെ അഭിമുഖീകരിച്ച മുഖ്യമന്ത്രി എന്തുകൊണ്ടാണ് വമ്പിച്ച പരാജയമുണ്ടായപ്പോള് ജനങ്ങളെ അഭിമുഖീകരിക്കാന് ധൈര്യം കാണിക്കാതെ ഒളിച്ചോടുന്നത്? അതിനുള്ള ആര്ജവം മുഖ്യമന്ത്രി കാട്ടിയില്ലെന്നും ഹസന് പറഞ്ഞു.