ന്യൂഡല്ഹി: ലോക്സഭയിലെ 141 പ്രതിപക്ഷാംഗങ്ങളെ സസ്പെന്ഡ് ചെയ്തതിനുപിന്നാലെ കേന്ദ്രസര്ക്കാരിനെതിരെ പരിഹാസവുമായി സമാജ്വാദി പാര്ട്ടി അധ്യക്ഷന് അഖിലേഷ് യാദവ്. ഡിംപിള് യാദവ്, എസ്ടി ഹസന് എന്നീ സമാജ്വാദി പാര്ട്ടിയംഗങ്ങള്ക്കും സസ്പെന്ഷന് ലഭിച്ചതിനെ തുടര്ന്നായിരുന്നു അഖിലേഷിന്റെ പ്രതികരണം. സഭയിലെ മൂന്നില്രണ്ട് പ്രതിപക്ഷനേതാക്കളെ സസ്പെന്ഡ് ചെയ്യാനായിരുന്നു ഉദ്ദേശമെങ്കില് കോടിക്കണക്കിന് രൂപ ചെലവാക്കി പുതിയ പാര്ലമെന്റ് മന്ദിരം പണിയേണ്ട ആവശ്യമുണ്ടായിരുന്നില്ലെന്ന് അഖിലേഷ് യാദവ് പരിഹസിച്ചു.
“ജനങ്ങള്ക്ക് അറിയാനാഗ്രഹമുണ്ട് എംപിമാരെ സസ്പെന്ഡ് ചെയ്യാനായിരുന്നെങ്കില് പുതിയ പാര്ലമെന്റ് മന്ദിരം നിര്മിക്കേണ്ട ആവശ്യമുണ്ടായിരുന്നോ? സസ്പെന്ഡ് ചെയ്യാനുള്ള അംഗങ്ങള്ക്കായി പഴയ പാര്ലമെന്റില്ത്തന്നെ പുതിയൊരു മുറി പണികഴിപ്പിച്ചാല് മതിയായിരുന്നില്ലേ…”, ഉത്തര്പ്രദേശ് മുന് മുഖ്യമന്ത്രി കൂടിയായ അഖിലേഷ് യാദവ് എക്സ് പ്ലാറ്റ്ഫോമില് കുറിച്ചു. ഈ സര്ക്കാരില് ചോദ്യമുന്നയിക്കാനോ ചര്ച്ച നടത്താനോ അനുവാദമില്ലെന്നും അഖിലേഷ് യാദവ് കൂട്ടിച്ചേര്ത്തു.
ഇക്കൊല്ലം സെപ്റ്റംബറില് പ്രധാനമന്ത്രി നരേന്ദ്ര മോദി ഉദ്ഘാടനം ചെയ്ത പുതിയ പാര്ലമെന്റ് മന്ദിരത്തില് ലോക്സഭയിലും രാജ്യസഭയിലുമായി 1,200 ലധികം എംപിമാര്ക്ക് ഇരിക്കാനുള്ള സൗകര്യമുണ്ട്. കൂടാതെ എംപിമാര്ക്കും അവരുടെ സ്റ്റാഫിനുമായി ആധുനിക സൗകര്യങ്ങളോടുകൂടിയ ഓഫീസുകളും പുതിയ പാര്ലമെന്റിലുണ്ട്.