മീററ്റ്: മീററ്റിൽ മർച്ചന്റ് നേവി ഉദ്യോഗസ്ഥനായ ഭർത്താവിനെ കൊന്ന് കഷ്ണങ്ങളാക്കി സിമന്റിട്ട് മൂടിയ കേസിൽ ഭാര്യയും ആൺസുഹൃത്തും അറസ്റ്റിൽ. സൗരഭ് കുമാർ ആണ് കൊല്ലപ്പെട്ടത്. ലണ്ടനിൽ നിന്ന് തിരിച്ചെത്തിയ സൗരഭ് കുമാറിനെ ഭാര്യയും കാമുകനും ചേർന്ന് കൊലപ്പെടുത്തുകയായിരുന്നു. കേസിൽ ഭാര്യ ഭാര്യ മുസ്‌കാൻ റസ്‌തോഗിയും കാമുകൻ സാഹിൽ ശുക്ലയും അറസ്റ്റിലായി.
ഉത്തർപ്രദേശിലെ മീററ്റിലെ ബ്രഹ്മപുരി പോലീസ് സ്റ്റേഷൻ പരിധിയിലുള്ള ഇന്ദിരാനഗർ മാസ്റ്റർ കോളനിയിലാണ് സംഭവം. കൊല്ലപ്പെട്ട സൗരഭ് കുമാർ മർച്ചന്റ് നേവിയിലാണ് ജോലി ചെയ്തിരുന്നത്. ഇയാൾ പലപ്പോഴും വിദേശത്തേക്ക് പോയിരുന്നു. 2020-ൽ ലണ്ടനിൽ ഡ്യൂട്ടിയിലായിരിക്കെ, ഇയാൾ അവിടെ ഒരു മാളിൽ ജോലി ചെയ്യാൻ തുടങ്ങി. 2016 ന്റെ തുടക്കത്തിൽ, സൗരഭ് മുസ്‌കൻ റസ്‌തോഗിയുമായി പ്രണയത്തിലായി. ഇരുവർക്കും പിഹു എന്ന് പേരുള്ള അഞ്ച് വയസ്സുള്ള ഒരു മകൾ ഉണ്ട്. സൗരഭും ഭാര്യയും മകളും ഇന്ദിരാനഗറിലെ ഓംപാലിന്റെ വീട്ടിൽ മൂന്ന് വർഷമായി വാടകയ്ക്ക് താമസിച്ചു വരികയായിരുന്നു.
ഭാര്യ മുസ്കന്റെ ജന്മദിനത്തോടനുബന്ധിച്ച് നാട്ടിൽ തിരിച്ചെത്തിയതായിരുന്നു സൗരഭ്. ഫെബ്രുവരി 25-നായിരുന്നു ഭാര്യ മുസ്‌കാന്റെ ജന്മദിനം. ഫെബ്രുവരി 24-നാണ് സൗരഭ് തിരിച്ചെത്തിയത്. 2019 മുതൽ ഇവർ താമസിച്ചിരുന്ന പ്രദേശത്തെ ശാസ്ത്രി കി കോത്തിയിൽ താമസിക്കുന്ന സാഹിൽ ശുക്ല എന്ന യുവാവുമായി മുസ്‌കാൻ അടുപ്പത്തിലായിരുന്നു. ഇരുവര് തമ്മിലുള്ള ബന്ധത്തെക്കുറിച്ച് സൗരഭിന് അറിയാമായിരുന്നു. ഇതേത്തുടർന്ന് ഇവർക്കിടയിൽ തർക്കമുണ്ടായിരുന്നു. ഇതേ തുടർന്ന് മാർച്ച് 4 ന് രാത്രി മുസ്‌കാൻ സൗരഭിന് ഭക്ഷണത്തിൽ മയക്കമരുന്ന് കലർത്തി നൽകി ബോധരഹിതനാക്കി. പിന്നാലെ കാമുകൻ സാഹിലിനെ വീട്ടിലേക്ക് വിളിച്ചുവരുത്തി. തുടർന്നാണ് ഇവർ അരുംകൊല നടത്തിയത്.
പിന്നീട് രണ്ടുപേരും ചേർന്ന് സൗരഭിനെ കത്തി ഉപയോഗിച്ച് നെഞ്ചിൽ ആവർത്തിച്ച് കുത്തി കൊലപ്പെടുത്തുകയായിരുന്നു. ഇതിനുശേഷം, മൃതദേഹം കത്തി ഉപയോഗിച്ച് 15 ഓളം കഷണങ്ങളാക്കി മുറിച്ച് ഒരു പ്ലാസ്റ്റിക് ഡ്രമ്മിൽ നിറച്ചു. സിമന്റും പൊടിയും ചേർത്ത് ലായനി ഉണ്ടാക്കിയാണ് ശരീരഭാഗങ്ങൾ ഈ ഡ്രമ്മിൽ ഒളിപ്പിച്ചിരുന്നത്. ശരീരഭാഗങ്ങൾ ഡ്രമ്മിൽ നിറച്ച ശേഷം അത് ഇഷ്ടികകൾ കൊണ്ട് മൂടുകയായിരുന്നു.
മാർച്ച് 4 ന് തന്നെയാണ് ഇവർ ഈ ക്രൂരകൃത്യങ്ങൾ എല്ലാം ചെയ്യുന്നത്. പിന്നീട് മുസ്‌കാൻ തന്റെ അഞ്ച് വയസ്സുള്ള മകളെ മാതാപിതാക്കളുടെ വീട്ടിൽ ഉപേക്ഷിച്ച് കാമുകനൊപ്പം ഷിംലയിലേക്ക് പോയി. ചൊവ്വാഴ്ച, മുസ്‌കാൻ സംഭവത്തെക്കുറിച്ച് അമ്മയെ അറിയിച്ചു. അമ്മ തന്നെയാണ് പൊലീസിൽ വിവരം അറിയിച്ചത്. പിന്നാലെ സ്ഥലത്തെത്തിയ പൊലീസ് മുസ്‌കാനെയും കാമുകനെയും അറസ്റ്റ് ചെയ്യുകയും സൗരഭിന്റെ മൃതദേഹം കണ്ടെടുക്കുകയും ചെയ്തു.
