മനാമ: ബഹ്റൈനിൽ തുറസായ സ്ഥലങ്ങളിൽ ജോലി ചെയ്യുന്ന തൊഴിലാളികൾക്കായി ചൂട് വര്ധിക്കുന്ന ജൂലായ്, ആഗസ്റ്റ് മാസങ്ങളില് ഏർപ്പെടുത്തിയ തൊഴിൽ നിയന്ത്രണം 99.92 ശതമാനം സ്ഥാപനങ്ങളും പാലിച്ചതായി തൊഴില്കാര്യമന്ത്രി ജമീല് ബിന് മുഹമ്മദ് അലി ഹുമൈദാന് അറിയിച്ചു. കഴിഞ്ഞ വര്ഷം ഇത് 99.87 ശതമാനമായിരുന്നു. ഉച്ചയ്ക്ക് 12 മണി മുതൽ 4 മണിവരെയാണ് ജോലിചെയ്യുന്നതിന് നിയന്ത്രണം ഏർപ്പെടുത്തിയിരുന്നത്. ജൂലായ്, ആഗസ്റ്റ് മാസങ്ങളിലായി ആകെ 21,723 പരിശോധനകളാണ് നടത്തിയത്.
വിവിധ സൈറ്റുകളില് നടന്ന പരിശോധനയില് 16 തൊഴിലുടമകളും 31 തൊഴിലാളികളുമാണ് നിയമലംഘനം നടത്തിയതായി കണ്ടെത്തിയത്. നിയമലംഘകര്ക്കെതിരേ നടപടികള് സ്വീകരിക്കും. ഒരു തൊഴിലാളിക്ക് 500 ദീനാര് മുതല് 1,000 ദിനാര്വരെ പിഴ ചുമത്തും. വേനൽക്കാല തൊഴിൽ നിയന്ത്രണത്തിന് വര്ഷംതോറും മികച്ച പ്രതികരണമാണ് തൊഴിലുടമകളില്നിന്ന് ലഭിക്കുന്നത്. വേനൽ കഠിനമാകുമ്പോൾ തൊഴിലാളികൾക്ക് വിശ്രമം അനുവദിക്കുന്നതിലൂടെ അവരുടെ ഉത്പാദനക്ഷമത വർധിപ്പിക്കുകയും ആരോഗ്യം മെച്ചപ്പെടുകയും ചെയ്യുന്നു. നിയന്ത്രണം ഏര്പ്പെടുത്തിയശേഷം സൂര്യാഘാതം മൂലമുള്ള അപകടങ്ങള് ഏറെ കുറഞ്ഞതായി മന്ത്രി വ്യക്തമാക്കി.