Author: News Desk

കൊച്ചി: ബ്രഹ്മപുരം മാലിന്യ പ്ലാന്റിലെ വിഷപ്പുക നിയന്ത്രിക്കുന്നതിൽ ഭരണാധികാരികൾക്ക് വീഴ്ച സംഭവിച്ചുവെന്ന് കർദിനാൾ മാർ ജോർജ് ആലഞ്ചേരി. അന്വേഷണം നടക്കട്ടെ, കുറ്റവാളികൾ ശിക്ഷിക്കപ്പെടട്ടെ. മാലിന്യ സംസ്കരണത്തിന് ഉചിതമായ കർമ്മ പദ്ധതികൾ ആവിഷ്കരിക്കണമെന്നും ഇതിനായി ബജറ്റിൽ തുക വകയിരുത്തണമെന്നും അദ്ദേഹം ആവശ്യപ്പെട്ടു. ഈ അ​ഗ്നിബാധയെക്കുറിച്ചല്ല നാം കൂടുതൽ ശ്രദ്ധ ചെലുത്തേണ്ടത്. മാലിന്യ സംസ്കരണ പ്രക്രിയയിൽ നമ്മുടെ ഭരണസംവിധാനം പരാജയപ്പെടുന്നുണ്ടോ? ഇതിന് തീയിട്ടതാണോ അതോ തീ പിടിച്ചതാണോ എന്ന ചർച്ചകളാണ് ഇപ്പോൾ നടക്കുന്നത്. മാലിന്യ നിർമാർജനത്തിനും സംസ്കരണത്തിനും നമ്മുടെ ഭരണസംവിധാനം എന്താണ് ചെയ്യുന്നത് എന്നതാണ് പ്രധാനം. ഈ മാലിന്യക്കൂമ്പാരം ഇതുപോലെ കത്തുകയും എല്ലായിടത്തും പുക നിറഞ്ഞപ്പോൾ ജനങ്ങൾ ശ്വാസംമുട്ടുകയും ചെയ്തത് ഭരണകൂടത്തിന്‍റെ വലിയ പരാജയമാണ്. വളരെ സമഗ്രമായ പരിഹാര പദ്ധതി ആസൂത്രണം ചെയ്യാനും അതിനാവശ്യമായ ഫണ്ട് ബജറ്റിൽ വകയിരുത്താനും ഭരണകൂടം തയ്യാറാകണമെന്നും ജോർജ് ആലഞ്ചേരി പറഞ്ഞു.

കൊച്ചി: ബ്രഹ്മപുരം തീപിടിത്തത്തിൽ ഏത് അന്വേഷണവും നേരിടാൻ തയ്യാറാണെന്ന് കൊച്ചി മേയർ എം അനിൽ കുമാർ. കരാറിൽ ഒരിടത്തും ഇടപെട്ടിട്ടില്ലെന്ന് പറഞ്ഞ മേയർ പ്രതിസന്ധി മറികടക്കാൻ എല്ലാവരും സഹകരിക്കണമെന്നും അഭ്യർത്ഥിച്ചു. മാലിന്യത്തിന് തീപിടിച്ചതാണോ അതോ ആരെങ്കിലും തീയിട്ടതാണോ, മാലിന്യ ശേഖരണത്തിനും സംസ്കരണത്തിനുമായി കോർപ്പറേഷൻ നൽകിയ കരാറിൽ വൻ അഴിമതി നടന്നിട്ടുണ്ടോ, തുടങ്ങി കോർപ്പറേഷൻ ഭരണസമിതിക്കെതിരെ ഉയർന്ന നിരവധി ചോദ്യങ്ങൾക്ക് മറുപടിയായാണ് മേയർ അനിൽ കുമാറിന്‍റെ വിശദീകരണം. കൊച്ചി നേരിടുന്ന പ്രതിസന്ധി പരിഹരിക്കാൻ രാഷ്ട്രീയ ഭേദമന്യേ എല്ലാവരും സഹകരിക്കണമെന്നും അദ്ദേഹം അഭ്യർത്ഥിച്ചു. എന്നാൽ ബ്രഹ്മപുരം വിഷയം രാഷ്ട്രീയ നേട്ടത്തിനായി ഉപയോഗിക്കാൻ ഉദ്ദേശിക്കുന്നില്ലെന്ന് പ്രതിപക്ഷ നേതാവ് വി ഡി സതീശൻ പറഞ്ഞു. സംഭവിച്ച ഗുരുതരമായ അശ്രദ്ധ ശ്രദ്ധിക്കപ്പെടാതെ പോകരുതെന്നും അദ്ദേഹം പറഞ്ഞു. സർക്കാർ പ്രഖ്യാപിച്ച അഗ്നിശമന കർമ്മ പദ്ധതി പരാജയമാണെന്നും ആസൂത്രണം കാര്യക്ഷമമല്ലെന്നും പ്രതിപക്ഷ നേതാവ് ആരോപിച്ചു. കൊച്ചിയിൽ തുടരുന്ന അനാസ്ഥയുമായി ബന്ധപ്പെട്ട് കോൺഗ്രസ് കൊച്ചിയിൽ സംഘടിപ്പിച്ച ചർച്ച ഉദ്ഘാടനം ചെയ്യുകയായിരുന്നു വി ഡി…

സെലിബ്രിറ്റി ക്രിക്കറ്റ് ലീഗിൽ തെലുങ്ക് വാരിയേഴ്സിനെ ഏഴ് വിക്കറ്റിന് തോൽപ്പിച്ച് ചെന്നൈ റൈനോസ്. 101 റൺസ്‌ വിജയലക്ഷ്യം പിന്തുടർന്ന തെലുങ്ക് വാരിയേഴ്സിന് 10 ഓവറിൽ 80 റൺസെടുക്കാനേ കഴിഞ്ഞുള്ളൂ. വിഷ്ണു വിശാൽ, കലൈയരശൻ, പൃഥ്വി എന്നിവരാണ് ചെന്നൈ നിരയിൽ തിളങ്ങിയ താരങ്ങൾ. ടോസ് നേടിയ തെലുങ്ക് ക്യാപ്റ്റൻ അഖിൽ അക്കിനേനി ആദ്യം ഫീൽഡിംഗ് തിരഞ്ഞെടുത്തു. ക്യാപ്റ്റന്‍റെ തീരുമാനത്തെ സാധൂകരിക്കുന്ന രീതിയിൽ പന്തെറിഞ്ഞ തെലുങ്ക് ബോളർമാർ ചെന്നൈ ഓപ്പണർമാരെ നിരാശപ്പെടുത്തി. ചെന്നൈയുടെ ഓപ്പണർമാരായ ശന്തനു ഒമ്പത് റൺസിന് പുറത്തായപ്പോൾ രമണയ്ക്ക് റൺസൊന്നും നേടാനായില്ല. കലൈയരശൻ (18 പന്തിൽ 28), വിക്രാന്ത് (12 പന്തിൽ 20) എന്നിവരാണ് ചെന്നൈയെ തകർച്ചയിൽ നിന്ന് കരകയറ്റിയത്. ആദ്യ ഇന്നിംഗ്സിൽ വിഷ്ണു വിശാൽ 4, അശോക് സെൽവൻ പൂജ്യം, ദശരഥൻ 14, ജീവ 2 എന്നിങ്ങനെ ചെന്നൈക്ക് ഒമ്പത് വിക്കറ്റ് നഷ്ടത്തിൽ 84 റൺസെടുക്കാനേ കഴിഞ്ഞുള്ളൂ. തെലുങ്കു വാരിയേഴ്സിന്‍റെ രഘു മൂന്ന് വിക്കറ്റ് വീഴ്ത്തി. ചെന്നൈയ്ക്കെതിരെ പ്രിൻസ് രണ്ട് വിക്കറ്റ്…

അഹമ്മദാബാദ്: ഓസ്ട്രേലിയയ്ക്കെതിരായ അവസാന ടെസ്റ്റിന്‍റെ ആദ്യ ഇന്നിംഗ്സിൽ ബാറ്റ് ചെയ്യാൻ കഴിയാതെ യുവതാരം ശ്രേയസ് അയ്യർ. മൂന്നാം ദിവസത്തെ കളിയ്ക്ക് ശേഷം കടുത്ത പുറംവേദന അനുഭവപ്പെട്ടതിനെ തുടർന്ന് സ്കാനിംഗിന് വിധേയനായി. നാലാം ദിവസം ശ്രേയസ് ബാറ്റ് ചെയ്യാൻ ഇറങ്ങിയില്ല. രണ്ടാം ഇന്നിംഗ്സിൽ ശ്രേയസ് അയ്യർ ബാറ്റ് ചെയ്യുമോ എന്നും വ്യക്തമല്ല. ഓസ്ട്രേലിയക്കെതിരായ ഏകദിന പരമ്പരയിൽ അദ്ദേഹം കളിക്കുമോ എന്നതും സംശയമാണ്. ന്യൂസിലൻഡിനെതിരായ ഏകദിന പരമ്പരയ്ക്കിടെ പരിക്കേറ്റ ശ്രേയസ് അയ്യർ ദേശീയ ക്രിക്കറ്റ് അക്കാദമിയിലെ ചികിത്സയ്ക്ക് ശേഷമാണ് അന്താരാഷ്ട്ര ക്രിക്കറ്റിലേക്ക് തിരിച്ചെത്തിയത്. ഡൽഹി, ഇൻഡോർ ടെസ്റ്റുകളിൽ തിളങ്ങാൻ താരത്തിന് കഴിഞ്ഞില്ല. അവസാന ടെസ്റ്റിന്‍റെ ആദ്യ ഇന്നിങ്സിൽ ഇന്ത്യ 91 റൺസിന്റെ ലീഡ് നേടി. ഒന്നാം ഇന്നിങ്സിൽ ഇന്ത്യ 571 റൺസെടുത്തു. കരിയറിലെ 75-ാം സെഞ്ചുറിയാണ് നാലാം ദിനം വിരാട് കോഹ്ലി നേടിയത്. 364 പന്തിൽ നിന്ന് 186 റൺസാണ് താരം നേടിയത്. 113 പന്തിൽ 79 റൺസെടുത്ത അക്സർ പട്ടേൽ അർധസെഞ്ചുറി നേടി.

കൊച്ചി: ബ്രഹ്മപുരത്ത് നടന്നത് ഭയാനകമായ ദുരന്തമെന്ന് എഴുത്തുകാരൻ എം കെ സാനു. ശാസ്ത്ര സാങ്കേതികവിദ്യ വളരെയധികം വികസിച്ച സമയത്താണ് ഇത് സംഭവിച്ചതെന്നത് ലജ്ജാകരമാണെന്നും അദ്ദേഹം പറഞ്ഞു. പരിഹാരത്തിനായി ഭരണാധികാരികളുടെ ആന്തരിക നേത്രങ്ങള്‍ തുറക്കപ്പെടണമെന്ന് പ്രാർത്ഥിക്കുന്നുവെന്നും സാനു പറഞ്ഞു. അതേസമയം ബ്രഹ്മപുരത്തെ യഥാർത്ഥ പ്രശ്നം എന്താണെന്ന് മന്ത്രിമാർ ഉൾപ്പെടെ എല്ലാവർക്കും അറിയാമെന്ന് എഴുത്തുകാരൻ ടി പത്മനാഭൻ പറഞ്ഞു. കരാറുകാർ തടിച്ചു കൊഴുക്കുകയാണ്. കുറ്റവാളികൾ ശിക്ഷിക്കപ്പെടുകയില്ല. യഥാർത്ഥത്തിൽ ദുരിതമനുഭവിക്കുന്നത് സാധാരണക്കാരാണ്. അവർ ഇനി എങ്ങോട്ട് പോകുമെന്നതാണ് ആശങ്ക. മാസ്ക് ധരിച്ച് പുറത്തിറങ്ങാൻ മന്ത്രി ആവശ്യപ്പെട്ടതുകൊണ്ട് പ്രശ്നം പരിഹരിക്കപ്പെടില്ലെന്നും പത്മനാഭൻ പറഞ്ഞു.

തിരുവനന്തപുരം: ബ്രഹ്മപുരം തീപിടിത്തം തലമുറകളോളം നീളുന്ന ഗുരുതര ആരോഗ്യപ്രശ്നങ്ങൾക്ക് കാരണമാകുമെന്ന് വിദഗ്ധർ അഭിപ്രായപ്പെടുന്നതിനാൽ ദുരിതബാധിതർക്ക് സർക്കാർ നഷ്ടപരിഹാരം നൽകണമെന്ന് കെ.പി.സി.സി പ്രസിഡന്‍റ് കെ.സുധാകരൻ. പ്ലാസ്റ്റിക് മാലിന്യങ്ങൾ കത്തുമ്പോൾ പുറത്തുവരുന്ന വിഷപ്പുക മൂലമുണ്ടാകുന്ന ആരോഗ്യ, പാരിസ്ഥിതിക പ്രശ്നങ്ങൾ ഗുരുതരമാണ്. തീപിടിത്തത്തിന്‍റെ പ്രത്യാഘാതങ്ങൾ ഇതുവരെ വ്യക്തമായിട്ടില്ല. ഇത് മനുഷ്യന്‍റെ ശ്വസനവ്യവസ്ഥയെയും നാഡീവ്യൂഹത്തെയും ഭാവി തലമുറയേയും ബാധിക്കുന്ന ഗുരുതരമായ രോഗങ്ങൾക്ക് കാരണമാകുമെന്ന് ആരോഗ്യ വിദഗ്ധർ മുന്നറിയിപ്പ് നൽകിയിട്ടുണ്ട്. ക്യാൻസർ, ഹൃദ്രോഗം, ചർമ്മ രോഗങ്ങൾ, വന്ധ്യത, ആസ്ത്മ, ഗർഭസ്ഥ ശിശുക്കളിൽ വൈകല്യം എന്നിവയ്ക്കും ഇത് കാരണമാകുമെന്ന് വിദഗ്ധർ അഭിപ്രായപ്പെടുന്നു. ഭോപ്പാൽ വാതക ദുരന്തത്തിന് സമാനമാണ് ബ്രഹ്മപുരത്തെ തീപിടിത്തവും. സംസ്ഥാന സർക്കാരും തദ്ദേശ സ്വയംഭരണ വകുപ്പും കൊച്ചി മുനിസിപ്പാലിറ്റിയുമാണ് ഇതിന് ഉത്തരവാദികൾ. ഗുരുതരമായ ആരോഗ്യപ്രശ്നങ്ങൾ നേരിടുന്ന ബ്രഹ്മപുരം നിവാസികൾക്ക് നഷ്ടപരിഹാരം നൽകാൻ സംസ്ഥാന സർക്കാരിന് ബാധ്യതയും ഉത്തരവാദിത്തവുമുണ്ടെന്നും അദ്ദേഹം പറഞ്ഞു.

തിരുവനന്തപുരം: മൂന്നാം തവണയും ചൈനീസ് പ്രസിഡന്‍റായി തിരഞ്ഞെടുക്കപ്പെട്ട ഷി ജിൻപിംഗിനെ അഭിനന്ദിച്ച് മുഖ്യമന്ത്രി പിണറായി വിജയൻ. ലോകരാഷ്ട്രീയത്തിലെ പ്രധാന ശബ്ദമായി ചൈന ഉയർന്നുവരുന്നത് അഭിനന്ദനാർഹമാണെന്നും മുഖ്യമന്ത്രി ട്വിറ്ററിൽ കുറിച്ചു. “പീപ്പിൾസ് റിപ്പബ്ലിക് ഓഫ് ചൈനയുടെ പ്രസിഡന്‍റായി വീണ്ടും തിരഞ്ഞെടുക്കപ്പെട്ട പ്രസിഡന്‍റ് ഷി ജിൻപിംഗിന് വിപ്ലവ ആശംസകൾ. ആഗോള രാഷ്ട്രീയത്തിലെ പ്രമുഖ ശബ്ദമായി ചൈന ഉയർന്നുവരുന്നത് പ്രശംസനീയമാണ്. കൂടുതൽ അഭിവൃദ്ധി പ്രാപിക്കാനുള്ള നിങ്ങളുടെ തുടർച്ചയായ ശ്രമങ്ങൾക്ക് അഭിനന്ദനങ്ങൾ,” അദ്ദേഹം ട്വീറ്റ് ചെയ്തു. ആശംസകൾ നേർന്നതിന് പിന്നാലെ ബ്രഹ്മപുരം തീപിടിത്തത്തിൽ മുഖ്യമന്ത്രി പ്രതികരിച്ചില്ലെന്ന് ചൂണ്ടിക്കാട്ടി ട്വീറ്റിന് താഴെ പ്രതിഷേധ കമന്‍റുകളും നിറഞ്ഞു.’സ്വന്തം നാടിനോട് ഈ കരുതൽ കാണിച്ചൂടെ’, ‘ബ്രഹ്മപുരത്തെ പ്രശ്നം പരിഹരിച്ചില്ലെങ്കിൽ വലിയ ദുരന്തത്തിന് സാക്ഷ്യം വഹിക്കും’,’ബ്രോ, ബ്രഹ്മപുരത്തെക്കുറിച്ച് രണ്ട് വരി’ തുടങ്ങി നിരവധി കമന്റുകളാണ് വന്നത്.

തൃശൂർ: കൊച്ചി കോർപ്പറേഷൻ കൗൺസിൽ പിരിച്ചുവിടണമെന്ന ആവശ്യവുമായി കേന്ദ്ര മന്ത്രി വി മുരളീധരൻ. ബ്രഹ്മപുരം തീപിടിത്തത്തിന്‍റെ പശ്ചാത്തലത്തിലാണ് അദ്ദേഹത്തിന്‍റെ പ്രതികരണം. വിഷയത്തിൽ നടപടിയുണ്ടായില്ലെങ്കിൽ അത് ജനങ്ങളോടുള്ള കടുത്ത അനീതിയാകുമെന്നും അദ്ദേഹം പറഞ്ഞു. ബ്രഹ്മപുരത്തെ തീപിടിത്തം പത്ത് ദിവസം പിന്നിടുമ്പോഴും മുഖ്യമന്ത്രി പിണറായി വിജയൻ ഒരക്ഷരം ഉരിയാടുന്നില്ല. വൈക്കം വിശ്വന്റെ മരുമകന് അഴിമതി നടത്താൻ കൂട്ടുനിന്നതിൻ്റെ ജാള്യതയാകും പിണറായി വിജയന്. ദുരന്തം വരുമ്പോൾ മുഖ്യമന്ത്രി ഓടി ഒളിക്കുന്നു. കർണാടകയിൽ നിന്ന് ഒഴിവാക്കപ്പെട്ട കമ്പനിക്ക് കൊച്ചി കോർപ്പറേഷന്‍റെ മാലിന്യ സംസ്കരണ കരാർ എങ്ങനെ കിട്ടിയെന്ന് സി.പി.എം വ്യക്തമാക്കണം. സ്മാർട്ട് സിറ്റി പദ്ധതിയിൽ കൊച്ചിയെ ഉൾപ്പെടുത്തി കഴിഞ്ഞ ഏതാനും വർഷങ്ങളായി കേന്ദ്രം അനുവദിച്ച കോടികൾ എന്ത് ചെയ്തുവെന്ന് മാറിമാറി ഭരിച്ചവർ വ്യക്തമാക്കണം. കേന്ദ്രം ഉടൻ തന്നെ വ്യോമസേനയെ ബ്രഹ്മപുരത്തേക്ക് അയച്ചു. വിഷയം കേന്ദ്ര പരിസ്ഥിതി, ആരോഗ്യ, നഗരവികസന മന്ത്രിമാരെ അറിയിക്കുമെന്നും മുരളീധരൻ പറഞ്ഞു.

തിരുവനന്തപുരം: കുപ്പിവെള്ളത്തിന്‍റെ ഗുണനിലവാരം ഉറപ്പാക്കാൻ ഭക്ഷ്യസുരക്ഷാ വകുപ്പ് സംസ്ഥാന വ്യാപകമായി ‘ഓപ്പറേഷൻ പ്യുവർ വാട്ടർ’ എന്ന പേരിൽ പ്രത്യേക പരിശോധന ആരംഭിച്ചതായി ആരോഗ്യ വകുപ്പ് മന്ത്രി വീണാ ജോർജ്. ശനി, ഞായർ ദിവസങ്ങളിലായി 156 സ്ഥാപനങ്ങളിൽ പരിശോധന നടത്തുകയും വിവിധ കമ്പനികളുടെ 38 സാമ്പിളുകൾ ശേഖരിച്ച് പരിശോധനയ്ക്ക് അയയ്ക്കുകയും ചെയ്തു. വെയിലേൽക്കാതെ കുപ്പിവെള്ളം കൊണ്ടുപോകുന്നുണ്ടോ എന്നറിയാൻ 44 വാഹനങ്ങൾ പരിശോധിച്ചു. ഇതിന് പുറമെ, ജ്യൂസുകളും പാനീയങ്ങളും ഉണ്ടാക്കാൻ ശുദ്ധജലവും ശുദ്ധജലത്തിൽ നിർമ്മിച്ച ഐസും ഉപയോഗിക്കുന്നുണ്ടോ എന്നും പരിശോധിക്കുന്നുണ്ടെന്നും മന്ത്രി പറഞ്ഞു. വിവിധ കമ്പനികളുടെ സാമ്പിളുകൾ ശേഖരിച്ച് വിശദമായ പരിശോധനയ്ക്കായി തിരുവനന്തപുരം, എറണാകുളം, കോഴിക്കോട് എന്നിവിടങ്ങളിലെ അനലിറ്റിക്കൽ ലാബുകളിലേക്ക് അയച്ചു. ഗുണനിലവാരമില്ലാത്തവ കണ്ടെത്തിയാൽ പ്രോസിക്യൂഷൻ ഉൾപ്പെടെയുള്ള നടപടികൾ സ്വീകരിക്കും. വെയിലേൽക്കുന്ന തരത്തിൽ കുപ്പിവെള്ളം വിതരണം ചെയ്തതിന് രണ്ട് വാഹനങ്ങൾക്ക് നോട്ടീസ് നൽകി. കുപ്പിവെള്ളം കടകളിലും മറ്റും വെയിലേൽക്കാത്ത വിധത്തിൽ സംഭരിച്ച് വിൽക്കണമെന്നും ആരോഗ്യമന്ത്രി നിർദ്ദേശിച്ചു.

ചെന്നൈ: തന്നെ വേണ്ടെന്ന് വെച്ച് മറ്റൊരു പെൺകുട്ടിയെ വിവാഹം കഴിക്കാൻ ഒരുങ്ങിയ കാമുകന്‍റെ ദേഹത്ത് തിളച്ച എണ്ണ ഒഴിച്ചതിന് യുവതി അറസ്റ്റിൽ. തമിഴ്നാട്ടിലെ ഈറോഡിൽ ശനിയാഴ്ചയാണ് സംഭവം. ഈറോഡ് വർണാപുരം സ്വദേശി കാർത്തിയാണ് ആക്രമിക്കപ്പെട്ടത്. ഇയാളുടെ ബന്ധു കൂടിയായ മീനാ ദേവിയെ പോലീസ് അറസ്റ്റ് ചെയ്തു. ഒരു സ്വകാര്യ കമ്പനിയിൽ ജോലി ചെയ്യുന്ന കാർത്തി മീനാ ദേവിയുമായി പ്രണയത്തിലായിരുന്നുവെന്നും വിവാഹം കഴിക്കാമെന്ന് വാഗ്ദാനം ചെയ്തിരുന്നതായും പോലീസ് പറഞ്ഞു. എന്നാൽ കാർത്തി മറ്റൊരു പെൺകുട്ടിയെ വിവാഹം കഴിക്കാൻ പോകുന്നുവെന്ന് അറിഞ്ഞതോടെ ഇരുവരും തമ്മിൽ വഴക്കായി. വാക്കുതർക്കമുണ്ടായതോടെ മീനാ ദേവി കാർത്തിയുടെ ദേഹത്ത് തിളച്ച എണ്ണ ഒഴിക്കുകയായിരുന്നു. കൈകളിലും മുഖത്തും പൊള്ളലേറ്റ കാർത്തി നിലത്തു വീണു. നിലവിളി കേട്ടെത്തിയ നാട്ടുകാരാണ് ഇയാളെ ആശുപത്രിയിലെത്തിച്ചത്. സംഭവത്തിൽ അന്വേഷണം ആരംഭിച്ച പോലീസ് മീന ദേവിയെ അറസ്റ്റ് ചെയ്തു.