മനാമ: ബോധിധർമ്മ മാർഷൽ ആർട്സ് അക്കാദമിയുടെ കീഴിലുള്ള ഈസ് ഓഫ് കുംഫു ബഹ്റൈനിലെ ഷംസ് അക്കാദമിയിൽ ഗ്രേഡിങ് ടെസ്റ്റ് നടന്നു. ചീഫ് മാസ്റ്റർ ഷാമിർഖാന്റെ മാർഷൽ ആർട്സ് രംഗത്തെ തന്റെ ഇരുപത്തിയഞ്ചാം വാർഷിക ദിനത്തോട് അനുബന്ധിച്ച് നടന്ന ഗ്രേഡിങ് ടെസ്റ്റിൽ ബഹ്റൈനിലെ മുഹറക്ക് മലയാളി സമാജം, ഷംസ് അക്കാദമി ഇസാ ടൗൺ, സ്കിൽ മിഷൻ അക്കാഡമി അദ്ലിയ, ന്യൂ ഹൊറൈസൺ സ്കൂൾ സഗയ, അബുൽ ജിം സൽമാനിയ എന്നീ സ്കൂളുകളിൽ നിന്നായി തെരഞ്ഞെടുക്കപ്പെട്ട 80 കുട്ടികൾക്കാണ് ടെസ്റ്റ് നടത്തിയത്.
വിജയികളായ കുട്ടികൾക്ക് മുഖ്യാതിഥികളായി എത്തിയ ഷംസ് അക്കാദമി ഡയറക്ടർ ഫരീദ് ഷുഹൈബ്, ന്യൂ ഹൊറൈസൺ സ്കൂൾ ചെയർമാൻ ജോയ് മാത്യു, സ്കിൽ മിഷൻ അക്കാഡമി ഡയറക്ടർ പ്രിൻസി, എംഎംഎ ലോക ചാമ്പ്യനായ ഹുസൈൻ എന്നിവർ ബ്രൗൺ, ഗ്രീൻ, ബ്ലൂ, യെല്ലോ എന്നീ ബെൽറ്റുകളും സർട്ടിഫിക്കറ്റ് വിതരണവും നടത്തി.
ചടങ്ങിൽ ജോളി ജോസഫ് മോട്ടിവേഷൻ സ്പീച്ചും നടത്തി. ആയോധന കലാരംഗത്ത് 25 വർഷം പൂർത്തിയാക്കുന്ന ഷാമർഖാന് ബഹ്റൈനിലും ഇന്ത്യയിലുമായി നിരവധി ശിഷ്യഗണങ്ങളാണുള്ളത്. അബൂബക്കർ, റിയാസ് ഖാൻ, ഷൈജു, പ്രസംജിത്ത്, അൽക്ക ബാബു എന്നീ മാഷുമാരുടെ നേതൃത്വത്തിലാണ് ഗ്രേഡിങ് ടെസ്റ്റ് നടന്നത്.