ഇടുക്കി: ഇന്നും ജനവാസ മേഖലയ്ക്ക് സമീപം അരിക്കൊമ്പനെത്തി. സിങ്കുകണ്ടം സിമന്‍റ് പാലത്തിന് സമീപം യൂക്കാലിപ്റ്റസ് മരങ്ങൾക്കിടയിലാണ് അരിക്കൊമ്പനും അഞ്ച് ആനകളും കൂട്ടമായി എത്തിയത്. കുങ്കി ആനകളെ പാർപ്പിച്ചിരുന്ന സ്ഥലത്ത് നിന്ന് ഇപ്പോൾ 500 മീറ്റർ അകലെയാണ് ആനക്കൂട്ടമുള്ളത്. ഒരു മണിക്കൂറിലേറെയായി ഇവിടെ നിലയുറപ്പിച്ചിരിക്കുകയാണ്. വനംവകുപ്പ് നിരീക്ഷിക്കുന്നുണ്ട്. ആളുകൾ താമസിക്കുന്ന സ്ഥലത്തേക്ക് ആന എത്തുന്നത് തടയാനുള്ള ശ്രമങ്ങൾ തുടരുകയാണ്.
സമീപത്തെ സിമന്‍റ് പാലത്തിലാണ് ഇപ്പോൾ നാട്ടുകാർ സമരം ചെയ്യുന്നത്. ഇവിടെ റോഡ് ഉപരോധിച്ചാണ് നാട്ടുകാർ പ്രതിഷേധിക്കുന്നത്. ആന ജനവാസ കേന്ദ്രത്തിലെത്തിയാൽ രാവും പകലും വലിയ പ്രക്ഷോഭം നടത്തുമെന്ന് ഇവർ പറഞ്ഞു. തൽക്കാലം ആനയെ പിടിക്കരുതെന്നാണ് ഹൈക്കോടതിയുടെ ഇടക്കാല ഉത്തരവ്. ഇതിന് പിന്നാലെയാണ് ഇന്നലെ സമരം ആരംഭിച്ചത്.