ഓസ്‌ലോ: 2026-ലെ സമാധാനത്തിനുള്ള നൊബേൽ പുരസ്കാരം ഇന്ത്യൻ വംശജയായ ദക്ഷിണാഫ്രിക്കൻ മനുഷ്യാവകാശ പ്രവർത്തകയും നിയമവിദഗ്ധയുമായ നവനീതം നവി പിള്ളയ്ക്ക്. സമാധാനവും അന്താരാഷ്ട്ര നിയമങ്ങളും ശക്തിപ്പെടുത്തുന്നതിനായി നടത്തിയ പ്രവർത്തനങ്ങൾ പരിഗണിച്ചാണ് നോർവീജിയൻ നൊബേൽ സമിതി പുരസ്കാരം പ്രഖ്യാപിച്ചത്.
ഐക്യരാഷ്ട്രസഭയുടെ മനുഷ്യാവകാശ ഹൈക്കമ്മീഷണറായി 2008 മുതൽ 2014 വരെ സേവനമനുഷ്ഠിച്ച നവി പിള്ള അന്താരാഷ്ട്ര നീതിന്യായ രംഗത്ത് ശ്രദ്ധേയമായ സംഭാവനകൾ നൽകിയിട്ടുണ്ട്.
റുവാണ്ടയ്ക്കായുള്ള അന്താരാഷ്ട്ര ക്രിമിനൽ ട്രൈബ്യൂണലിൽ ജഡ്ജിയായും പ്രസിഡന്റായും പ്രവർത്തിച്ച അവർ, ലൈംഗികാതിക്രമങ്ങളെ വംശഹത്യയുടെ ഭാഗമായി പരിഗണിക്കുന്ന സുപ്രധാന നിയമനടപടികളിൽ നിർണായക പങ്കുവഹിച്ചു. 2003 മുതൽ 2008 വരെ അന്താരാഷ്ട്ര ക്രിമിനൽ കോടതിയിലും ജഡ്ജിയായി സേവനമനുഷ്ഠിച്ചു.
പലസ്തീൻ പ്രദേശങ്ങളിലെ മനുഷ്യാവകാശ ലംഘനങ്ങൾ അന്വേഷിക്കുന്ന ഐക്യരാഷ്ട്രസഭയുടെ സ്വതന്ത്ര അന്വേഷണ കമ്മീഷന്റെ അധ്യക്ഷയായും പ്രവർത്തിച്ചിട്ടുണ്ട്.
1941-ൽ ദക്ഷിണാഫ്രിക്കയിലെ ഡർബനിൽ ജനിച്ച നവി പിള്ളയുടെ കുടുംബവേരുകൾ തമിഴ്‌നാട്ടിലാണ്. അവരുടെ മുത്തച്ഛൻ കരാർ തൊഴിലാളിയായി ഇന്ത്യയിൽനിന്ന് ദക്ഷിണാഫ്രിക്കയിലെത്തിയതാണ്.
മനുഷ്യാവകാശ സംരക്ഷണം, അന്താരാഷ്ട്ര നീതി, യുദ്ധക്കുറ്റങ്ങൾക്കെതിരായ നിയമനടപടികൾ എന്നിവയ്ക്കായി പതിറ്റാണ്ടുകളായി നടത്തിയ പ്രവർത്തനങ്ങൾക്കുള്ള അംഗീകാരമായാണ് സമാധാന നൊബേൽ പുരസ്കാരം നവി പിള്ളയെ തേടിയെത്തിയത്.