ന്യൂഡൽഹി: പ്രധാനമന്ത്രി നരേന്ദ്ര മോദിയും സ്വിറ്റ്‌സർലൻഡ് പ്രസിഡന്റ് ഗയ് പാർമെലിനും തമ്മിൽ നടന്ന ചർച്ചകൾക്ക് പിന്നാലെ ഇന്ത്യയും സ്വിറ്റ്‌സർലൻഡും അഞ്ച് കരാറുകളിൽ ഒപ്പുവെച്ചു. വ്യാപാരം, നിക്ഷേപം, പ്രതിരോധം, അണുവൈദ്യുതി, അടിസ്ഥാന സൗകര്യ വികസനം തുടങ്ങിയ മേഖലകളിലെ ഉഭയകക്ഷി സഹകരണം കൂടുതൽ ശക്തിപ്പെടുത്തുന്നതാണ് ചർച്ചകളിലെ പ്രധാന വിഷയം.
കുടിയേറ്റ-യാത്രാ പങ്കാളിത്തം, യുവ പ്രൊഫഷണലുകൾക്കായുള്ള എക്സ്ചേഞ്ച് പദ്ധതി, ഗതാഗത സാങ്കേതികവിദ്യ, മൊബിലിറ്റി സംവിധാനങ്ങൾ, അടിസ്ഥാന സൗകര്യ വികസനം തുടങ്ങിയ മേഖലകളിലെ സഹകരണം പ്രോത്സാഹിപ്പിക്കുന്നതിനുള്ള ധാരണകളും ഇതിൽ ഉൾപ്പെടുന്നു.
മൂന്ന് ദിവസത്തെ ഔദ്യോഗിക സന്ദർശനത്തിനായാണ് പാർമെലിൻ ഇന്ത്യയിലെത്തിയത്. ഫെബ്രുവരിയിൽ നടന്ന എഐ ഇംപാക്ട് ഉച്ചകോടിയിൽ പങ്കെടുത്തതിന് ശേഷമുള്ള ഈ വർഷത്തെ അദ്ദേഹത്തിന്റെ രണ്ടാമത്തെ ഇന്ത്യാ സന്ദർശനമാണിത്. അതേസമയം, ഇന്ത്യയിലേക്കുള്ള അദ്ദേഹത്തിന്റെ ആദ്യ ഔദ്യോഗിക സന്ദർശനവുമാണിത്.
ഇരുരാജ്യങ്ങളും തമ്മിലുള്ള സാമ്പത്തിക-വ്യാപാര ബന്ധം വിപുലീകരിക്കുന്നതിനൊപ്പം നിക്ഷേപത്തിനും സാങ്കേതിക സഹകരണത്തിനും പുതിയ അവസരങ്ങൾ സൃഷ്ടിക്കുന്നതിനെക്കുറിച്ചും നേതാക്കൾ ചർച്ച നടത്തി.