സിറിയയ്ക്കെതിരായ സാമ്പത്തിക ഉപരോധം നീക്കിയതിനെ ബഹ്റൈന്‍ സ്വാഗതം ചെയ്തു

മനാമ: സിറിയയ്ക്കുമേലുള്ള സാമ്പത്തിക ഉപരോധം നീക്കാനുള്ള യൂറോപ്യന്‍ യൂണിയന്റെ തീരുമാനത്തെ ബഹ്റൈന്‍ സ്വാഗതം ചെയ്തു. ആധുനിക സിറിയന്‍ രാഷ്ട്രം കെട്ടിപ്പടുക്കാനും സ്ഥിരതയ്ക്കും സമൃദ്ധിക്കും വേണ്ടിയുള്ള ജനങ്ങളുടെ അഭിലാഷങ്ങള്‍ നിറവേറ്റാനുമുള്ള ഒരു നല്ല ചുവടുവയ്പ്പാണിതെന്ന് ബഹ്‌റൈന്‍ വിദേശകാര്യ മന്ത്രാലയം പ്രസ്താവനയില്‍ പറഞ്ഞു.
സിറിയയുടെ ഐക്യം, പരമാധികാരം, സുരക്ഷ, സ്വാതന്ത്ര്യം എന്നിവയ്ക്ക് രാജ്യത്തിന്റെ പൂര്‍ണ്ണ പിന്തുണയുണ്ടെന്ന് വിദേശകാര്യ മന്ത്രാലയം വ്യക്തമാക്കി. പുനര്‍നിര്‍മ്മാണം, സമാധാനത്തിന്റെ ഏകീകരണം, സുസ്ഥിര വികസനം, അറബ്, പ്രാദേശിക, അന്താരാഷ്ട്ര തലങ്ങളില്‍ സിറിയയുടെ സജീവ പങ്ക് പുനഃസ്ഥാപിക്കല്‍ എന്നിവ ലക്ഷ്യമിട്ടുള്ള ശ്രമങ്ങള്‍ക്ക് രാജ്യം പിന്തുണ അറിയിച്ചു.