മനാമ: പൊതുവിദ്യാഭ്യാസ മേഖലയെ പൂർണമായി ബഹ്റൈൻ വൽക്കരിക്കുന്നതിനുള്ള പദ്ധതികൾ പുരോഗമിക്കുന്നു. പ്രവാസി അധ്യാപകരെ മാറ്റി യുവാക്കളായ ബഹ്റൈനികളെ നിയമിക്കുന്നതിനുള്ള പദ്ധതികൾ നടന്നുവരികയാണെന്ന് വിദ്യാഭ്യാസ മന്ത്രി ഡോ.മാജിദ് അൽ നുഐമി പറഞ്ഞു. ബഹ്റൈൻ യൂണിവേഴ്സിറ്റിയിലെ ടീച്ചേഴ്സ് കോളേജ് പൗരന്മാർക്ക് ഭാവിയിൽ ബഹ്റൈനൈസേഷൻ നടപ്പാക്കുന്നത് മുൻനിർത്തിയുള്ള പരിശീലനങ്ങളും നൽകുന്നു. ഭാവിയിൽ പ്രവാസികളെ മാറ്റാൻ കഴിയുന്ന തരത്തിൽ ആ വിഷയങ്ങൾ പഠിപ്പിക്കാൻ പൗരന്മാരെ സജ്ജരാക്കുക എന്നതാണ് ലക്ഷ്യം.
സർക്കാർ സ്കൂളുകളിലെ കുടുംബ വിദ്യാഭ്യാസ അധ്യാപകരിൽ മൂന്നിൽ രണ്ട് പേരും പ്രവാസികളാണ്. ഈ വിഭാഗത്തിൽ ആകെ 183 അധ്യാപകർ പ്രവാസികളും 83 പേർ ബഹ്റൈനികളുമാണ്. സർക്കാർ സ്കൂളുകളിൽ അധ്യാപനവും മറ്റ് സഹായ സേവനങ്ങളും നൽകുന്നതിന് 3,687 പ്രവാസികൾ വിദ്യാഭ്യാസ മന്ത്രാലയവുമായി കരാറിലേർപ്പെട്ടിട്ടുണ്ട്. 86 പ്രവാസി അധ്യാപകർ പിഎച്ച്ഡി ബിരുദധാരികളാണെന്നും 327 പേർക്ക് ബിരുദവും ഉന്നത ഡിപ്ലോമയും ഉള്ളവരാണെന്നും 295 പേർക്ക് മാസ്റ്റേഴ്സും 845 പേർക്ക് ബാച്ചിലേഴ്സ് ബിരുദവുമുള്ളവരാണെന്നും മന്ത്രി പറഞ്ഞു
2016 മുതൽ കഴിഞ്ഞ വർഷം (2020) അവസാനം വരെ 1,142 പ്രവാസികളുടെ കരാറുകൾ അവസാനിപ്പിച്ചതായി വിദ്യാഭ്യാസ മന്ത്രി ഡോ. മാജിദ് അൽ നുഐമി പറഞ്ഞു. ഇതേ കാലയളവിൽ 3,653 ബഹ്റൈനികൾക്ക് ജോലി നൽകിയിട്ടുമുണ്ട്.
ബഹ്റൈനിലെ വിദ്യാഭ്യാസ മേഖല വിപുലീകരിക്കുന്നതിന്റെ ഭാഗമായി 10 വർഷത്തെ പദ്ധതികളാണ് തയ്യാറാക്കിയിട്ടുള്ളത്. 18 പുതിയ സ്കൂളുകൾ നിർമ്മിക്കുന്നതും നിലവിലുള്ള 56 സ്ഥാപനങ്ങളുടെ അറ്റകുറ്റപ്പണികളും പുനർനിർമ്മാണവും ഇതിൽ ഉൾപ്പെടുന്നു. ആധുനിക ക്ലാസ് മുറികളിലൂടെയും കെട്ടിടങ്ങളിലൂടെയും വിദ്യാർത്ഥികൾക്ക് ഗുണനിലവാരമുള്ള വിദ്യാഭ്യാസം നൽകാനാണ് 2022-2032 പദ്ധതി ലക്ഷ്യമിടുന്നത്. 18 പുതിയ സ്കൂളുകൾക്ക് മാത്രം സർക്കാരിന് 118.3 മില്യൺ ഡോളർ ചിലവാകും.