മലപ്പുറം: മലപ്പുറം ജില്ലയിൽ കണ്ടെത്തിയത് 2000 വർഷം പഴക്കമുള്ള പ്രാചീന ഗുഹ. ജില്ലയിലെ കോഡൂര്‍ താണിക്കലില്‍ കഴിഞ്ഞ മാസം 12 നാണ് ശുദ്ധജല വിതരണ പൈപ്പ്ലൈനിന് കൂഴിയെടുക്കുന്നതിനടയിൽ ‘പ്രാചീന ഗുഹ’ കണ്ടെത്തിയത്. അകത്ത് മണ്‍പാത്രങ്ങളും ചിത്രപ്പണികള്‍ തീര്‍ത്ത തൂണുകളും.!!
താണിക്കല്‍ ഒമ്പതാം വാര്‍ഡ് പാലുംകുന്നില്‍ ലക്ഷം വീട് കോളനിയിലാണ് ഈ അദ്‌ഭുതം കണ്ടെത്തിയത്. വൈകീട്ട് നാല് മണിയോടെ മണ്ണുമാന്തി യന്ത്രം ഉപയോഗിച്ച് ആഴത്തില്‍ കുഴി എടുക്കുന്നതിനിടെ മണ്ണിനടിയില്‍ ദ്വാരം രൂപപ്പെടുകയായിരുന്നു. തുടര്‍ന്ന് വീണ്ടും മണ്ണെടുപ്പ് നടത്തിയപ്പോഴാണ് ഗുഹ കണ്ടെത്തിയത്.
ഇരുമ്പുയുഗത്തിൻ്റെ തുടക്കത്തിൽ ശവസംസ്കാരത്തിനായി ചെങ്കല്ലുവെട്ടി നിർമ്മിച്ച ഈ ഗുഹയ്ക്ക് രണ്ടായിരത്തിലധികമെങ്കിലും വർഷത്തെ പഴക്കം കാണുമെന്ന് അനുമാനിക്കുന്നു. ‘മഹാശിലാസംസ്കാരം’ എന്ന് പൊതുവേ വിളിക്കുന്ന ഒരു സംസ്കാരത്തിൻ്റെ ശേഷിപ്പാണിത്. നന്നങ്ങാടികൾ, കുടക്കല്ലുകൾ, മേശക്കല്ലുകൾ, പെട്ടിക്കല്ലറകൾ, പത്തിക്കല്ലുകൾ, കൽവൃത്തങ്ങൾ എന്നിങ്ങനെ പത്തോളം സ്മാരകങ്ങൾ ഈ സംസ്കാരത്തിൻ്റേതായി നമുക്ക് ലഭിക്കുന്നു.
ഇത്തരത്തിലൊന്ന് വെളിച്ചത്തു വന്നാൽ ഏതൊരാൾക്കും അത് പരിശോധിക്കാനുള്ളകൗതുകം തോന്നിയേക്കാം. എന്നാൽ അത്തരം ഇടപെടലുകൾ നഷ്ടപ്പെടുത്തുന്നത് വലിയ ചരിത്രത്തെളിവുകളാവും; തെളിവുകൾ ചേർത്തുവെച്ച് നിർമ്മിച്ചെടുക്കാവുന്ന അറിയപ്പെടാത്ത ചരിത്രാനുഭവങ്ങളെയാവും.
താണിക്കലിൽ ഗുഹ കണ്ടെത്തിയതറിഞ്ഞെത്തിയ നാട്ടുകാർ അതിലേക്കിറങ്ങിയപ്പോൾ കുറേയേറെ പുരാവസ്തുക്കൾക്ക് കേടുപാടുകൾ സംഭവിച്ചതായും, പുരാവസ്തു വകുപ്പിലെ വിദഗ്ദ്ധർ എത്തും മുമ്പ് തന്നെ തെളിവുകൾ പലതും നശിപ്പിക്കപ്പെടുകയോ നഷ്ടപ്പെടുകയോ ചെയ്തതായും പുരാവസ്തു വകുപ്പ് ചുമതലയുളള മന്ത്രി അഹമ്മദ് ദേവര്‍കോവില്‍ അറിയിച്ചു. അവശേഷിച്ചവ സംസ്ഥാന പുരാവസ്തു വകുപ്പ് ശ്രദ്ധാപൂർവ്വം ശേഖരിച്ചിട്ടുണ്ട്.
പൊതു സമൂഹത്തിൻ്റെ കരുതലോടെയുള്ള ഇടപെടലിലൂടെ മാത്രമേ ഇത്തരം പുരാവസ്തുക്കളുടെ തെളിവുകൾ വീണ്ടെടുക്കാനാകൂ. പുരാവസ്തുക്കളോ പുരാവസ്തു ശേഷിപ്പുകളോ കണ്ടാൽ കേന്ദ്ര പുരാവസ്തു വകുപ്പിനെയോ സംസ്ഥാന പുരാവസ്തു വകപ്പിനെയോ അറിയിക്കുകയാണ് ആദ്യം ചെയ്യേണ്ടത്. നല്ലവരായ ജനങ്ങളിൽ നിന്ന് ആ ജാഗ്രതയും ഇടപെടലുമാണ് ഈ കാര്യത്തില്‍ വേണ്ടതെന്നും മന്ത്രി കൂട്ടിച്ചേര്‍ത്തു.
