Author: News Desk

യു.എ.ഇ: ബസ്, ടാക്സി, ലിമോസിൻ ഡ്രൈവർമാർക്കും സ്കൂൾ യാത്രാ സഹായികള്‍ക്കും ഡിജിറ്റലായി അനുമതി നൽകുമെന്ന് ദുബായ് ആർടിഎ അറിയിച്ചു. ആർ.ടി.എയുടെ വെബ്സൈറ്റ് വഴിയും ആർ.ടി.എ ദുബായ് ഡ്രൈവ് ആപ്പ് വഴിയും അനുമതി ലഭിക്കും. ടാക്സി, ലിമോസിന്‍ തുടങ്ങിയവ ഉപയോഗിക്കുന്ന യാത്രാ ഗതാഗത ഡ്രൈവർമാർക്കും, സ്കൂള്‍ യാത്രാ സഹായികള്‍ക്കും ഡിജിറ്റല്‍ കാർഡ് പരിചിതമാകുന്നതിനായി വർക്ക് ഷോപ്പുകള്‍ നടത്തി. ആർടിഎ ദുബായ് ഡ്രൈവ് ആപ്ലിക്കേഷൻ സ്മാർട്ട്ഫോണുകളിൽ ലഭ്യമാക്കുന്നതിനും വെർച്വൽ കാർഡ് ലഭ്യമാക്കുന്നതിനും മാനുവൽ പുറത്തിറക്കിയിട്ടുണ്ട്. സേവനങ്ങൾ ഡിജിറ്റലൈസ് ചെയ്യുക എന്ന ദുബായിയുടെ പ്രഖ്യാപിത ലക്ഷ്യവുമായാണ് ആർടിഎ മുന്നോട്ട് പോകുന്നത്. ഉപഭോക്താക്കൾക്ക് സൗകര്യപ്രദമായ രീതിയിൽ സേവനം നൽകുക എന്നതാണ് ആർടിഎയുടെ മുൻഗണനയെന്ന് പൊതുഗതാഗത ഏജൻസി ഡ്രൈവേഴ്സ് അഫയേഴ്സ് ഡയറക്ടർ സയീദ് അൽ റംസി പറഞ്ഞു.

ന്യൂഡൽഹി: ഡൽഹിയിൽ വീണ്ടും മങ്കിപോക്സ് റിപ്പോർട്ട് ചെയ്തു. നൈജീരിയൻ സ്വദേശിനിയായ യുവതിക്കാണ് രോഗം സ്ഥിരീകരിച്ചത്. ഇതോടെ ഡൽഹിയിൽ മങ്കിപോക്സ് ബാധിച്ചവരുടെ എണ്ണം എട്ടായി. രാജ്യത്തെ ആകെ രോഗബാധിതരുടെ എണ്ണം 13 ആയി. ലോക നായക് ജയപ്രകാശ് നാരായണൻ ആശുപത്രിയിൽ ചികിത്സയിലാണ് യുവതി. ഇവരുടെ ആരോഗ്യനില നിരീക്ഷിച്ചുവരികയാണെന്ന് അധികൃതർ അറിയിച്ചു. രോഗലക്ഷണങ്ങൾ പ്രകടമായതിനെ തുടർന്ന് സെപ്റ്റംബർ 14നാണ് യുവതിയെ ആശുപത്രിയിൽ പ്രവേശിപ്പിച്ചത്. നിലവിൽ ഡൽഹിയിൽ എട്ട് മങ്കിപോക്സ് കേസുകൾ റിപ്പോർട്ട് ചെയ്തിട്ടുണ്ട്. 30 വയസ്സുള്ള നൈജീരിയൻ യുവതിയാണ് അവസാനമായി രോഗബാധിതയായത്. ഇവരെ ലോക നായക് ജയപ്രകാശ് നാരായണൻ ആശുപത്രിയിൽ പ്രവേശിപ്പിച്ചു. ആരോഗ്യനില നിരീക്ഷിച്ചു വരികയാണെന്ന് ആശുപത്രി അധികൃതർ പറഞ്ഞു.

തൊടുപുഴ: കെ.എസ്.ആർ.ടി.സിയിൽ സമരപ്രഖ്യാപനത്തിനെതിരെ ശക്തമായ നിലപാട് സ്വീകരിച്ച് ഗതാഗതമന്ത്രി ആന്‍റണി രാജു. സമരം ചെയ്യുന്നവർ അഞ്ചാം തീയതി ശമ്പളം കിട്ടുമെന്ന് കരുതേണ്ടെന്ന് മന്ത്രി പറഞ്ഞു. സിംഗിൾ ഡ്യൂട്ടി യൂണിയനുകൾ നേരത്തെ അംഗീകരിച്ചതാണെന്നും ഇത് നടപ്പാക്കുന്നതിൽ സർക്കാർ വിട്ടുവീഴ്ച ചെയ്യില്ലെന്നും മന്ത്രി പറഞ്ഞു. ഒക്ടോബർ ഒന്നു മുതൽ ടിഡിഎഫ് പ്രവർത്തകർ പണിമുടക്ക് പ്രഖ്യാപിച്ചിട്ടുണ്ട്. 12 മണിക്കൂർ സിംഗിൾ ഡ്യൂട്ടിക്കെതിരെ തൊഴിലാളികൾ പ്രതിഷേധത്തിലാണ്. ഇതിന്‍റെ ഭാഗമായാണ് കോണ്‍ഗ്രസ് അനുകൂല സംഘടനയായ ടി.ഡി.എഫ് പ്രതിഷേധിക്കുന്നത്. സിംഗിൾ ഡ്യൂട്ടിയിൽ വിട്ടുവീഴ്ചയില്ലെന്ന് മുഖ്യമന്ത്രി പിണറായി വിജയൻ പ്രഖ്യാപിച്ചിരുന്നു. എല്ലാ മാസവും 5ന് മുമ്പ് ശമ്പളം നൽകുമെന്ന് മുഖ്യമന്ത്രിയുമായുള്ള ചർച്ചയിൽ ഉറപ്പ് ലഭിച്ചതിനാൽ സിഐടിയു, ബിഎംഎസ്, എഐടിയുസി എന്നീ സംഘടനകൾ തൽക്കാലം പണിമുടക്കേണ്ടെന്ന തീരുമാനത്തിലാണ്.

കൊച്ചി: തെരുവുനായയുടെ കടിയേല്‍ക്കുന്നവര്‍ക്ക് സൗജന്യ ചികിത്സ നൽകണമെന്ന് ഹൈക്കോടതി. കേസിൽ ഇടക്കാല ഉത്തരവ് പുറപ്പെടുവിക്കുന്നതിന് മുമ്പ് വാദം കേൾക്കുന്നതിനിടെയാണ് കോടതിയുടെ നിർദ്ദേശം. ഡി.ജി.പി പുറത്തിറക്കിയ സർക്കുലറിലെ നിർദേശങ്ങൾ നടപ്പാക്കണമെന്നും കോടതി പറഞ്ഞു. കേസിൽ ഇടക്കാല ഉത്തരവ് പുറപ്പെടുവിക്കും. നായ്ക്കളെ കൊല്ലുന്നത് സാക്ഷര കേരളത്തിന് യോജിച്ചതല്ലെന്ന് അനിമൽ വെൽഫെയർ ബോർഡ് ഓഫ് ഇന്ത്യ കോടതിയിൽ വാദിച്ചു. തെരുവുനായ്ക്കളെ കൊല്ലുന്നവർക്കെതിരെ നടപടിയെടുക്കാൻ പോലീസിന് നിർദേശം നൽകണം. തെരുവുനായ്ക്കളുടെ ശല്യം രാജ്യത്തുടനീളം വ്യാപകമാണെന്നും അനിമൽ വെൽഫെയർ ബോർഡ് ഓഫ് ഇന്ത്യ കോടതിയിൽ വാദിച്ചു. 

വാഷിങ്ടൺ: ആഗോള സമ്പദ് വ്യവസ്ഥ അടുത്ത വർഷം മാന്ദ്യത്തെ അഭിമുഖീകരിക്കുമെന്ന് ലോകബാങ്കിന്റെ മുന്നറിയിപ്പ്. പണപ്പെരുപ്പം തടയുന്നതിന് കടുത്ത നിയന്ത്രണങ്ങളുമായി മുന്നോട്ട് പോകുന്ന സെൻട്രൽ ബാങ്കുകളുടെ സമീപനം ലോകത്തെ സാമ്പത്തിക പ്രതിസന്ധിയിലേക്ക് തള്ളിവിടുമെന്ന് ലോകബാങ്ക് കണക്ക് കൂട്ടുന്നു. വിവിധ സെൻട്രൽ ബാങ്കുകൾ അടുത്ത വർഷത്തോടെ പലിശ നിരക്ക് 4 ശതമാനം ഉയർത്തുമെന്നാണ് നിക്ഷേപകർ പ്രതീക്ഷിക്കുന്നത്. പണപ്പെരുപ്പം 5 ശതമാനത്തിൽ നിലനിർത്താനാണ് ഇത്. പണപ്പെരുപ്പം നിലനിർത്താൻ വിവിധ സെൻട്രൽ ബാങ്കുകൾ പലിശ നിരക്ക് 6 ശതമാനം വരെ ഉയർത്തും. കടുത്ത നിയന്ത്രണങ്ങൾ മൂലം ആഗോള സമ്പദ് വ്യവസ്ഥയുടെ ജിഡിപി വളർച്ചാ നിരക്ക് 0.5 ശതമാനം കുറയുമെന്നാണ് പ്രതീക്ഷിക്കുന്നത്. ആളോഹരി വരുമാനത്തിൽ 0.4 ശതമാനം കുറവുണ്ടാകും. ഈ സാഹര്യത്തിലേക്ക് ലോക സമ്പദ്‍വ്യവസ്ഥ കടന്നതോടെ ആഗോള സാമ്പത്തിക മാന്ദ്യം ലോകത്തുണ്ടായെന്ന് സാ​ങ്കേതികമായി പറയാമെന്നാണ് ലോകബാങ്ക് വ്യക്തമാക്കുന്നത്.

ലണ്ടൻ: എലിസബത്ത് രാജ്ഞിയുടെ സംസ്കാര ചടങ്ങുകൾക്കായി ലണ്ടനിൽ എത്തിയ ചൈനീസ് സംഘത്തിന് പാർലമെന്‍റിനുള്ളിൽ അന്തിമോപചാരം അർപ്പിക്കാൻ ബ്രിട്ടീഷ് സർക്കാർ അനുമതി നിഷേധിച്ചുവെന്ന് റിപ്പോർട്ട്. സിൻജിയാങ് പ്രവിശ്യയിൽ ഉയിഗുർ മുസ്ലീങ്ങൾക്കെതിരായ അതിക്രമങ്ങളെ വിമർശിച്ച ബ്രിട്ടീഷ് പാർലമെന്‍റ് അംഗങ്ങൾക്കെതിരെ ചൈന ഉപരോധം ഏർപ്പെടുത്തിയിരുന്നു. പാർലമെന്‍റ് സമുച്ചയത്തിലെ വെസ്റ്റ്മിൻസ്റ്റർ ഹാളിൽ ചൈനീസ് പ്രതിനിധി സംഘം രാജ്ഞിക്ക് അന്തിമോപചാരം അർപ്പിക്കുന്നതിൽ ചില പാർലമെന്‍റ് അംഗങ്ങൾ ഇതേ തുടർന്ന് ആശങ്ക പ്രകടിപ്പിച്ചിരുന്നു. ഇതിനെ തുടർന്നാണ് തീരുമാനമെന്നാണ് വിവരം. എന്നാൽ ഇത് സംബന്ധിച്ച് ബ്രിട്ടൻ ഔദ്യോഗിക അറിയിപ്പ് നടത്തിയിട്ടില്ല. വിദേശകാര്യ ഓഫിസുമായി സംസാരിച്ച ശേഷം ബക്കിംഗ്ഹാം കൊട്ടാരം അതിഥികളുടെ പട്ടികയ്ക്ക് അന്തിമരൂപം നൽകുമെന്ന് പ്രധാനമന്ത്രി ലിസ് ട്രസ്സിന്റെ വക്താവ് പറഞ്ഞു. സുരക്ഷാ കാരണങ്ങളാൽ പ്രതികരിക്കുന്നില്ലെന്ന് ഹൗസ് ഓഫ് കോമൺസും പറഞ്ഞു. അതേസമയം, ഇക്കാര്യം അറിയില്ലെന്ന് ചൈന വ്യക്തമാക്കി.

തിരുവനന്തപുരം: സംസ്ഥാനത്തെ റോഡുകളുടെ ഗുണനിലവാരം പരിശോധിക്കാൻ വിജിലൻസിന്റെ വ്യാപക പരിശോധന. തദ്ദേശ സ്വയംഭരണ സ്ഥാപനങ്ങൾക്ക് കീഴിൽ നിർമ്മിക്കുന്ന റോഡുകളുടെ ഗുണനിലവാരം പരിശോധിക്കാനാണ് സംഘം മിന്നൽ പരിശോധന നടത്തിയത്. വിജിലൻസ് ആൻഡ് ആന്‍റി നാർക്കോട്ടിക് സെല്ലിന്‍റെ നേതൃത്വത്തിലുള്ള പ്രത്യേക അന്വേഷണ സംഘമാണ് പരിശോധന നടത്തിയത്. ഓപ്പറേഷൻ സരൾ രാസ്ത എന്ന പേരിലാണ് പരിശോധന. ഹൈക്കോടതിയുടെ ഉത്തരവ് പ്രകാരം പുരോഗമിക്കുന്നതും, പൂർത്തീകരിച്ചതുമായ റോഡുകളുടെ ഗുണനിലവാരം പരിശോധിച്ച് റിപ്പോർട്ട് സമർപ്പിക്കുകയാണ് ലക്ഷ്യം. സംസ്ഥാനത്തെ മിക്ക ജില്ലകളിലും പരിശോധന പുരോഗമിക്കുകയാണ്. തിരുവനന്തപുരത്ത് വിവിധ കേന്ദ്രങ്ങളിൽ 82ലധികം റോഡുകളാണ് ഇന്ന് പരിശോധിക്കുന്നത്. റോഡുകളുടെ ഗുണനിലവാരം സംബന്ധിച്ച് നിരവധി വിമർശനങ്ങളും പരാതികളും ഉയർന്ന സാഹചര്യത്തിൽ മുമ്പും പരിശോധനകൾ നടത്തിയിരുന്നു. മനോജ് എബ്രഹാം വിജിലൻസിന്‍റെ ചുമതലയേറ്റ ശേഷമുള്ള രണ്ടാമത്തെ ഓപ്പറേഷൻ സരൾ രാസ്തയാണിത്.

പാലക്കാട്: അട്ടപ്പാടി മധു വധക്കേസിലെ 29-ാം സാക്ഷി സുനിൽകുമാറിന്‍റെ കാഴ്ച പരിശോധിച്ച ഡോക്ടറെ വിസ്തരിക്കാൻ കോടതി. നാളെ കോടതിയിൽ ഹാജരാകാൻ ആവശ്യപ്പെട്ട് ഡോക്ടർക്ക് നോട്ടീസ് നൽകിയിട്ടുണ്ട്. ഇതിനുശേഷം കേസ് മണ്ണാർക്കാട് മുൻസിഫ് മജിസ്ട്രേറ്റ് കോടതിക്ക് കൈമാറും. അതേസമയം മധു വധക്കേസിലെ 36-ാം സാക്ഷി അബ്ദുൾ ലത്തീഫും ഇന്ന് കൂറുമാറി. കേസിനെ കുറിച്ച് തനിക്ക് ഒന്നും അറിയില്ലെന്ന് അബ്ദുൾ ലത്തീഫ് കോടതിയെ അറിയിച്ചു. ഇതോടെ കേസിൽ ഇതുവരെ 21 സാക്ഷികൾ കൂറുമാറി. വിചാരണക്കിടെ കോടതിയിൽ കാണിച്ച ദൃശ്യങ്ങളിൽ ഉള്ളത് താനല്ലെന്ന് ലത്തീഫ് പറഞ്ഞു. ഇതോടെ ദൃശ്യങ്ങളും പാസ്പോർട്ടിലെ ഫോട്ടോയും ഫോറൻസിക് പരിശോധനയ്ക്ക് അയയ്ക്കണമെന്ന് പ്രോസിക്യൂഷൻ ആവശ്യപ്പെട്ടു.   

ന്യൂസിലാൻഡ് എയ്ക്കെതിരായ ഏകദിന പരമ്പരയിൽ സഞ്ജു സാംസൺ ഇന്ത്യ എ ടീമിനെ നയിക്കും. മൂന്ന് മത്സരങ്ങളുടെ പരമ്പര ഈ മാസം 22ന് ആരംഭിക്കും. ചെന്നൈയിലെ എം എ ചിദംബരം സ്റ്റേഡിയത്തിലാണ് മത്സരങ്ങൾ നടക്കുക. സെപ്റ്റംബർ 22, 25, 27 തീയതികളിലാണ് മത്സരങ്ങൾ നടക്കുക. സഞ്ജു ക്യാപ്റ്റനും ആന്ധ്രയുടെ കെ.എസ് ഭരത് വിക്കറ്റ് കീപ്പറുമാകും. പൃഥ്വി ഷാ, ഋതുരാജ് ഗെയ്ക്വാദ്, രാഹുൽ ത്രിപാഠി, കുൽദീപ് യാദവ്, ശർദ്ദുൽ താക്കൂർ എന്നിവരും ടീമിലുണ്ട്.

ഓഗസ്റ്റിൽ ഇന്ത്യയിലേക്ക് ഏറ്റവും കൂടുതല്‍ എണ്ണ ഇറക്കുമതി ചെയ്ത രണ്ടാമത്തെ രാജ്യമായി സൗദി അറേബ്യ. റഷ്യയെ പിന്തള്ളിയാണ് സൗദി രണ്ടാമത്തെ വലിയ എണ്ണ വിതരണക്കാരായി മാറിയത്. മൂന്ന് മാസത്തിന് ശേഷമാണ് റഷ്യയെ നേരിയ മാർജിനിൽ മറികടന്ന് സൗദി അറേബ്യ രണ്ടാം സ്ഥാനത്തെത്തിയത്. ഇന്ത്യയിലേക്ക് ഏറ്റവും കൂടുതൽ എണ്ണ ഇറക്കുമതി ഇറാനിൽ നിന്നാണ്. വിവിധ വ്യവസായ, വ്യാപാര ഡാറ്റകളെ ഉദ്ധരിച്ചുള്ള റോയിട്ടേഴ്സ് റിപ്പോർട്ട് പ്രകാരം ഇറാൻ ഇന്ത്യയിലേക്കുള്ള ഏറ്റവും വലിയ എണ്ണ വിതരണക്കാരായി തുടരുകയാണ്.