തിരുവനന്തപുരം: കാസർകോടു നിന്നു യാത്ര തുടങ്ങിയ ‘ചോക്ലേറ്റ്’ ബസ് ഓരോ ദിവസം ഓടിയെത്തുമ്പോഴും ഇന്ധനമായി നിറച്ചത് രാഷ്ട്രീയമായിരുന്നു. ഉദ്യോഗസ്ഥരെയും പാർട്ടിക്കാരെയും സംയുക്തമായി വീട്ടുമുറ്റ യോഗത്തിൽ വരെ എത്തിച്ച് ഇടതുമുന്നണി തിരഞ്ഞെടുപ്പിനൊരുങ്ങി. പ്രത്യേകിച്ച് ഒരു ‘ചിന്തൻ ശിബിർ’ ഇല്ലാതെ തന്നെ കോൺഗ്രസ് ഉണർന്നു. ഇതുവരെ ഒരു മന്ത്രിസഭയിലും ഉണ്ടാകാത്ത ബന്ധമുണ്ടാക്കിയാണ് 36 ദിവസത്തെ യാത്ര അവസാനിച്ചതെന്നു മന്ത്രി കെ.രാജൻ പറഞ്ഞു. തീർപ്പാകാതെ കിടന്ന പല ഫയലുകളും ബസിലെ സൗഹൃദത്തിൽ തീർപ്പായി. വ്യവസായമേഖലയ്ക്കു ഭൂമി വിട്ടുനൽകുന്ന പ്രശ്നം മാസങ്ങളായി ചർച്ച ചെയ്തിട്ടും തീർന്നിരുന്നില്ല. ഞാനും രാജീവും ഒരു സീറ്റിലായിരുന്നു യാത്രയിൽ. നാലാം ദിവസം ആ ഫയലിൽ ബസിൽ വച്ചു തന്നെ ഒപ്പിട്ടു–രാജൻ പറയുന്നു.
ഏറ്റവും പിന്നിലെ സീറ്റിൽ തലസ്ഥാന ജില്ലയിലെ മന്ത്രിമാരായിരുന്നു. ആന്റണി രാജുവും വി.ശിവൻകുട്ടിയും ജി. ആർ അനിലും. ഒപ്പം കൂടാൻ മന്ത്രി കെ. രാധാകൃഷ്ണനും പിൻ സീറ്റിലെത്തി.
മന്ത്രിമാരിലെ ചിലർ പാട്ടുകാരായിരുന്നു. പാട്ടു തുടങ്ങുന്നത് ആന്റണി രാജു. മൂന്നുനാലുപേർ പാട്ടുപാടി തുടങ്ങിയപ്പോൾ ചില വനിതാ മന്ത്രിമാരും കൂടെക്കൂടി. ദേവീ ശ്രീദേവി..,അല്ലിയാമ്പൽ കടവിൽ.., നീ മധു പകരൂ.. എന്നിവയായിരുന്നു പ്രധാനപാട്ടുകൾ. മുൻ നിരയിലിരുന്ന മന്ത്രിമാരായ രാജീവും ബാലഗോപാലും എം.ബി. രാജേഷും പ്രസാദും രാജനുമൊക്കെ മെല്ലെ ഞങ്ങൾ പിൻ െബഞ്ചുകാർക്കൊപ്പം കൂടുമായിരുന്നുവെന്ന് ആന്റണി രാജു പറഞ്ഞു. ബസിൽ തമാശയ്ക്കും പാട്ടിനുമൊന്നും നിയന്ത്രണം ഉണ്ടായിരുന്നില്ല. അതൊക്കെ മുഖ്യമന്ത്രിയും ആസ്വദിച്ചിരുന്നുവെന്നു മന്ത്രി പറയുന്നു.
ലീഡർ മുഖ്യമന്ത്രി ആയിരുന്നെങ്കിലും യാത്രാ സമയക്രമവും കാര്യങ്ങളും മറ്റു മന്ത്രിമാരെ അറിയിച്ചിരുന്നതും ഏകോപിപ്പിച്ചതും മന്ത്രി കെ. രാധാകൃഷ്ണനായിരുന്നു. ഇതോടെ അദ്ദേഹത്തെ ചിലർ ‘ടൂർ മാനേജർ’ എന്നു കളിയാക്കി.
വേദികളിൽ പ്രസംഗിക്കേണ്ട കാര്യങ്ങളും ആരൊക്കെ പ്രസംഗിക്കുമെന്നതും രാവിലെ മുഖ്യമന്ത്രി പറയും. പ്രസംഗിക്കേണ്ടവർ ഓരോരുത്തരും പറയേണ്ട കാര്യങ്ങൾ ഒരുമിച്ചിരുന്നു ചർച്ച ചെയ്യും. മന്ത്രി കെ.രാജന്റെ പ്രസംഗത്തിലെ ചില തമാശകളും ബസിൽ ചർച്ചയാണ്. മന്ത്രിയുടെ വാചകം ഇങ്ങനെ–‘വയനാട് ചുരമിറങ്ങി വരുന്ന ഒരു തടിലോറി അതിനെ തടയുമെന്നു വെല്ലുവിളിച്ച് റോഡിൽ ഇറങ്ങി നിൽക്കുന്ന തവള. തവളയുടെ സഥിതിയെന്താകും?. ഇതാകും നവകേരള യാത്ര കഴിയുമ്പോൾ യുഡിഎഫിന്റെ സ്ഥിതി.’
ഒരിടത്തു മുഖ്യമന്ത്രി വേദിയിലെത്തിയപ്പോഴും മന്ത്രി രാജൻ പ്രസംഗിക്കുകയാണ്. മുഖ്യമന്ത്രി അടുത്തിരുന്ന മന്ത്രിയോടു ചോദിച്ചു എപ്പോൾ തീരും? മന്ത്രിയുടെ മറുപടി– ‘ലോറി വയനാട് ചുരമിറങ്ങുന്നതേയുള്ളു. തവളയുടെ അടുത്തെത്തിയില്ല’. മുഖ്യമന്ത്രി പോലും ചിരിച്ചുപോയി.
ആരോഗ്യവകുപ്പിൽ അത്യാവശ്യം നിയമിക്കേണ്ട 270 പേരുടെ തസ്തികയും ബസിൽ പാസായി. 2 വർഷമായി ആരോഗ്യവകുപ്പും ധനവകുപ്പും ഫയൽ അങ്ങോട്ടുമിങ്ങോട്ടും അയച്ചിട്ടും നടക്കാതിരുന്ന ഫയലാണ് ബസിൽ തീർപ്പായത്. ബസ് യാത്രയുടെ ഗുണമായി ഇക്കാര്യമാണു മന്ത്രി വീണാ ജോർജിന് ആദ്യം പറയാനുള്ളത്. മന്ത്രി അബ്ദുൽ റഹ്മാന്റെ ഭാര്യ ചില വടക്കൻ പലഹാരങ്ങൾ ബസിൽ എത്തിക്കുമായിരുന്നു. വർക്കലയിൽ എത്തിയപ്പോൾ എംഎൽഎ ജോയിയുടെ വീട്ടിൽനിന്ന് കാടമുട്ട ഉപയോഗിച്ചുണ്ടാക്കിയ ‘കിളിക്കൂട്’ എന്ന പലഹാരം എത്തി. നവകേരള സദസ്സിനെച്ചൊല്ലിയുള്ള പുറത്തു നടക്കുന്ന സംഘർഷങ്ങൾ അറിഞ്ഞിരുന്നോ, അതിനെപ്പറ്റി ചർച്ചകളൊക്കെ നടന്നോ എന്നു ചോദിച്ചപ്പോൾ ഞങ്ങൾ ബസിൽ ഇട്ടിരുന്ന ചാനലിൽ അത്തരം വാർത്തകളിൽ വരാറില്ലായിരുന്നു എന്നായിരുന്നു ഒരു മന്ത്രിയുടെ മറുപടി.