ആലപ്പുഴ: നവകേരള ബസ് ജങ്കാറില് കൊണ്ടുപോകുന്നതിനു മുന്നോടിയായി കെ.എസ്.ആര്.ടി.സി ബസ് ഉപയോഗിച്ച് ആലപ്പുഴയിൽ ട്രയല് റണ് നടത്തി. നവകേരള സദസ്സിന് ആലപ്പുഴയിലെത്തുമ്പോൾ, വൈക്കത്തു നിന്ന് ബസ് ജങ്കാറില് കയറ്റി തവണക്കടവിലേക്കെത്തിക്കാനാണ് തീരുമാനിച്ചിരിക്കുന്നത്. ഇതിന്റെ ഭാഗമായാണ് നവകേരള ബസിന്റെ സമാന വലുപ്പമുള്ള കെ.എസ്.ആര്.ടി.സി. ബസ് ജങ്കാറില് കയറ്റി ശനിയാഴ്ച ട്രയല് റണ് നടത്തിയത്. 2.5 കിലോ മീറ്ററാണ് ഇവിടെ കായലിന്റെ വീതി. വൈക്കം ആര്.ടി ഓഫീസിനാണ് ബസ് ലക്ഷ്യസ്ഥാനത്തെത്തിക്കാനുള്ള ചുമതല. ബസ് ജങ്കാർ ഉപയോഗിച്ച് കടത്തുന്നത് സംബന്ധിച്ച സുരക്ഷ ഉറപ്പുവരുത്താനാണ് ട്രയൽ റൺ നടത്തിയത്.
ആലപ്പുഴ ജില്ലയില് ഡിസംബര് 14,15,16 തീയ്യതികളിലാണ് നവകേരള സദസ്സ് നടക്കുന്നത്. കാസര്കോട്, കണ്ണൂര് എന്നീ ജില്ലകള് കടന്ന് നിലവില് കോഴിക്കോടാണ് നവകേരള സദസ്സ് നടക്കുന്നത്. 25 പേര്ക്ക് യാത്രചെയ്യാനാകുന്ന ആഡംബര ബസാണ് നവകേരള സദസ്സിനായി ഒരുക്കിയിരിക്കുന്നത്. ബെംഗളൂരുവിലെ എസ്.എം കണ്ണപ്പ ഓട്ടോമൊബൈല്സ് പ്രൈവറ്റ് ലിമിറ്റഡ് (പ്രകാശ്) ആണ് അത്യാധുനിക സൗകര്യങ്ങളുള്ള ബസിന്റെ ബോഡി നിര്മ്മിച്ചത്. ബസിന് പുറത്ത് ‘കേരളം ദൈവത്തിന്റെ സ്വന്തം നാട്’ എന്ന കേരള ടൂറിസത്തിന്റെ ടാഗ് ലൈനും ഇംഗ്ലീഷില് നല്കിയിട്ടുണ്ട്.