മനാമ: ഇന്ത്യൻ കമ്മ്യൂണിറ്റി റിലീഫ് ഫണ്ട് (“ICRF”), ബഹ്‌റൈനിലെ ഇന്ത്യൻ എംബസിയുടെ രക്ഷാകർതൃത്വത്തിൽ, ഈ വർഷത്തെ ആർട്ട് കാർണിവൽ ‘ഫേബർ കാസ്റ്റൽ സ്പെക്ട്ര 2021’ എന്ന പേരിൽ കഴിഞ്ഞ വർഷത്തെ പോലെ വെർച്വൽ പ്ലാറ്റ്‌ഫോമിൽ സംഘടിപ്പിക്കുന്നു. യുവാക്കൾക്കിടയിൽ കലാപരമായ കഴിവുകൾ പ്രോത്സാഹിപ്പിക്കുന്നതിനും ആദരിക്കുന്നതിനും ലക്ഷ്യമിട്ടുള്ള ആർട്ട് കാർണിവൽ ബഹ്‌റൈനിലെ വിദ്യാർത്ഥികൾക്കുള്ള ഏറ്റവും വലിയ കലാ മത്സരമാണ്. ‘ഫേബർ കാസ്റ്റൽ സ്പെക്ട്ര 2021’ കാർണിവൽ ഒരു ഓൺലൈൻ ഇവന്റായി ഡിസംബർ 10 വെള്ളിയാഴ്ച നടക്കും.
രാജ്യത്തെ വിവിധ സ്കൂളുകളിൽ നിന്നുള്ള കുട്ടികൾ അതത് സ്കൂളുകളിൽ സംഘടിപ്പിക്കുന്ന പ്രാഥമിക റൗണ്ടിൽ തിരഞ്ഞെടുക്കപ്പെട്ട ശേഷമാണ് മത്സരത്തിൽ പങ്കെടുക്കുന്നത്. ഈ വാർഷിക പരിപാടി യുവ കലാപ്രതിഭകളെ കണ്ടെത്തുന്നതിനും സാമൂഹിക മാറ്റത്തിന് ഉത്തേജനം നൽകുന്ന ഒരു ഭാവി തലമുറയെ സൃഷ്ടിക്കുന്നതിനും ലക്ഷ്യമിടുന്നു.
അതിനുള്ള തയ്യാറെടുപ്പിനായി, ശ്രീ അനീഷ് ശ്രീധരന്റെ നേതൃത്വത്തിൽ ഏകോപിപ്പിച്ച ഐസിആർഎഫ് സ്പെക്ട്ര ടീം, സ്കൂൾ കോർഡിനേറ്റർമാരുമായി അടുത്തിടെ ഒരു മീറ്റിംഗ് നടത്തി. ഏകദേശം 15 സ്കൂളുകളിൽ നിന്നുള്ള 30-ലധികം കോർഡിനേറ്റർമാർ ആദ്യ മീറ്റിംഗിൽ പങ്കെടുത്തു. ഈ വർഷത്തെ സ്പെക്ട്ര ഇവന്റ് ഓൺലൈനിൽ സംഘടിപ്പിക്കാൻ എല്ലാവരും ആവേശത്തിലാണ്.
എല്ലാ വർഷത്തെയും പോലെ , പങ്കെടുക്കുന്നവരെ നാല് പ്രായ ഗ്രൂപ്പുകളായി തിരിച്ചിരിക്കുന്നു – അഞ്ച് മുതൽ എട്ട് വയസ്സ് വരെ, എട്ട് മുതൽ പതിനൊന്ന് വയസ്സ് വരെ, പതിനൊന്ന് മുതൽ പതിനാല് വയസ്സ് വരെ, പതിനാല് മുതൽ പതിനെട്ട് വയസ്സ് വരെ. സ്കൂളുകൾ വഴി മാത്രമേ പങ്കാളിത്തം അനുവദിക്കൂ.
ബഹ്‌റൈനിൽ പങ്കെടുക്കുന്ന എല്ലാവർക്കും ഡ്രോയിംഗ് പേപ്പറും മെറ്റീരിയലുകളും നൽകും. ഓരോ വിഭാഗത്തിലെയും ആദ്യ മൂന്ന് വിജയികൾക്ക് വ്യക്തിഗത ട്രോഫികളും സർട്ടിഫിക്കറ്റുകളും ലഭിക്കും. കൂടാതെ എല്ലാ പങ്കാളികൾക്കും പങ്കാളിത്ത സർട്ടിഫിക്കറ്റ് ലഭിക്കും.
കുട്ടികളുടെ വിജയിച്ച എൻട്രികളും മറ്റ് മികച്ച സൃഷ്ടികളും 2022-ൽ രൂപകൽപ്പന ചെയ്‌ത കലണ്ടറുകളിലും ഡെസ്‌ക്-ടോപ്പ് കലണ്ടറുകളിലും ഉൾപ്പെടുത്തും . ഈ കലണ്ടറുകൾ 2022 ജനുവരി ആദ്യവാരം നടക്കുന്ന ചടങ്ങിൽ അനാച്ഛാദനം ചെയ്യും. ഈ കലണ്ടറുകൾ എല്ലാ സ്പോൺസർമാർക്കും കോർപ്പറേറ്റുകൾക്കും ബാങ്കുകൾക്കും ഇൻഷുറൻസ് കമ്പനികൾക്കും വിദ്യാഭ്യാസ സ്ഥാപനങ്ങൾക്കും ക്ലബ്ബുകൾക്കും അസോസിയേഷനുകൾക്കും ബിസിനസുകൾക്കും ലഭ്യമാക്കും.
12 വർഷത്തെ വിജയകരമായ ഗ്രാൻഡ് സ്പെക്ട്ര ഇവന്റുകൾ പൂർത്തിയാക്കിയ ശേഷം, ബഹ്‌റൈനിലെ ഏറ്റവും വലിയ ആർട്ട് കാർണിവൽ ഇന്റർനാഷണൽ ആയി മാറുകയാണ്.
ദേശീയ തലത്തിലുള്ള ഓൺലൈൻ മത്സരത്തിന് പുറമേ, ഒരു ഇന്റർനാഷണൽ ഓൺലൈൻ മത്സരം സ്പെക്ട്ര 2021-ലും നടത്തുന്നുണ്ട്. രണ്ട് മത്സരങ്ങളും വെവ്വേറെ നടത്തുകയും രണ്ട് സെറ്റ് വിജയികളെ പ്രഖ്യാപിക്കുകയും ചെയ്യും. സ്പെക്ട്ര 2021 ഇന്റർനാഷണലിൽ പങ്കെടുക്കാനും അതിശയകരമായ സമ്മാനങ്ങൾ നേടാനും വിവിധ സ്ഥാപനങ്ങളുടെ ആയിരക്കണക്കിന് ഓഫീസ് ടേബിളുകൾ അലങ്കരിക്കുന്ന ഏറ്റവും മികച്ച ഡെസ്‌ക് ടോപ്പിലും വാൾ കലണ്ടറുകളിലും നിങ്ങളുടെ സൃഷ്ടികൾ അവതരിപ്പിക്കുന്നതിനും ലോകമെമ്പാടുമുള്ള സ്കൂളുകളിൽ നിന്നുള്ള പങ്കാളികളെ ക്ഷണിക്കുന്നു.
മത്സരത്തിൽ നിന്നുള്ള മൊത്തം വരുമാനം, പ്രതിമാസം 100 ബി,ഡി.യിൽ താഴെ വേതനം ലഭിക്കുന്ന, മരണമടഞ്ഞ ഇന്ത്യൻ തൊഴിലാളികളുടെ കുടുംബങ്ങളെ സഹായിക്കുന്നതിനായി ഒരു കുടുംബക്ഷേമ നിധിയിലേക്ക് പോകുന്നു. പദ്ധതി പ്രകാരം, മരണമടഞ്ഞ ഇന്ത്യക്കാരന്റെ ആശ്രിതർക്ക് കുടുംബക്ഷേമ നിധിയിൽ നിന്ന് ₹1,00,000 (ഒരു ലക്ഷം രൂപ) ധനസഹായം നൽകുന്നു . നിർഭാഗ്യവശാൽ ഒരേയൊരു തണൽ നഷ്ടപ്പെട്ട നിരവധി കുടുംബങ്ങൾക്ക് ഈ പദ്ധതി വലിയ ആശ്വാസമാണ്. പദ്ധതി ആരംഭിച്ചത് മുതൽ നൂറുകണക്കിന് കുടുംബങ്ങൾക്ക് പിന്തുണ നൽകി. ആരും നിർഭാഗ്യകരമായ ദുരന്തത്തിനോ ജീവഹാനിക്കോ ഇരയാകരുതെന്ന് പ്രാർത്ഥിക്കുന്നുവെങ്കിലും, അപ്രതീക്ഷിതമായ പ്രതികൂല സാഹചര്യങ്ങളെ നേരിടാൻ കുടുംബങ്ങൾക്ക് ഒരു കൈത്താങ്ങ് ഉണ്ടെന്ന് ഉറപ്പാക്കാൻ ശ്രമിക്കുന്നു.
സ്പെക്ട്ര 2021-നെക്കുറിച്ചുള്ള കൂടുതൽ വിവരങ്ങൾക്ക്, അനീഷ് ശ്രീധരനെ 39401394 എന്ന നമ്പറിലോ നിഥിനെ 39612819 എന്ന നമ്പറിലോ ബന്ധപ്പെടുക.
ബഹ്‌റൈനിലെ ഇന്ത്യൻ തൊഴിലാളികളുടെ പൊതു ക്ഷേമത്തിനായി ബഹ്‌റൈനിലെ ഇന്ത്യൻ അംബാസഡറുടെ രക്ഷാകർതൃത്വത്തിൽ 1999-ൽ സ്ഥാപിതമായ ഒരു സർക്കാരിതര, ലാഭേച്ഛയില്ലാത്ത സംഘടനയാണ് ഐസിആർഎഫ്. ബഹ്‌റൈനിലെ ഇന്ത്യൻ സമൂഹത്തിലെ സാമ്പത്തികമായി ദുർബലരായ വിഭാഗത്തിന് കൈത്താങ്ങ് നൽകുക എന്നതാണ് ഞങ്ങളുടെ ദൗത്യം. ഇതിൽ നിയമസഹായം, അടിയന്തര സഹായം, കമ്മ്യൂണിറ്റി വെൽഫെയർ സേവനങ്ങൾ, മെഡിക്കൽ സഹായം, കൗൺസിലിംഗ് തുടങ്ങിയവ ഉൾപ്പെടുന്നു. ഐ.സി.ആർ.എഫ് അതിന്റെ തുടക്കം മുതൽ ആയിരക്കണക്കിന് നിർദ്ധനരായ കുടുംബങ്ങളെ പിന്തുണച്ചിട്ടുണ്ട്.
