അബഹ: ഉല്ലാസയാത്രക്കിടെ മരുഭൂമിയിൽ കാണാതായ യുവാവിനെ മൂന്നാം ദിവസം തളർന്ന നിലയിൽ സ്പെഷ്യൽ ഫോഴ്സ് കണ്ടെത്തി. മരുഭൂമിയിൽ ഉല്ലാസത്തിനായി തുറൈഫിൽ നിന്ന് പോയ നാലംഗ സംഘ യുവാക്കളിൽ നിന്ന് ഒരു യുവാവിനെ യാത്രക്കിടെ കാണാതാവുകയായിരുന്നു. തെരച്ചിലിനൊടുവിൽ മൂന്നാം ദിവസമാണ് കണ്ടെത്തിയത്.
പരിസ്ഥിതി വകുപ്പിന് കീഴിലുള്ള സ്പെഷ്യൽ ഫോഴ്സാണ് യുവാവിനെ രക്ഷപ്പെടുത്തിയത്. മൂന്ന് ദിവസം മുമ്പാണ്, മരുഭൂമിയിൽ പൊതുജനങ്ങൾക്ക് പ്രവേശനം നിരോധിച്ച സംരക്ഷിത മേഖലയിൽ യുവാക്കളുടെ സംഘം എത്തിപ്പെട്ടത്. എന്നാൽ കുറെ കഴിഞ്ഞപ്പോൾ ഒരാളെ കാണാതാവുകയായിരുന്നു.
രണ്ടര ദിവസമായി പല വിഭാഗങ്ങൾ നടത്തിയ തെരച്ചിലിനൊടുവിലാണ് യുവാവിനെ മലയുടെ സൈഡിൽ അപകടകരമായ വളഞ്ഞു പുളഞ്ഞു കിടക്കുന്ന ചെരുവിൽ മരുഭൂമിയുടെ ഉള്ളിൽ കണ്ടെത്തിയത്. സംരക്ഷിത മേഖലയിലെ ‘ആഖിർ മല’ യുടെ കിഴക്ക് ഭാഗത്തു നിന്നാണ് ആളെ കണ്ടെത്തിയത്.