കോഴിക്കോട്: ലോക്സഭാ തെരഞ്ഞെടുപ്പില് ഇടതുമുന്നണിക്കുണ്ടായ കനത്ത തോല്വിയുടെ കാരണങ്ങള് പരിശോധിക്കാന് സി.പി.എം. സംസ്ഥാന നേതൃയോഗങ്ങള് നാളെ മുതല് തിരുവനന്തപുരത്ത് ചേരും.
16, 17 തിയതികളില് സംസ്ഥാന സെക്രട്ടറിയേറ്റ് യോഗവും 18, 19, 20 തിയതികളില് സംസ്ഥാന കമ്മിറ്റി യോഗവുമാണ് നടക്കുക. പിണറായി സര്ക്കാരിനെതിരായ ഭരണവിരുദ്ധ വികാരമാണ് തോല്വിക്കു കാരണമെന്ന വിമര്ശനം പാര്ട്ടിക്കും മുന്നണിക്കുമകത്തുനിന്നും പുറത്തുനിന്നും ഉയരുന്ന സാഹചര്യത്തിലാണ് നേതൃയോഗങ്ങള് ചേരുന്നത്.
ന്യൂനപക്ഷ വോട്ടുകള് ലക്ഷ്യമാക്കി പാര്ട്ടി നടത്തിയ പ്രവര്ത്തനങ്ങള് ഒരുവിഭാഗം വോട്ടര്മാരെ അകറ്റിയെന്നും അവരുടെ വോട്ടുകള് ബി.ജി.പിക്ക് അനുകൂലമായെന്നുമുള്ള ആരോപണങ്ങളും ഉയരുന്നുണ്ട്. കൂടാതെ പാര്ട്ടിയുടെ പ്രാദേശിക ഘടകങ്ങളിലുണ്ടായ ഭിന്നതകള് കാരണം നിരവധി പാര്ട്ടി പ്രവര്ത്തകര് തെരഞ്ഞെടുപ്പ് പ്രവര്ത്തനവുമായി സഹകരിച്ചില്ലെന്ന വിമര്ശനവും വ്യാപകമാണ്.
സമംസ്ഥാന ഭരണത്തിലെ ദൗര്ബല്യങ്ങള് പരിശോധിക്കപ്പെടേണ്ടതാണെന്ന് കഴിഞ്ഞ ദിവസം സി.പി.ഐ. സംസ്ഥാന സെക്രട്ടറി ബിനോയ് വിശ്വം പരസ്യമായി പറഞ്ഞത് സംസ്ഥാന ഭരണത്തിനെതിരെ, പ്രത്യേകിച്ച് മുഖ്യമന്ത്രി പിണറായി വിജയനെതിരെയുള്ള പരോക്ഷ വിമര്ശനമായാണ് വിലയിരിത്തപ്പെടുന്നത്. മുന് മന്ത്രിയും മുതിര്ന്ന സി.പി.എം. നേതാവുമായ ജി. സുധാകരനും സംസ്ഥാന ഭരണത്തിനെതിരെ വിമര്ശനമുന്നയിച്ചിരുന്നു. കൂടാതെ ആലപ്പുഴ ജില്ലയില് സി.പി.എം. വോട്ടുകള് ബി.ജെ.പിക്ക് ലഭിച്ചെന്ന് ജില്ലാ സെക്രട്ടറി ആര്. നാസറും പറയുകയുണ്ടായി.
യു.ഡി.എഫ്. വോട്ടുകളാണ് ബി.ജെ.പിയിലേക്കു പോയതെന്നാണ് മുഖ്യമന്ത്രി കഴിഞ്ഞ ദിവസം നിയമസഭയില് പറഞ്ഞത്. എന്നാല് വിവിധ ലോക്സഭാ മണ്ഡലങ്ങളില്നിന്നുള്ള വോട്ട് കണക്കുകള് ആ വാദവുമായി ഒത്തുപോകാത്തതിനാല് പാര്ട്ടി നേതാക്കളില് പലരും അതംഗീകരിക്കുന്നില്ല.
ഭരണത്തില് തിരുത്തലുകള് വേണമെന്നും സര്ക്കാരിനുമേല് പാര്ട്ടിയുടെ ശക്തമായ നിയന്ത്രണം വേണമെന്നുമുള്ള അഭിപ്രായം പല നേതാക്കള്ക്കുമുണ്ട്. എന്നാല് എത്രപേര് അത് നേതൃയോഗങ്ങളില് പറയുമെന്ന് കണ്ടറിയണം. ഫലത്തില് ഈ അഭിപ്രായം പിണറായി വിജയനെതിരെ ആവുമെന്നതിനാലും പാര്ട്ടിയിലെ ഏറ്റവും ശക്തന് പിണറായി തന്നെ ആയതിനാലും പലരും ശക്തമായ വിമര്ശനങ്ങള് ഉന്നയിക്കാനിടയില്ല. അതുകൊണ്ടുതന്നെ സര്ക്കാരിനുമേല് പാര്ട്ടിയുടെ നിയന്ത്രണം ശക്തമാക്കാനുള്ള സാധ്യത കുറവുമാണ്.