തിരുവനന്തപുരം: തളരാത്ത കോവിഡ് പോരാട്ടത്തിനിടയിലും ശമ്പള പരിഷ്കരണത്തിൽ സർക്കാർ ഡോക്ടർമാരുടെ അടിസ്ഥാന ശമ്പളവും മറ്റു ആനുകൂല്യങ്ങളും വെട്ടിക്കുറച്ചതിനെതിരെയുള്ള നിൽപ്പ് സമരം പതിമൂന്നാം ദിവസത്തിലേക്ക് കടക്കുമ്പോളും പരിഹാരമുണ്ടാവാത്തതിൽ പ്രതിഷേധം ശക്തമാക്കാൻ കെ ജി എം ഒ എ തീരുമാനിച്ചു. ഇതിൻ്റെ ഭാഗമായി നിലവിൽ തുടർന്നുവരുന്ന പ്രതിഷേധങ്ങൾക്കൊപ്പം ജനുവരി ഒന്നു മുതൽ തദ്ദേശ സ്ഥാപനങ്ങളുടെ പുതിയ പദ്ധതി നിർവഹണം, കായകല്പം, എൻ.ക്യൂ.എ.എസ് പ്രവർത്തനം തുടങ്ങിയവയിൽ നിന്നുൾപ്പടെ വിട്ട് നിന്ന് നിസ്സഹകരണ സമരം ശക്തമാക്കാനും ജനുവരി മാസം നാലാം തീയതി സെക്രട്ടറിയേറ്റ് മാർച്ചും ധർണ്ണയും നടത്താൻ തീരുമാനിച്ചു. നിലവിലെ കോവിഡ് നിബന്ധനകളനുസരിച്ച് പങ്കെടുക്കാവുന്ന പരമാവധി പേരെ പങ്കെടുപ്പിച്ചുകൊണ്ടായിരിക്കും മാർച്ചും ധർണ്ണയും. ന്യായമായ ആവശ്യങ്ങൾ അംഗീകരിക്കാത്ത പക്ഷം ജനുവരി 18ന് സംസ്ഥാന വ്യാപകമായി കൂട്ട അവധിയെടുത്ത് പ്രതിഷേധിക്കാനും ഇന്നലെ ചേർന്ന സംസ്ഥാന സമിതി യോഗം തീരുമാനിച്ചു. അത്യാഹിത വിഭാഗം, അടിയന്തര ശസ്ത്രക്രിയകൾ ലേബർറൂം തുടങ്ങിയവ ഒഴികെയുള്ള എല്ലാ സേവനങ്ങളിൽ നിന്നും അന്നേദിവസം ഡോക്ടർമാർ വിട്ടു നിൽക്കും.
നിൽപ് സമരത്തിൻ്റെ പതിമൂന്നാം ദിവസം 20/12/2021 തിങ്കളാഴ്ച കണ്ണൂർ ജില്ല കമ്മിറ്റിയുടെ നേതൃത്വത്തിലാണ് പ്രതിഷേധം നടന്നത്.
പ്രതിഷേധം കെ ജി എം ഒ എ സംസ്ഥാന ജനറൽ സെക്രട്ടറി ഡോ: ടി എൻ സുരേഷ് ഉദ്ഘാടനം ചെയ്തു. മഹാമാരിക്ക് മുന്നിൽ ലോകം വിറങ്ങലിച്ചു നിന്നപ്പോൾ സ്വന്തം ആരോഗ്യം പരിഗണിക്കാതെ അതിനെതിരെയുള്ള യുദ്ധത്തിൽ മുന്നണി പോരാളികളായ ഡോക്ടർമാരെ അവരുടെ ന്യായമായ ആവശ്യങ്ങൾക്ക് വേണ്ടി തെരുവിലിറക്കിയത് സംസ്കാര കേരളത്തിന് അപമാനമാണെന്ന് അദ്ദേഹം പറഞ്ഞു.
ഡോക്ടർമാരെ കൂടുതൽ ശക്തമായ പണിമുടക്കിലേക്ക് തള്ളിവിടാതെ കഴിഞ്ഞ ഒരു വർഷത്തോളമായി ഉന്നയിക്കുന്ന ന്യായമായ ആവശ്യങ്ങൾ എത്രയും വേഗം പരിഹരിക്കാനുള്ള നീക്കം സർക്കാരിന്റെ ഭാഗത്തു നിന്ന് ഉണ്ടാവണമെന്ന് ധർണ്ണയെ അഭിസംബോധന ചെയ്ത സംസ്ഥാന പ്രസിഡണ്ട് ഡോ.ജി എസ് വിജയകൃഷ്ണൻ പറഞ്ഞു. ആരോഗ്യ മേഖലയെ കലുഷിതമാക്കാതെ അതൃപ്തരായ ഡോക്ടർമാരുടെ പ്രശ്നങ്ങളിൽ ഇടപെടാനുള്ള ഉത്തരവാദിത്തം സർക്കാർ കാണിക്കണമെന്ന് എന്ന് അദ്ദേഹം പറഞ്ഞു.
കെ ജി എം ഒ എ കണ്ണൂർ ജില്ലാ പ്രസിഡന്റ് ഡോ. അജിത് കുമാർ സ്വാഗതം പറഞ്ഞു. സംസ്ഥാന ജോയിൻ്റ് സെക്രട്ടറി ഡോ: ബിജോയ് സിപി, സംസ്ഥാന കമ്മറ്റി അംഗങ്ങളായ ഡോ രാജേഷ് ഓ ടി, ഡോ സച്ചിൻ കെ സി, ഡോ അമൃതകല, ഡോ അന്ജു എം സ് , ഡോ രഞ്ജിത്ത് മാത്യു , ഡോ കിരൺ കെ ജി , ഡോ ജിതിൻ എന്നിവർ സംസാരിച്ചു . ജില്ല ട്രഷറർ ഡോ അരുൺ ശങ്കർ നന്ദി അറിയിച്ചു.
അനിശ്ചിതകാല സമരത്തിന്റെ പതിനാലാം ദിവസമായ നാളെ കെ ജി എം ഒ എ കാസർഗോഡ് ജില്ലാ കമ്മിറ്റിയുടെ നേതൃത്വത്തിലാണ് പ്രതിഷേധം നടത്തുന്നത്.