പത്തനംതിട്ടയിൽ കടന്നൽ കുത്തേറ്റ് നവവരൻ മരിച്ചു; ഗൾഫിലേക്ക് പോകാനിരിക്കെ ദുരന്തം

പത്തനംതിട്ട: വിവാഹം കഴിഞ്ഞ് ദിവസങ്ങൾക്കകം ഒരു കുടുംബത്തെ കണ്ണീരിലാഴ്ത്തിയ ദാരുണ സംഭവമാണ് പത്തനംതിട്ട കുന്നന്താനത്ത് കടന്നൽ കുത്തേറ്റ് നവവരൻ മരിച്ചത്. 33-കാരനായ സാൻബി ജേക്കബാണ് മരിച്ചത്. വീട്ടിലെ വാട്ടർ ടാങ്ക് വൃത്തിയാക്കുന്നതിനായി മുകളിലേക്ക് കയറിയപ്പോഴായിരുന്നു കടന്നൽ ആക്രമണം ഉണ്ടായത്. കഴിഞ്ഞ മേയ് 11-നായിരുന്നു സാൻബിയുടെ വിവാഹം. ഗൾഫിലേക്ക് ജോലിക്കായി മറ്റന്നാൾ പോകാനിരിക്കെയായിരുന്നു ഈ ദുരന്തം സംഭവിച്ചത്. വിവാഹത്തിന്റെ സന്തോഷം മാറുംമുമ്പ് ഉണ്ടായ മരണവാർത്ത കുടുംബത്തെയും നാട്ടുകാരെയും നടുക്കി.