Author: News Desk

വിഴിഞ്ഞം: വിഴിഞ്ഞം തുറമുഖ നിർമാണ പദ്ധതിക്കെതിരെ നിലപാട് കടുപ്പിച്ച് ലത്തീൻ അതിരൂപത. ആർച്ച് ബിഷപ്പ് ഡോ.തോമസ് ജെ.നെറ്റോ വിശ്വാസികൾക്ക് അയച്ച പദ്ധതിക്കെതിരെയുള്ള രണ്ടാമത്തെ സർക്കുലർ കുർബാനയ്ക്കിടെ ഇന്ന് പള്ളികളിൽ വായിക്കും. വൈദികരുടെ നേതൃത്വത്തിൽ തിങ്കളാഴ്ച മുതൽ നിരാഹാര സമരം ആരംഭിക്കും. ഏഴ് ആവശ്യങ്ങൾ നിറവേറ്റുന്നതുവരെ പോരാട്ടം ശക്തമായി മുന്നോട്ട് കൊണ്ടുപോകണം. നിരവധി തവണ ചർച്ച നടത്തിയിട്ടും അധികൃതരുടെ ഭാഗത്തുനിന്നും കൃത്യമായ പ്രതികരണം ഉണ്ടായിട്ടില്ല. പോർട്ട് കരാറുകാരുടെ ഒത്താശയോടെയാണ് മത്സ്യത്തൊഴിലാളികൾക്കെതിരെ സർക്കാർ കോടതിയിൽ മൊഴി നൽകിയതെന്ന് ആർച്ച് ബിഷപ്പ് ഡോ.തോമസ് ജെ നെറ്റോ സർക്കുലറിൽ ആരോപിച്ചു. ഉപരോധത്തിനൊപ്പം നിരാഹാര സമരവും നാളെ ആരംഭിക്കും. ആർച്ച് ബിഷപ്പ് ഡോ.തോമസ് ജെ നെറ്റോ, മുൻ ആർച്ച് ബിഷപ്പ് സൂസപാക്യം എന്നിവരുടെ നേതൃത്വത്തിലാണ് നിരാഹാര സമരം. ബാരിക്കേഡുകൾ മറികടന്ന് തുറമുഖത്ത് പ്രവേശിക്കരുതെന്നും കോടതി ഉത്തരവ് പാലിച്ച് പ്രതിഷേധിക്കണമെന്നും തിരുവനന്തപുരം ലത്തീൻ അതിരൂപത നിർദ്ദേശം നൽകിയിട്ടുണ്ട്.

കൊച്ചി: തിരുവനന്തപുരത്തും കോഴിക്കോടും ലൈറ്റ് മെട്രോ പദ്ധതിക്ക് ഡി.എം.ആർ.സി(ഡൽഹി മെട്രോ റെയിൽ കോർപ്പറേഷൻ) തയ്യാറാക്കിയ പദ്ധതി രൂപരേഖയുള്ളപ്പോള്‍ എന്തിന് പുനർ പഠനം നടത്തണമെന്ന് ഇ. ശ്രീധരൻ. സമയബന്ധിതമായ മാറ്റങ്ങൾ വരുത്തിയാൽ ഡിഎംആർസിക്ക് തയ്യാറാക്കിയ പ്രോജക്ട് റിപ്പോർട്ട് ഉപയോഗിക്കാൻ കഴിയും. മെട്രോ നിയോ പോലുള്ള പദ്ധതികൾക്ക് പിന്നാലെ പോയാൽ അത് കെ-റെയിൽ പോലെ അബദ്ധമാകുമെന്നും ശ്രീധരൻ അഭിപ്രായപ്പെട്ടു. ഡിഎംആർസി വർഷങ്ങളും പണവും ചെലവഴിച്ച് തിരുവനന്തപുരത്തും കോഴിക്കോടും വിശദമായ പഠനം നടത്തിയ ശേഷമാണ് റിപ്പോർട്ട് തയ്യാറാക്കിയത്. പണം വീണ്ടും ചെലവഴിച്ച് പ്രോജക്ട് റിപ്പോർട്ട് തയ്യാറാക്കാനാണ് നീക്കം. ലൈറ്റ് മെട്രോയ്ക്ക് ആവശ്യമായ എല്ലാ രൂപരേഖകളും ഡിഎംആർസി തയ്യാറാക്കിയിട്ടുണ്ടെന്നും ശ്രീധരൻ പറഞ്ഞു.

യുക്രൈൻ ഫോട്ടോ ജേണലിസ്റ്റ് എവ്ജെനി മലോലെറ്റ്കയ്ക്ക് വിസ ഡി ഓർ പുരസ്കാരം. റഷ്യൻ ആക്രമണത്തിൽ നശിപ്പിക്കപ്പെട്ട മരിയുപോളിന്‍റെ ദൃശ്യങ്ങൾ ലോകത്തിന് മുന്നിൽ പകർത്തിയതിനാണ് പുരസ്കാരം. ഫോട്ടോ ജേണലിസം വിഭാഗത്തിലെ ഏറ്റവും അഭിമാനകരമായ നേട്ടങ്ങളിലൊന്നാണ് വിസ ഡി ഓർ പുരസ്ക്കാരം. തെക്കൻ ഫ്രഞ്ച് നഗരമായ പെർപിഗ്നാനിൽ നടന്ന അവാർഡ് ചടങ്ങിൽ, മലോലെറ്റ്ക തന്‍റെ പുരസ്കാരം ഉക്രൈനിലെ ജനങ്ങൾക്ക് സമർപ്പിക്കുകയാണെന്ന് പറഞ്ഞു. അസോസിയേറ്റഡ് പ്രസ് ഏജൻസിയിൽ ജോലി ചെയ്യുന്ന 35-കാരനായ മലോലെറ്റ്ക, ആദ്യത്തെ റഷ്യൻ ബോംബ് വീഴുന്നതിന് ഒരു മണിക്കൂർ മുമ്പ് മരിയുപോളിൽ പ്രവേശിച്ച ആദ്യ പത്രപ്രവർത്തകരിൽ ഒരാളായിരുന്നു. റഷ്യൻ ഷെല്ലാക്രമണത്തിൽ പൂർണ്ണമായും നശിച്ച നഗരം വിട്ട അവസാനത്തെ വ്യക്തിയും അദ്ദേഹമായിരുന്നു. “നീണ്ട, അവസാനിക്കാത്ത ഒരു ദിവസം പോലെ ആയിരുന്നു അന്ന്, ദിനംപ്രതി സാഹചര്യം വഷളാകുകയും മോശമാവുകയും ചെയ്തു” താൻ അവിടെ ചെലവഴിച്ച 20 ദിവസത്തെ കുറിച്ച് അദ്ദേഹം പറഞ്ഞു. അദ്ദേഹത്തിന്റെ ചിത്രങ്ങൾ സംഘർഷത്തിന്റെ മുഴുവൻ ഭീകരതയും ഒപ്പിയെടുക്കുന്നതായിരുന്നു.

കൊച്ചി: സംസ്ഥാനത്ത് ഇന്ന് ഒറ്റപ്പെട്ട മഴയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രത്തിന്‍റെ മുന്നറിയിപ്പ്. ഇന്ന് മൂന്ന് ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. മലപ്പുറം, കോഴിക്കോട്, വയനാട് ജില്ലകളിലാണ് ജാഗ്രതാ നിർദേശം നൽകിയിരിക്കുന്നത്. നാളെ മുതൽ കനത്ത മഴയുണ്ടാകുമെന്ന് കാലാവസ്ഥാ വകുപ്പ് അറിയിച്ചിട്ടുണ്ട്. നാളെ ആറ് ജില്ലകളിലും അടുത്ത ദിവസം 11 ജില്ലകളിലും യെല്ലോ അലർട്ട് പ്രഖ്യാപിച്ചിട്ടുണ്ട്. നാളെ മുതൽ രണ്ട് ദിവസത്തേക്ക് മത്സ്യബന്ധനവും നിരോധിച്ചിട്ടുണ്ട്. ലക്ഷദ്വീപിനും തെക്കുകിഴക്കൻ അറബിക്കടലിനും സമീപമുള്ള ചുഴലിക്കാറ്റും മഹാരാഷ്ട്ര, ബംഗാൾ ഉൾക്കടൽ വരെ നീളുന്ന ന്യൂനമർദ്ദ പ്രദേശങ്ങളുമാണ് മഴയ്ക്ക് കാരണം.

കാലിഫോർണിയ: വടക്കൻ കലിഫോർണിയയിൽ ആയിരത്തിലധികം ഏക്കറിൽ കാട്ടുതീ പടർന്നതിനെത്തുടർന്ന് നൂറോളം വീടുകളും, മറ്റ് കെട്ടിടങ്ങളും കത്തിനശിച്ചു. രണ്ടു പേർക്ക് പരുക്കുണ്ട്. ആയിരക്കണക്കിന് ആളുകളെ ഒഴിപ്പിച്ചു. കാട്ടുതീ അപകടകരമാംവിധം പടരുന്നുണ്ടെന്നും പ്രദേശത്തെ നിരവധി കെട്ടിടങ്ങൾ അപകടത്തിലാണെന്നും സിസ്കിയോ കൗണ്ടിയിലെ അഗ്നിശമന സേന മുന്നറിയിപ്പ് നൽകി. പ്രദേശം പൂർണ്ണമായും സീൽ ചെയ്യുകയും വളർത്തുമൃഗങ്ങളെ സുരക്ഷിതമായ സ്ഥലത്തേക്ക് മാറ്റുകയും ചെയ്തിട്ടുണ്ട്. 2,600 പേർ താമസിക്കുന്ന വീഡിന് വടക്ക് ഭാഗത്ത് വെള്ളിയാഴ്ച ഉച്ചയ്ക്ക് ഒരു മണിയോടെയാണ് തീപിടുത്തമുണ്ടായത്. വളരെ വേഗത്തിൽ തീജ്വാലകൾ ലിങ്കൺ ഹൈറ്റ്സ് പരിസരത്തേക്ക് പടർന്നു. വീടുകൾ കത്തിനശിക്കുകയും നിരവധി ആളുകൾ അവരുടെ ജീവൻ രക്ഷിക്കാൻ പലായനം ചെയ്യുകയും ചെയ്തു. പരിക്കേറ്റ രണ്ടുപേരെ മൗണ്ട് ശാസ്തയിലെ മേഴ്സി മെഡിക്കൽ സെന്‍ററിൽ പ്രവേശിപ്പിച്ചു. ഒരാളുടെ നില തൃപ്തികരമാണ്. എന്നാൽ പൊള്ളലേറ്റ മറ്റൊരാളുടെ നില ഗുരുതരമാണ്.

ഡൽഹി: കോണ്‍ഗ്രസ് വിട്ട ഗുലാം നബി ആസാദ് ഇന്ന് പുതിയ പാർട്ടി പ്രഖ്യാപിക്കും. പാർട്ടി വിട്ട ശേഷമുള്ള ഗുലാം നബി ആസാദിന്‍റെ ആദ്യ പൊതു റാലിയും ഇന്ന് നടക്കും. ജമ്മുവിലെ സൈനിക് കോളനിയിൽ രാവിലെ 11 മണിക്ക് നടക്കുന്ന റാലിയിൽ 20,000 ത്തോളം പേർ പങ്കെടുക്കുമെന്നാണ് പ്രതീക്ഷിക്കുന്നത്. വിലക്കയറ്റത്തിനെതിരെ രാഹുൽ ഗാന്ധിയുടെ നേതൃത്വത്തിൽ കോൺഗ്രസ് ഡൽഹിയിൽ റാലി പ്രഖ്യാപിച്ച അതേ ദിവസമാണ് ഗുലാം നബി ആസാദ് തിരഞ്ഞെടുത്തത്. ജമ്മുവിലെ സൈനിക് കോളനിയിൽ നടക്കുന്ന പൊതുറാലിയിൽ ഗുലാം നബി ആസാദ് തന്‍റെ പുതിയ പാർട്ടിക്ക് തുടക്കം കുറിക്കും. അഞ്ച് പതിറ്റാണ്ടിലേറെയായി കോണ്‍ഗ്രസുമായുള്ള ബന്ധം വിച്ഛേദിച്ച ആസാദിന് ജമ്മു വിമാനത്താവളത്തിൽ ഗംഭീര സ്വീകരണം നൽകുമെന്ന് ആസാദിനൊപ്പം പാർട്ടി വിട്ട മുൻ മന്ത്രി ജിഎം സരൂരി പറഞ്ഞു.

തിരുവനന്തപുരം: കടക്കെണിയിൽ അകപ്പെട്ട കെ.എസ്.ആർ.ടി.സിക്ക് കഴിഞ്ഞ ആറ് വർഷത്തിനിടെ 6,961 കോടി രൂപയാണ് സർക്കാർ നൽകിയത്. 136 കോടി രൂപയുടെ പദ്ധതി വിഹിതത്തിന് പുറമെയാണിത്. 340 ഏക്കർ ഭൂമി സ്വന്തമായി ഉണ്ടെങ്കിലും ഭൂമിയുടെ മൂല്യം ഇതുവരെ കണക്കാക്കിയിട്ടില്ലെന്നാണ് കെഎസ്ആര്‍ടിസിയുടെ മറുപടി. 2016-17 മുതൽ 2021-22 വരെയുള്ള കാലയളവിൽ കെ.എസ്.ആർ.ടി.സിക്ക് പദ്ധതി വിഹിതമായി 136.15 കോടി രൂപയും ധനസഹായമായി 6961.05 കോടി രൂപയും സർക്കാർ അനുവദിച്ചു. കോർപ്പറേഷൻ കീഴിലുള്ള ഏഴ് ഇന്ധന ഔട്ട്ലെറ്റുകൾക്ക് പ്രതിമാസം 2.32 കോടി രൂപ വരുമാനമുണ്ട്. 2021 ഒക്ടോബർ മുതൽ 2022 ജൂലൈ വരെ 7.13 കോടി രൂപയാണ് ബസുകളിലെ പരസ്യ വരുമാനത്തിൽ നിന്ന് പിരിച്ചെടുത്തത്. കെ.എസ്.ആർ.ടി.സിയുടെ വാണിജ്യ സമുച്ചയങ്ങളിൽ നിന്ന് പ്രതിമാസ വാടകയായി 29.53 ലക്ഷം രൂപയും ലഭിക്കും. അതേസമയം, കെ.എസ്.ആർ.ടി.സിക്ക് എല്ലാ ജില്ലകളിലും 340 ഏക്കർ ഭൂമിയുണ്ടെങ്കിലും അതിന്‍റെ മൂല്യം ഇതുവരെ കണ്ടെത്താനായിട്ടില്ലെന്നാണ് കോർപ്പറേഷൻ നൽകിയ വിശദീകരണം.

ആരാധകരുടെ കാത്തിരിപ്പിന് വിരാമമിട്ട് ബോളിവുഡ് താരം സണ്ണി ലിയോൺ കൊച്ചിയിൽ. കൊച്ചിയിലും തിരുവനന്തപുരത്തും സംഘടിപ്പിക്കുന്ന പരിപാടിയിൽ സണ്ണി ലിയോണും പങ്കെടുക്കും. ഇലക്ട്രോണിക് മ്യൂസിക്കിനനുസരിച്ചാണ് സണ്ണി ലിയോണിന്റെ പെര്‍ഫോമന്‍സ് അരങ്ങേറുക. കേരളത്തില്‍ ആദ്യമായാണ് സണ്ണി ലിയോൺ ഇത്തരത്തിലുള്ള ഒരു പരിപാടി അവതരിപ്പിക്കുന്നത്. നിരവധി ആരാധകരാണ് സണ്ണിയെ കാണാനായി തടിച്ചു കൂടിയത്. കൊച്ചിയിലെ മറൈൻ ഡ്രൈവ് ​ഗ്രൗണ്ടിലും തിരുവനന്തപുരത്തെ ​ഗ്രീൻഫീൽഡ് സ്റ്റേഡിയത്തിലുമാണ് പരിപാടി നടക്കുന്നത്.

സംസ്ഥാനത്തെ 68 ലക്ഷം കുടുംബങ്ങൾക്ക് ഓണക്കിറ്റ് വിതരണം ചെയ്തതായി ഭക്ഷ്യമന്ത്രി ജി ആർ അനിൽ. കണക്കുകൾ പ്രകാരം കേരളത്തിലെ 73 ശതമാനം വീടുകളിലും കിറ്റ് ലഭ്യമായിട്ടുണ്ട്. ഓണം വാരാഘോഷത്തോടനുബന്ധിച്ച് കനകക്കുന്നിൽ ഭക്ഷ്യമേള ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. വിലക്കയറ്റം തടയുന്നതിന്‍റെ ഭാഗമായി കൃഷി വകുപ്പും സഹകരണ സംഘങ്ങളും ചേർന്ന് ഏർപ്പെടുത്തിയ ഓണച്ചന്തകളും മറ്റ് മേളകളും പരമാവധി പ്രയോജനപ്പെടുത്തണമെന്നും ഓണത്തിന് മുമ്പ് കിറ്റ് സ്വീകരിക്കണമെന്നും മന്ത്രി എല്ലാവരോടും അഭ്യർത്ഥിച്ചു.

കൊച്ചി: ഓട്ടിസം ബാധിച്ച പെണ്‍കുട്ടിയെ യാത്രയ്ക്കിടെ ടിക്കറ്റ് പരിശോധക ശല്യമെന്ന് വിളിച്ച് അധിക്ഷേപിച്ചെന്ന പരാതിയുമായി മാതാപിതാക്കള്‍. കോട്ടയം മാടപ്പള്ളി സ്വദേശി ശ്രീജിത്താണ് വേണാട് എക്‌സ്പ്രസിലെ ടിക്കറ്റ് പരിശോധകക്കെതിരേ പരാതി നൽകിയിരിക്കുന്നത്. കുട്ടിയുടെ ചികിത്സക്കായി വെള്ളിയാഴ്ച ഷൊര്‍ണൂരിലുള്ള ആശുപത്രിയില്‍ പോയി വേണാട് എക്‌സ്പ്രസില്‍ തിരികെ ചങ്ങനാശേരിയിലേക്ക് യാത്ര ചെയുമ്പോളാണ് സംഭവം. ട്രെയിന്‍ അങ്കമാലി കഴിഞ്ഞപ്പോള്‍ കുട്ടി കരയാനും വാശി പിടിക്കാനും തുടങ്ങി. കാരണമറിയാതെ വിഷമിച്ച കുട്ടിയുടെ മാതാവിനോട് മറ്റ് യാത്രക്കാരുടെ മുന്നില്‍വെച്ച് ടിക്കറ്റ് പരിശോധക കയര്‍ക്കുകയും കുട്ടി മറ്റ് യാത്രക്കാര്‍ക്ക് ശല്യമാണെന്ന് പറയുകയുമായിരുന്നു. ഭിന്നശേഷിക്കാര്‍ക്കായുള്ള റിസര്‍വേഷന്‍ ക്വാട്ടയിലാണ് ടിക്കറ്റ് ബുക്ക് ചെയ്തിരുന്നത്. അതിനാല്‍ ഭിന്നശേഷിക്കാരിയായ കുട്ടിയാണെന്ന് ഉദ്യോഗസ്ഥക്ക് അറിയാമായിരുന്നു. എന്നിരിന്നിട്ടും കുട്ടിയുടെ ആരോഗ്യസ്ഥിതി മനസിലാക്കാതെ ശല്യമെന്ന് വിളിച്ച് അധിക്ഷേപിക്കുകയായിരുന്നുവെന്ന് കുട്ടിയുടെ പിതാവ് ശ്രീജിത്ത് പറഞ്ഞു.