റിയാദ് : കൊവിഡ് വാക്സിനേഷൻ പുരോഗമിക്കുന്ന സൗദി അറേബ്യയിൽ ഇതുവരെ വിതരണം ചെയ്ത ഡോസുകൾ നാല് കോടി കടന്നു. രാജ്യത്തെ 587 കേന്ദ്രങ്ങൾ വഴി 4.1 കോടി ഡോസുകൾ വിതരണം ചെയ്തതായി ആരോഗ്യ മന്ത്രാലയം അറിയിച്ചു. ജനസംഖ്യയുടെ 70 ശതമാനം ആളുകൾക്കെങ്കിലും അടുത്തമാസം ആദ്യത്തോടെ വാക്സിൻ നൽകി പ്രതിരോധ ശേഷി കൈവരിക്കാനാണ് ലക്ഷ്യമിടുന്നത്.
1.4 കോടി ആളുകളാണ് ഒരു ഡോസ് വാക്സിൻ എങ്കിലും സ്വീകരിച്ചിട്ടുള്ളത്. ജനസംഖ്യയുടെ 44 ശതമാനം പേർ ഇതുവരെ ഒരു ഡോസ് വാക്സിൻ സ്വീകരിച്ചിട്ടുണ്ട്. ഓഗസ്റ്റ് ഒന്നുമുതൽ രാജ്യത്തെ സർക്കാർ, സ്വകാര്യ സ്ഥാപനങ്ങളിൽ പ്രവേശിക്കാൻ വാക്സിനേഷൻ നിർബന്ധമാക്കിയിട്ടുണ്ട്. പൊതുഗതാഗതം ഉപയോഗിക്കാനും വാക്സിനേഷൻ നിർബന്ധമാണ്. ഓഗസ്റ്റ് ഒമ്പത് മുതൽ സൗദി പൗരന്മാർ രണ്ട് ഡോസ് വാക്സിനും സ്വീകരിക്കാതെ വിദേശത്തേക്ക് യാത്ര ചെയ്യരുതെന്നും സിവിൽ ഏവിയേഷൻ ജനറൽ അതോറിറ്റി അറിയിച്ചിരുന്നു.