സുരക്ഷയ്ക്കാണ് കമ്പനി പരമപ്രധാന പരിഗണന നൽകുന്നതെന്ന് എയർ ഇന്ത്യ പ്രസ്താവനയിൽ വ്യക്തമാക്കി. സുരക്ഷാ മാനദണ്ഡങ്ങൾ, ശാരീരികക്ഷമതാ വ്യവസ്ഥകൾ, നിയന്ത്രണ നിർദേശങ്ങൾ എന്നിവയുടെ ലംഘനത്തോട് വിട്ടുവീഴ്ചയില്ലാത്ത സമീപനമാണ് സ്വീകരിക്കുന്നതെന്നും അതിന്റെ അടിസ്ഥാനത്തിലാണ് പൈലറ്റിനെ അടിയന്തരമായി സർവീസിൽനിന്ന് പിരിച്ചുവിട്ടതെന്നും കമ്പനി അറിയിച്ചു.

ഓഗസ്റ്റ് നാലിന് ഫുക്കറ്റിൽനിന്ന് ഡൽഹിയിലേക്ക് പുറപ്പെട്ട എയർ ഇന്ത്യ വിമാനം ഒഡീഷയ്ക്കു മുകളിലൂടെ പറക്കുന്നതിനിടെ അപ്രതീക്ഷിതമായി ഏകദേശം 300 അടി താഴ്ന്നിരുന്നു. സംഭവത്തിൽ 20 യാത്രക്കാർക്കും നാല് ക്യാബിൻ ക്രൂ അംഗങ്ങൾക്കും പരിക്കേറ്റതായാണ് റിപ്പോർട്ട്.

വിമാനത്തിന്റെ ഉയരത്തിൽ പെട്ടെന്നുണ്ടായ വ്യതിയാനത്തെ തുടർന്ന് അധികൃതർ അന്വേഷണം ആരംഭിച്ചിരുന്നു. സംഭവത്തിനു പിന്നാലെ എയർ ഇന്ത്യയിലെയും എയർ ഇന്ത്യ എക്‌സ്‌പ്രസിലെയും പൈലറ്റുമാർക്ക് ലഹരിനിർണയ പരിശോധന നിർബന്ധമാക്കുകയും ചെയ്തു.

The post സുരക്ഷയിൽ വിട്ടുവീഴ്ചയില്ല; ലഹരി ഉപയോഗം കണ്ടെത്തിയ പൈലറ്റിനെ പിരിച്ചുവിട്ട് എയർ ഇന്ത്യ appeared first on Starvision News Malayalam.

മനാമ: എയർ ഇന്ത്യയുടെ ബഹ്‌റൈൻ സെയിൽസ് മാനേജറായി 20 വർഷം സേവനമനുഷ്ഠിച്ച നാരായണ മേനോൻ ഔദ്യോഗിക ചുമതലകളിൽനിന്ന് വിരമിക്കുന്നു. 2026 ഓഗസ്റ്റ് 10 മുതൽ വിരമിക്കൽ പ്രാബല്യത്തിൽ വരും. രണ്ടു പതിറ്റാണ്ട് നീണ്ട സേവനകാലം നിരവധി വിലപ്പെട്ട ഓർമകളും മികച്ച സൗഹൃദങ്ങളും സമ്മാനിച്ചതായി നാരായണ മേനോൻ പറഞ്ഞു. ഒട്ടേറെ ആളുകളെ പരിചയപ്പെടാനും അവരെ സഹായിക്കാനും ലഭിച്ച അവസരം വലിയ ഭാഗ്യമായി കരുതുന്നുവെന്നും അദ്ദേഹം വ്യക്തമാക്കി. ഔദ്യോഗിക ഉത്തരവാദിത്വങ്ങൾക്കപ്പുറം സഹായം ആവശ്യമുള്ളവർക്ക് കൈത്താങ്ങാകാൻ കഴിഞ്ഞത് തന്റെ ജീവിതത്തിലെ ഏറ്റവും വലിയ അനുഗ്രഹങ്ങളിലൊന്നാണെന്നും അദ്ദേഹം പറഞ്ഞു. സേവനത്തിന് അവസരം നൽകിയ എയർ ഇന്ത്യയ്ക്കും തന്റെ യാത്രയുടെ ഭാഗമായ എല്ലാവർക്കും നാരായണ മേനോൻ ഹൃദയപൂർവം നന്ദി അറിയിച്ചു. വിരമിച്ചതിനുശേഷവും തൽക്കാലം ബഹ്‌റൈനിൽതന്നെ തുടരുമെന്നും സുഹൃത്തുക്കളുമായും സമൂഹവുമായുമുള്ള ബന്ധം നിലനിർത്തുമെന്നും അദ്ദേഹം അറിയിച്ചു.

The post 20 വർഷം സേവനം: എയർ ഇന്ത്യ ബഹ്‌റൈൻ സെയിൽസ് മാനേജർ നാരായണ മേനോൻ വിരമിക്കുന്നു appeared first on Starvision News Malayalam.

കൊച്ചി: സമയ കൃത്യതയുടെ കാര്യത്തിൽ ലോകത്തിലെ മികച്ച വിമാനക്കമ്പനികളിൽ ഇടം നേടി എയർ ഇന്ത്യ. ഏവിയേഷൻ അനലിറ്റിക്സ് സ്ഥാപനമായ സിറിയം പുറത്തിറക്കിയ ഏറ്റവും പുതിയ റിപ്പോർട്ട് പ്രകാരം കൃത്യനിഷ്ഠയിൽ എയർ ഇന്ത്യ ലോകത്ത് നാലാം സ്ഥാനത്തെത്തി.

ജൂണിൽ പരിശോധിച്ച 15,135 സർവീസുകളിൽ 86.85 ശതമാനം വിമാനങ്ങളും കൃത്യസമയത്ത് ലാൻഡ് ചെയ്തു. 86.23 ശതമാനം സർവീസുകൾ സമയക്രമം പാലിച്ച് പുറപ്പെട്ടതായും റിപ്പോർട്ടിൽ പറയുന്നു. എയർ ഇന്ത്യയുടെ കമ്പ്ലീഷൻ ഫാക്ടർ 99.7 ശതമാനമാണ്.

വിമാന ശൃംഖലയുടെ കാര്യക്ഷമമായ ഏകോപനം, ആഭ്യന്തര-അന്താരാഷ്ട്ര സർവീസുകളുടെ മികച്ച മാനേജ്മെന്റ്, പ്രവർത്തന നിലവാരം ഉയർത്തുന്നതിനുള്ള തുടർച്ചയായ നടപടികൾ എന്നിവയാണ് നേട്ടത്തിന് പിന്നിലെന്ന് എയർ ഇന്ത്യ അറിയിച്ചു.

ഡൽഹി, മുംബൈ വിമാനത്താവളങ്ങളെ പ്രധാന കേന്ദ്രങ്ങളാക്കി ഹബ് ആൻഡ് സ്പോക്ക് മാതൃകയിലാണ് എയർ ഇന്ത്യ പ്രവർത്തിക്കുന്നത്. നിലവിൽ ലോകത്തിലെ ഏറ്റവും വലിയ വിമാന നവീകരണ പദ്ധതികളിലൊന്നും കമ്പനി നടപ്പാക്കിവരികയാണ്.

600 പുതിയ എയർബസ്, ബോയിങ് വിമാനങ്ങൾക്കാണ് എയർ ഇന്ത്യ ഓർഡർ നൽകിയിരിക്കുന്നത്. കഴിഞ്ഞ ആറുമാസത്തിനിടെ മൂന്ന് പുതിയ ബോയിങ് 787-9 വിമാനങ്ങൾ കൂടി സർവീസിൽ ഉൾപ്പെടുത്തി.

2026ൽ കൂടുതൽ ബോയിങ് 787-9 വിമാനങ്ങളും എയർബസ് A350-1000 വിമാനങ്ങളും ഫ്ലീറ്റിന്റെ ഭാഗമാക്കാനാണ് ലക്ഷ്യമിടുന്നത്. 2026 അവസാനത്തോടെ എയർ ഇന്ത്യയുടെ വൈഡ് ബോഡി വിമാനങ്ങളുടെ പകുതിയിലധികവും പുതിയതോ നവീകരിച്ചതോ ആയ ഇന്റീരിയറുകളോടെ സർവീസ് നടത്താനാണ് പദ്ധതിയിടുന്നത്.

The post കൃത്യനിഷ്ഠയിൽ ലോകത്ത് നാലാം സ്ഥാനത്ത് എയർ ഇന്ത്യ; ആദ്യ അഞ്ച് വിമാനക്കമ്പനികളിൽ ഇടം നേടി appeared first on Starvision News Malayalam.