മനാമ: സൽമാനിയ കാനൂ ഗാർഡനിൽ പ്രവർത്തിക്കുന്ന ഗുരുദേവ സോഷ്യൽ സൊസൈറ്റി (ജി.എസ്.എസ്.) ബഹ്‌റൈൻ

സംഘടിപ്പിച്ച പത്തുദിവസത്തെ നവരാത്രി ആഘോഷങ്ങൾ വിജയദശമി ദിനത്തിലെ വിദ്യാരംഭച്ചടങ്ങുകളോടെ സമാപിച്ചു.

സൊസൈറ്റിയിൽ പ്രത്യേകം സജ്ജീകരിച്ച നവരാത്രി മണ്ഡപത്തിൽ ഭക്തിനിർഭരമായ അന്തരീക്ഷത്തിലായിരുന്നു ചടങ്ങുകൾ.

പ്രശസ്ത വ്യവസായിയും പ്രവാസി ഭാരതീയ പുരസ്‌കാര ജേതാവുമായ കെ.ജി. ബാബുരാജൻ കുട്ടികൾക്ക് ഹരിശ്രീ കുറിച്ച് വിദ്യാരംഭത്തിന് നേതൃത്വം നൽകി.

അറിവിന്റെ അക്ഷരമുറ്റത്തേക്ക് ചുവടുവെച്ച കുരുന്നുകൾക്ക് അദ്ദേഹം ആശംസകളും അനുഗ്രഹവും നേർന്നു.

പത്തുദിവസത്തെ ആഘോഷങ്ങളുടെ ഭാഗമായി സൊസൈറ്റി കുടുംബാംഗങ്ങളുടെ കുട്ടികൾ അവതരിപ്പിച്ച ശാസ്ത്രീയ നൃത്തവും വിവിധ കലാപരിപാടികളും ചടങ്ങുകൾക്ക് മാറ്റുകൂട്ടി.

സൊസൈറ്റി കുടുംബാംഗങ്ങളും കുട്ടികളും പങ്കെടുത്ത പരിപാടികൾക്ക് ഡയറക്ടർ ബോർഡ് അംഗങ്ങൾ നേതൃത്വം നൽകി.

വിദ്യാരംഭം കുറിച്ച എല്ലാ കുരുന്നുകൾക്കും ഭാരവാഹികൾ ആശംസകൾ നേർന്നു.

വെള്ളിയാഴ്ച നടക്കുന്ന എഡ്യൂക്കേഷൻ എക്സലൻസ് അവാർഡ് ദാനച്ചടങ്ങിൽ കുട്ടികൾക്ക് സർട്ടിഫിക്കറ്റുകൾ നൽകുമെന്നും അറിയിച്ചു.

The post വിദ്യാരംഭത്തോടെ ഗുരുദേവ സോഷ്യൽ സൊസൈറ്റിയുടെ നവരാത്രി ആഘോഷങ്ങൾക്ക് സമാപനം appeared first on Starvision News Malayalam.

മനാമ: സൽമാനിയ കാനു ഗാർഡനിൽ പ്രവർത്തിക്കുന്ന ഗുരുദേവ സോഷ്യൽ സൊസൈറ്റിയുടെ (GSS Bahrain) നേതൃത്വത്തിൽ ശ്രീനാരായണ ഗുരുദേവന്റെ 99-ാം മഹാസമാധി ദിനാചരണം വിപുലമായ ചടങ്ങുകളോടെ ആചരിച്ചു. സമൂഹത്തിൽ ഗുരുദേവ ദർശനങ്ങളുടെ പ്രസക്തി ഉറപ്പുവരുത്തുന്നതിന്റെ ഭാഗമായി വിവിധങ്ങളായ പരിപാടികളാണ് സംഘടന ഒരുക്കിയത്.

സമാധിയോടനുബന്ധിച്ച് കുടുംബാംഗങ്ങൾക്കും കുട്ടികൾക്കും ആയി വിവിധ വിഷയങ്ങളെ ആസ്പദമാക്കി പ്രശസ്ത ഗുരു പ്രഭാഷകനും, മോട്ടിവേഷണൽ സ്പീക്കറും, നെടുങ്കണ്ടം പച്ചടി ഗവൺമെൻറ് യു.പി സ്കൂളിലെ പ്രധാന അധ്യാപകനുമായ ശ്രീ. ബിജു പുളിക്കലേടത്ത് കഴിഞ്ഞ മൂന്നു ദിവസങ്ങളിലായി നടത്തിയ പഠന ക്ലാസുകൾ ഏറെ ശ്രദ്ധേയമായി.
ഗുരുദേവന്റെ ദാർശനിക ആശയങ്ങളും, ആധുനിക കേരളത്തിൻറെ വളർച്ചയും വളരെ ലളിതവും ആഴത്തിലുള്ളതുമായ രീതിയിൽ പുതിയ തലമുറയ്ക്ക് പകർന്നു നൽകുവാൻ അദ്ദേഹത്തിന് സാധിച്ചു.

നാല് ദിവസങ്ങളിലായി സൊസൈറ്റി അങ്കണത്തിൽ നടന്ന ചടങ്ങുകളുടെ ഔപചാരികമായ ഉദ്ഘാടനം
പ്രശസ്ത വ്യവസായിയും പ്രവാസി ഭാരതീയ സമ്മാൻ അവാർഡ് ജേതാവും ബഹ്റൈൻ ശ്രീനാരായണ കമ്മ്യൂണിറ്റിയുടെ രക്ഷാധികാരിയുമായ ശ്രീ. കെ.ജി. ബാബുരാജൻ ഭദ്രദീപം കൊളുത്തി നിർവഹിച്ചു.

ഗുരുദേവന്റെ സമാധി ദിനമായ സെപ്റ്റംബർ 21-നും സൊസൈറ്റി വിപുലമായ പരിപാടികൾ സംഘടിപ്പിക്കുകയുണ്ടായി. സമാപന സമ്മേളനത്തിൽ സമാധി ദിനാചരണങ്ങൾക്ക് നേതൃത്വം നൽകിയ വിശിഷ്ട അതിഥി ശ്രീ. ബിജു പുളിക്കലേടത്തിനെ സൊസൈറ്റി ചെയർമാൻ സനീഷ് കൂറുമുള്ളിൽ പൊന്നാട അണിയിച്ച് ആദരിച്ചു. നിലവിലെ സാഹചര്യത്തിൽ ഗുരുദേവന്റെ സന്ദേശങ്ങൾക്ക് വളരെയധികം പ്രസക്തി ഉണ്ടെന്നും അത് കേവലം അനുഷ്ഠാനങ്ങളിൽ ഒതുക്കാതെ ഗൗരവത്തോടെ ഉൾക്കൊള്ളേണ്ടതാണെന്നും ചടങ്ങിൽ സംസാരിച്ചവർ ഓർമ്മിപ്പിച്ചു.

സൊസൈറ്റി ചെയർമാൻ സനീഷ് കൂറുമുള്ളിൽ, വൈസ് ചെയർമാൻ സതീഷ് കുമാർ, ജനറൽ സെക്രട്ടറി ബിനുരാജ് രാജൻ, അസിസ്റ്റന്റ് സെക്രട്ടറി ദേവദത്തൻ, ലേഡീസ് വിങ് പ്രസിഡന്റ് ശ്രീജയ് ബിനോ, സെക്രട്ടറി സിന്ദു റോയി, എന്നിവർ ആശംസ അറിയിച്ചു സംസാരിച്ചു. മറ്റ് ഡയറക്ടർ ബോർഡ് അംഗങ്ങളായ ശിവജി ശിവദാസൻ, രഞ്ജിത്ത് വാസപ്പൻ, ബിനുമോൻ ചുങ്കപ്പാറ, ലേഡീസ് വിങ് അംഗങ്ങളായ വിദ്യാ രാജേഷ്, ആശ ശിവകുമാർ തുടങ്ങിയവർ പരിപാടികൾക്ക് നേതൃത്വം നൽകി. ചടങ്ങുകളിൽ ജി എസ്സ് എസ്സ് കുടുംബാംഗങ്ങളും കുട്ടികളും ഉൾപ്പെടെ നിരവധി പേർ സന്നിഹിതരായിരുന്നു. ‎ ‎

The post ശ്രീനാരായണ ഗുരുദേവന്റെ 99-ാം മത് മഹാസമാധി ദിനാചരണം ഗുരുദേവ സോഷ്യൽ സൊസൈറ്റി (GSS) പഠനശിബിരം സംഘടിപ്പിച്ചു appeared first on Starvision News Malayalam.

മനാമ: കേരള നിയമസഭ ഡെപ്യൂട്ടി സ്പീക്കർ ശ്രീമതി ഷാനിമോൾ ഉസ്മാൻ ബഹ്‌റൈനിലെ ഗുരുദേവ സോഷ്യൽ സൊസൈറ്റി സന്ദർശിച്ചു. സൽമാനിയ കാനൂ ഗാർഡനിൽ പ്രവർത്തിക്കുന്ന ജി.എസ്.എസ് ആസ്ഥാനത്തായിരുന്നു സന്ദർശനം. ജി.എസ്.എസ് ഡയറക്ടർ ബോർഡ് അംഗങ്ങൾ, ലേഡീസ് വിങ് സെക്രട്ടറി സിന്ധു റോയ്, ജി.എസ്.എസ് കുടുംബാംഗങ്ങൾ എന്നിവർ പങ്കെടുത്ത ചടങ്ങിൽ ജി.എസ്.എസ് ചെയർമാൻ സനീഷ് കൂറുമുള്ളിൽ പൊന്നാട അണിയിച്ച് ഡെപ്യൂട്ടി സ്പീക്കറെ ആദരിച്ചു.

വിദേശത്ത് പ്രവർത്തിക്കുന്ന മലയാളി സമൂഹം കേരളത്തിന്റെ സാംസ്കാരിക പാരമ്പര്യവും സാമൂഹിക മൂല്യങ്ങളും ലോകത്തിന് മുന്നിൽ ഉയർത്തിക്കാട്ടുന്നുവെന്ന് ഷാനിമോൾ ഉസ്മാൻ പറഞ്ഞു. ഗുരുദേവ സോഷ്യൽ സൊസൈറ്റിയുടെ പ്രവർത്തനങ്ങൾ മാതൃകാപരമാണെന്നും സമൂഹത്തിന്റെ ഐക്യവും സേവനമനോഭാവവും അഭിനന്ദനാർഹമാണെന്നും അവർ കൂട്ടിച്ചേർത്തു.

ചടങ്ങിൽ അസിസ്റ്റന്റ് സെക്രട്ടറി ദേവദത്തൻ എ.ഡി., മെമ്പർഷിപ്പ് സെക്രട്ടറി രഞ്ജിത് വാസപ്പൻ, ഇന്ത്യൻ സ്കൂൾ ഡയറക്ടർ ബോർഡ് അംഗവും ജി.എസ്.എസ് കുടുംബാംഗവുമായ മിഥുൻ മോഹൻ എന്നിവരും പങ്കെടുത്തു.

പാലക്കാട് അസോസിയേഷൻ പ്രതിനിധികളായ അശോക് കുമാർ, സൽമാനുൾ ഫാരിസ് എന്നിവരും ഒ.ഐ.സി.സി നേതാക്കളായ ഗഫൂർ ഉണ്ണിക്കുളം, ബിനു കുന്നന്താനം, ബോബി പാറയിൽ, ബിബിൻ ഫിലിപ്പ്, റംഷാദ് അയിലക്കാട്, നിസാർ കുന്നുംകുളത്തിങ്കൽ, നൈസാം, വിൻസു കൂത്തപ്പള്ളി എന്നിവരും ഡെപ്യൂട്ടി സ്പീക്കർക്കൊപ്പം ജി.എസ്.എസ് സന്ദർശിച്ചു.

The post ഡെപ്യൂട്ടി സ്പീക്കർ ഷാനിമോൾ ഉസ്മാൻ ഗുരുദേവ സോഷ്യൽ സൊസൈറ്റി സന്ദർശിച്ചു appeared first on Starvision News Malayalam.

മനാമ: ആതിഥേയ രാജ്യമായ ബഹ്റൈനിനോടുള്ള ആദരവും ഐക്യദാർഢ്യവും പ്രകടിപ്പിച്ച് ഗുരുദേവ സോഷ്യൽ സൊസൈറ്റിയുടെ ആഭിമുഖ്യത്തിൽ ലോയൽറ്റി പ്ലഡ്ജ് സംഘടിപ്പിച്ചു. “ഞങ്ങളുണ്ട് കൂടെ” എന്ന സന്ദേശം ഉയർത്തിപ്പിടിച്ച് ബഹ്റൈൻ രാജാവിനും രാജ്യത്തിനും പിന്തുണയും കൂറും പ്രഖ്യാപിക്കുന്ന ചടങ്ങാണ് സൽമാനിയ കാനു ഗാർഡനിലെ സൊസൈറ്റി ആസ്ഥാനത്ത് സംഘടിപ്പിച്ചത്.

രാജ്യത്തോടും ഭരണകൂടത്തോടുമുള്ള അചഞ്ചലമായ വിശ്വാസവും ഐക്യദാർഢ്യവും പ്രകടിപ്പിക്കുന്നതിനായാണ് പരിപാടി സംഘടിപ്പിച്ചതെന്ന് ഭാരവാഹികൾ അറിയിച്ചു. സൊസൈറ്റി രക്ഷാധികാരിയും പ്രമുഖ വ്യവസായിയുമായ കെ.ജി. ബാബുരാജൻ ചടങ്ങ് ഉദ്ഘാടനം ചെയ്തു. ബഹ്റൈൻ പ്രവാസികൾക്ക് നൽകുന്ന സുരക്ഷിതവും സൗഹൃദപരവുമായ ജീവിതാന്തരീക്ഷത്തിന് നന്ദിയും ആദരവും രേഖപ്പെടുത്തേണ്ടത് ഓരോ പ്രവാസിയുടെയും ഉത്തരവാദിത്വമാണെന്ന് അദ്ദേഹം ഉദ്ഘാടന പ്രസംഗത്തിൽ പറഞ്ഞു.

സൊസൈറ്റി ചെയർമാൻ സനീഷ് കൂറുമുള്ളിൽ അധ്യക്ഷത വഹിച്ച ചടങ്ങിൽ ജനറൽ സെക്രട്ടറി ബിനുരാജ് രാജൻ സ്വാഗതം ആശംസിച്ചു. ഇന്ത്യൻ സ്കൂൾ മുൻ ചെയർമാൻ പ്രിൻസ് നടരാജൻ, ഇന്ത്യൻ സ്കൂൾ എക്സിക്യൂട്ടീവ് കമ്മിറ്റി അംഗം മിഥുൻ മോഹൻ എന്നിവരും ചടങ്ങിൽ പങ്കെടുത്ത് ബഹ്റൈൻ ഭരണാധികാരികൾക്കും ജനങ്ങൾക്കും ഇന്ത്യൻ സമൂഹത്തിന്റെ നന്ദിയും പിന്തുണയും അറിയിച്ചു.

തുടർന്ന് നടന്ന ലോയൽറ്റി പ്ലഡ്ജിൽ സൊസൈറ്റിയിലെ മുതിർന്ന കുടുംബാംഗങ്ങൾ, വനിതാ പ്രതിനിധികൾ, യുവജന പ്രവർത്തകർ, സുഹൃത്തുക്കൾ തുടങ്ങി നിരവധി പേർ പങ്കെടുത്ത് രാജ്യത്തോടുള്ള കൂറും ഐക്യദാർഢ്യവും രേഖപ്പെടുത്തി. വിവിധ മേഖലകളിൽ പ്രവർത്തിക്കുന്ന ഇന്ത്യൻ സമൂഹത്തിന്റെ പ്രതിനിധികളും ചടങ്ങിൽ സാന്നിധ്യമറിയിച്ചു.

ബഹ്റൈനും ഇന്ത്യൻ സമൂഹവും തമ്മിൽ നിലനിൽക്കുന്ന ദീർഘകാല സൗഹൃദബന്ധം കൂടുതൽ ദൃഢമാക്കുക, ആതിഥേയ രാജ്യത്തിന്റെ വികസന യാത്രയിൽ പ്രവാസി സമൂഹത്തിന്റെ പിന്തുണ ആവർത്തിച്ച് വ്യക്തമാക്കുക, രാജ്യത്തിന്റെ സമാധാനത്തിനും പുരോഗതിക്കും ഐക്യത്തോടെ നിലകൊള്ളുക എന്നിവയാണ് പരിപാടിയുടെ പ്രധാന ലക്ഷ്യമെന്ന് സംഘടനാ ഭാരവാഹികൾ വ്യക്തമാക്കി.

ബഹ്റൈൻ വർഷങ്ങളായി വിവിധ രാജ്യങ്ങളിൽ നിന്നുള്ള പ്രവാസികളെ ഹൃദയപൂർവം സ്വീകരിക്കുകയും മികച്ച തൊഴിൽ-ജീവിത സാഹചര്യങ്ങൾ ഒരുക്കുകയും ചെയ്യുന്ന രാജ്യമാണ്. ബഹ്റൈന്റെ സമാധാനത്തിനും സുരക്ഷയ്ക്കും ക്ഷേമത്തിനും പുരോഗതിക്കും ഒപ്പം നിലകൊള്ളുമെന്ന പ്രവാസി സമൂഹത്തിന്റെ ഉറച്ച സന്ദേശമാണ് “ഞങ്ങളുണ്ട് കൂടെ” എന്ന പരിപാടിയിലൂടെ ഗുരുദേവ സോഷ്യൽ സൊസൈറ്റി ഉയർത്തിക്കാട്ടിയത്.

The post ബഹ്റൈനിനോടുള്ള സ്‌നേഹാദരങ്ങളുമായി ഗുരുദേവ സോഷ്യൽ സൊസൈറ്റി ലോയൽറ്റി പ്ലഡ്ജ് സംഘടിപ്പിച്ചു appeared first on Starvision News Malayalam.